Ubushyamirane bwari hagati mu mutwe wa M23 aho ingabo zishyigikiye Jean Marie Runiga n’izishyigikiye Sultan Makenga yazatanye mu mitwe, ku wa Gatanu tariki ya 28 Gashyantare impande zombi zafashije intwaro hasi.

Iyo mirwano yatangiye ku wa kane, yabereye mu gace ka Rutshuru mu bilometero 30 mu majyaruguru y’Umujyi wa Goma. Biravugwa ko abantu bagera kuri 30 bashobora kuba barayikomerekeyemo nk’uko bitangazwa na zimwe mu nzego za gisirikare zikorera muri ako gace.

Ubwo bushyamirane bwo mu mutwe wa M23 bwatumye abaturage bafata utwangushye bahungira mu gihugu cy’abaturanyi cya Uganda, nk’uko umwe mu bacuruzi bo muri icyo gihugu yabitangarije Ibiro Ntaramakuru by’Abafaransa dukesha iyi nkuru.

Ingabo zatanye mu mitwe n’iziri ku ruhande rwa Jean Marie Runiga, wahoze ari umuyobozi wa M23 ushinzwe ibya Politiki ubu wakuwe kuri uwo mwanya, zahanganye n’iziri ku ruhande rwa Sultani Makenga, umuyobozi ushinzwe ingabo za M23.

Amakuru aturuka muri ako gace k’amajyaruguru ya Kivu, atangaza ko impande zombi nyuma yo kwegeranya ingabo bitahutiweho kuko byari bimaze igihe bitegurwa, ku wa kane ruhita rwambikana. Ingabo za Runiga bivugwa ko ari zo zashotoye izo ku ruhande rwa Makenga.

Ingabo za Sultani Makenga zari zifite ibirindiro i Bunagana, ku mupaka ugabanya Congo na Uganda na ho iza Jeam Marie Runiga ziri i Kibumba. Muri iyo mirwano ingabo zishyigikiye Bosco Ntaganda ziyunze n’uruhande rwa Runiga.

Ubushyamirane hagati ya Sultani Makenga na Jean-Marie Runiga, bwatangiye gukaza umurego ku wa 24 Gashyantare mu gihe hashyirwaga umukono ku masezerano y’i Addis Abeba yo kugarura amahoro mu karere hagati y’ibihugu cumi na kimwe. Runiga yashatse ingabo zo kumufasha gushoza intambara kuri Makenga. Amakuru avuga ko ku munsi wa mbere imirwano yagoyemo abantu bagera ku icumi ubwo Makenga yaterwaga.

Umutwe wa M23 washoye intambara ku ngabo za Congo muri Mata 2012 ushinja Leta kuba itarubahirije amasezerano yo kuwa 23 Werurwe 2009 ajyanye n’ihuzwa ry’ingabo za CNDP n’iza Leta.