00:00:00 IGIHE NETWORK KN KINYARWANDA EN ENGLISH FR FRANCAIS

Perezida Kagame yerekanye ko ubufatanye bwa Afurika bwakemura ibibazo biyugarije birimo n’ibikomeye

Yanditswe na IGIHE
Kuya 25 Nzeri 2021 saa 10:28
Yasuwe :
0 0

Perezida w’u Rwanda Paul Kagame yavuze ko ibikorwa ingabo z’u Rwanda zagezeho ku bufatanye n’iza Mozambique bigaragaza ko Abanyafurika baramutse bakoreye hamwe babona ibisubizo biirmo n’ibikomereye uyu mugabane.

Ibi yabivuze mu butumwa yatanze ubwo yifatanyaga n’Abanya-Mozambique mu birori byo kwizihiza Umunsi wahariwe Ingabo muri iki gihugu, ku munsi wa nyuma w’uruzinduko yagiriraga muri iki gihugu.

Perezida Kagame yashimiye Perezida Nyusi wamutumiye mu birori by’ingirakamaro ndetse anashima abitangiye kubohora iki gihugu n’umusaruro wavuye mu maboko yabo, uruhare rwabo mu guharanira ubwigenge n’uburyo byagiye biba uruhererekane n’ahandi muri Afurika.

Yavuze ko umurage wo gushyira hamwe mu bihugu bya Afurika ari wo watumye u Rwanda rwiyemeza gufatanya na Mozambique mu kurwanya ibihungabanya umutekano n’ituze muri Cabo Delgado.

Ati “Abaturage bo muri Cabo Delgado kimwe n’ahandi hose muri Mozambique bakeneye kubaho mu mahoro no mu mudendezo, bakita ku miryango yabo, bagatanga umusanzu mu iterambere ry’igihugu. Ibi turabikeneye igihugu twaba dukomokamo cyose.”

“Iyi ni yo mpamvu tutazuyaje ubwo twitabazwaga ngo ingabo zacu zifatanye n’iza Mozambique mu kugarura umutekano muri aka karere.”

Umukuru w’Igihugu yishimiye ko uku guhuza imbaraga kwatanze umusaruro mu gusubiza inyuma imitwe y’iterabwoba ndetse ko u Rwanda ruzakomeza gutanga umusanzu ushoboka kugira ngo abaturage basubire mu ngo zabo bafite umutekano bityo bakomeze guteza imbere intara yabo.

Yakomeje agira ati “Ndashimira abaturage ba Cabo Delgado, uko bakiriye abavandimwe na bashiki babo b’Abanyarwanda [bo mu basirikare n’abapolisi] bacu bakorana na bagenzi babo muri Mozambique muri aka kazi gakomeye. Ibi bigaragaza ko Abanyafurika bashoboye kandi ko baramutse bahuje imbaraga twabona ibisubizo by’ibibazo birimo n’ibidukomereye.”

“Nta kizadukoma mu nkokora mu kurwanira ituze, iterambere n’imibereho myiza y’abatuye umugabane wacu. U Rwanda ruzakomeza kuba umufatanyabikorwa mwiza, inshuti nziza ya Mozambique kimwe n’abandi mu kuzana impinduka.”

Perezida Kagame yagiriye uruzinduko muri Mozambique kuva kuri uyu wa Gatanu, arusoza ku gicamunsi cyo ku wa Gatandatu.

Yagiranye ibiganiro n’abasirikare n’abapolisi b’u Rwanda boherejwe muri iki gihugu abashimira ubwitange bagaragaje mu rugamba rwo kurwanya imitwe y’iterabwoba.

U Rwanda rwiyemeje ko ruzajya rwitabira ibikorwa byo kugarura amahoro mu bice birimo intambara n’amakimbirane nka rimwe mu masomo rwakuye ku mateka ya Jenoside yakorewe Abatutsi mu 1994, yabaye mu maso y’Umuryango w’Abibumbye n’ibindi bihugu ariko ntibigire icyo bikora mu kuyihagarika.

Perezida Kagame yerekanye ko ubufatanye bw'ibihugu bwa Afurika ari ingenzi mu gukemura ibibazo byugarije umugabane
Perezida wa Mozambique Filipe Nyusi ageza ijambo ku bitabiriye ibirori by'Umunsi w'Ingabo
Abaturage bagaragaza ubwuzu bafitiye Perezida Kagame
Ibirori by'Umunsi w'Ingabo byaranzwe n'imyiyereko ya gisirikare

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .