Muri iki gihe hatangiwe ibikorwa bitegura kwibuka ku nshuro ya 20 Jenoside yakorewe Abatutsi, ishyaka ry’ubwisungane bugamije iterambere (PSP: Parti de la Solidarité et du Progrès), rirahamagarira abayoboke baryo kugira uruhare mu bikorwa bitegura no mu kwibuka Jenoside yakorewe Abatutsi, muri Mata 1994.

Nk’uko tubikesha itangazo rigenewe abanyamakuru ryashyizweho umukono n’umunyamabanga mukuru wa PSP, Nkubana Alphonse, si ibikorwa bijyanye na gahunda yo gutegura kwibuka Jenoside yakorewe Abatutsi gusa, barasaba abayoboke babo n’abanyarwanda bose muri rusange, kwitabira no kugira uruhare muri gahunda ya Ndi Umunyarwanda.

Iryo tangazo rikomeza rivuga ko PSP ishimira FPR Inkotanyi, uruhare rwayo mu guhagarika Jenoside yakorewe Abatutsi, by’umwihariko bagashimira Perezida wa Repubulika Paul Kagame wari uyoboye ingabo za FPR.

Baranashimira ibikorwa bikomeye u Rwanda rumaze kugeraho kubera imiyoborere myiza ya Perezida Kagame, bityo PSP igasaba Leta guha ijambo abaturage muri rusange bakavuga ibyifuzo byabo ku Itegeko Nshinga, kuko ribuza Umukuru w’igihugu kwiyamamariza manda zirenze ebyiri.

PSP igaragaza ko yifuza ko Abanyarwanda bose bagira uburenganzira busesuye ku Itegeko Nshinga, kuko aribo barishyizeho kandi barifiteho uburenganzira. Basoza bavuga ko PSP yiteguye gushyikira icyifuzo Abanyarwanda bazahitamo, cyane cyane uhereye ku rubyiruko rwatangiye gusaba ko Itegeko Nshinga ryavugururwa.

[email protected]