Perezida wa Tanzania Jakaya Kikwete yatangaje ko igihugu ayoboye gishyigikiye ko umutwe wa FDLR urwanya Leta y’u Rwanda ugabwaho ibitero anyomoza amakuru ko Tanzaniya iwukingira ikibaba.

Mu 2013, Kikwete yari yasabye ko Leta y’u Rwanda iganira na FDLR ariko u Rwanda rubitera utwatsi rwivuye inyuma.

Muri uwo mwaka kandi Tanzaniya yohereje Ingabo muri Repubulika Iharanira Demokarasi ya Congo zigiye gufasha iza Loni kurwanya M23.

Perezida wa Tanzaniya Jakaya Mrisho Kikwete

Ikinyamakuru The Star cyatangaje ko bwira abadipolomate bo muri Tanzaniya ijambo ritangira umwaka yavuze ko Tanzaniya izafasha kwaka intwaro FDLR.

Yagize ati” Mundeke mfate aka kanye mbabwire ko Tanzaniya ishyigikiye irandurwa rya FDLR. Abavuga ko Tanzaniya ishyigikiye FDLR ni abiyita ko basoma mu mutima wayo bakibwira ko bazi ukuru , biteye igisebo kandi ntibikwiye. Ni abashakira ikibi igihugu cyacu.”

Umutwe wa FDLR wari wasabwe kuba warangije gushyira intwaro hasi mbere ya 2 Mutarama 2015 ariko kugeza ubu ntirabishyira mu bikorwa.

Leta Zunze Ubumwe za Amerika na Loni byasabye ingabo za Loni ziri muri Congo n’iz’icyo gihugu kugaba ibitero bya gisirikare kuri uwo mutwe.

Abasesengura Politiki yo mu karere k’Ibiyaga Bigari bafite impungenge ko hari ibihugu bifite ingabo muri MONUSCO nka Tanzaniya na Afurika y’Epfo byakwitambika kuba ibiteri kuri FDLR.