Nta mwanya dufite wo guta kuri raporo z’abashomeri b’Abazungu – Mushikiwabo

Yanditswe na

Izuba Rirashe

Kuya 26 Gashyantare 2015 saa 07:28
Yasuwe :
0 0

U Rwanda rwamaganiye kure raporo nshya y’Umuryango Uharanira Uburenganzira bw’Ikiremwamuntu wa Amnesty Internationale, ivuga ko mu Rwanda nta bwinyagamburiro buhari.

Amnesty Internationale muri raporo yayo y’umwaka wa 2014/15, iravuga ko urubuga rwa politiki mu Rwanda rufunganye, bityo ngo abatavuga rumwe na Leta cyo kimwe n’imiryango itegamiye kuri Leta bakaba batabasha gukora mu bwisanzure.

Gusa ibirego by’uyu muryango u Rwanda ruravuga ko ntacyo bivuze habe na gito. Ngo byabaye nk’indirimbo kandi ni bimwe bihora bigaruka uko imyaka isimburana, ku buryo nta mpamvu yo kubitindaho.

Minisitiri w’Ububanyi n’Amahanga akaba n’Umuvugizi wa Leta y’u Rwanda, Louise Mushikiwabo, ashyira Amnesty Internationale, Reporters Without Borders na Human Rights Watch mu gatebo kamwe, k’imiryango ibeshejweho no guhimba ibinyoma.

Minisitiri Mushikiwabo mu kiganiro yahaye Radio 10, yise abandika izo raporo "abashomeri b’Abazungu”; avuga ko babeshejweho no kubeshya.

Avuga ko ikibatera kubeshya, ari uko imibereho yabo ishingiye ku kwandika raporo, bityo bakaba bagomba guhora bavuga ko ibintu byifashe nabi kuko ngo bavuze ko ibintu bimeze neza akazi kabo kaba karangiye kandi bakeneye gukomeza kubaho.

Yagize ati, "Twebwe akazi dushinzwe nk’abayobozi b’u Rwanda ni ugushakira Abanyarwanda imibereho myiza no kubafasha kumva uko ibintu bigenda mu isi, ariko izo raporo z’abashomeri b’abazungu nta wazivamo. Buri mushomeri w’umuzungu wese abona akazi muri Afurika akaza kuvuga ukuntu tutavuga, tudahumeka, aho babikura simpazi.”

Iyi raporo nshya ya Amnesty Internationale, ivuga ko u Rwanda rwateye imbere mu bukungu ariko ko abaturage nta burenganzira bwo kuvuga ibyo batekereza bafite.

Ivuga kandi ko hari ingingo abantu batinya kuganiraho nka Jenoside n’iyicarubozo, kuko ngo ubivuze yisanzuye aregwa guhungabanya umutekano w’igihugu no kubiba amacakubiri.

Kuri Minisitiri Mushikiwabo, ibi ngibi ndetse n’ibindi byinshi bikubiye muri iyi raporo, cyo kimwe n’ibiba bikubiye muri raporo za Human Rights Watch na Reporters Without Borders,byabaye nk’indirimbo, ntawe ukibitindaho; ati "Uzashaka kuganira natwe nk’igihugu, nk’Abanyarwanda tukavugana n’ibyo bibazo babona [azaze] ariko baricara bakivugira.”

Yakomeje agira ati, "Uwaba afite ikintu gifatika mu kazi ashinzwe ashaka kuganira natwe, ibyo nta kibazo, ntabwo turi igihugu gifunze mu mutwe, ariko iyo miryango iba ifite izindi politike ziri aho igenderaho, ni yo mpamvu tutabitaho umwanya. Ni imiryango ifite amapolitike mpuzamahanga…”

Amnesty International ivuga ko hari abasivili bafatwa bagafungirwa ahantu hatemewe n’amategeko, bagakubitwa abandi bagacomekwa ku mashanyarazi, ariko ngo inzego zibishinzwe ntizibikurikirane.

U Rwanda ariko ruvuga ko ibyo ari ibinyoma byambaye ubusa

Minisitiri Mushikiwabo yavuze ko iyaba imiryango ya Amnesty International, Reporters Without Borders na Human Rights Watch, yifuzaga guhindura ibintu, "bajya bagerageza kuba serious (gukorana ibintu kinyamwuga), naho ibyo kwirirwa bapablishinga (basohora raporo) ntitubitindaho."

Yunzemo ati, "Twe nk’abayobozi b’u Rwanda dufite byinshi bidufitiye akamaro, izo raporo ziza ikamara imyaka 20 ivuga ibintu bimwe ntabwo twebwe tuzitindaho.”

Iyi miryango uko ari itatu isohora raporo buri mwaka; ariko nta raporo n’imwe irasohoka ngo ivugweho rumwe n’impande zombi: abasohoye raporo na Leta y’u Rwanda.

Izuba Rirashe


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .