Ku cyumweru taliki ya 7 Mata 2013, muri Ambasade y’u Rwanda mu gihugu cya Nigeria habereye umuhango wo kwibuka ku nshuro ya 19 Jenoside yakorewe Abatutsi muri Mata 1994. Hagendewe ku nsanganyamatsiko y’uyu mwaka “Twibuke Jenoside yakorewe Abatutsi duharanira kwigira”, hongeweho ko n’ubundi ak’imuhana kaza imvura ihise, Abanyarwanda badakwiye kurambiriza ku nkunga z’amahanga.
Ambasaderi w’u Rwanda muri Nigeria, Joseph Habineza yashimiye abaje kwifatanya n’umuryango nyarwanda kwibuka Jenoside yakorewe Abatutsi muri 1994, no kunamira inzirakarengane z’Abatutsi zirenga miliyoni zishwe icyo gihe mu minsi 100 gusa.
Yasobanuye ko abakoloni ari bo ba nyirabayazana b’amateka mabi yaranze u Rwanda akaza no kugeza kuri Jenoside yakorewe Abatutsi, kuko basanze u Rwanda rwari rufite amahoro, Abanyarwanda bose basenga Imana imwe kandi bumvikana, bagatangira kubacamo ibice. Agira ati “Ubuyobozi bubi, gucamo abantu ibice, ubujiji n’ubukene ni byo byabaye imizi ikomeye ya Jenoside.”
Yavuze kandi ko n’ubwo Jenoside yakorewe Abatutsi yatwaye ubuzima bw’inzirakarengane zisaga miliyoni, nta mahitamo u Rwanda rwari rufiye, uretse gukomeza guharanira kubaho n’ubwo cyari igihugu cyashegeshwe bikabije. Bityo, ingamba na gahunda u Rwanda rwihaye byarufashije kugira umuvuduko udasanzwe mu iterambere.
Ku nsanganyamatsiko ijyane no kwibuka ku nshuro ya 19 Jenoside yakorewe Abatutsi, “Twibuke Jenoside yakorewe Abatutsi duharanira kwigira”, Ambasaderi Habineza yongeyeho ko n’ubundi Abanyarwanda batagombye gutegereza inkunga z’amahanga kuko “Ak’imuhana kaza imvura ihise”. Yaboneyeho gushimira abanyanijeria bakorera ubucuruzi mu Rwanda, asaba abandi n’inshuti zabo kugera ikirenge mu cyabo.
Ambasaderi Martin Uhomoibhi, Umunyamabanga Uhoraho muri Minisiteri y’Ububanyi n’Amahanga ya Nigeria yashimye imbaraga ubuyobozi bw’u Rwanda bwakoresheje kugira ngo igihugu kibe kigeze aho kiri ubu, aho kiza mu bya mbere byorohereza ishoramari “Doing Business”. Yahaye abari aho ubuhamya bw’iterambere we ubwe yiboneye ubwo yari u Rwanda mu kwezi k’Ukuboza 2012, aho yari yatumiwe mu birori bo kwizihiza isabukuru y’imyaka 25 ya FPR Inkotanyi.
Kwibuka byasojwe n’umutambagiro “Light Candle Procession”, uyobowe na Ambasaderi Joseph Habineza, wakongereje urumuri buri wese witabiriye iki gikorwa, mu rwego rwo kwibuka inzirakarengane zazize Jenoside yakorewe Ababatutsi muri 1994.
Uretse Ambasaderi Martin Uhomoibhi, Umunyamabanga Uhoraho muri Minisiteri y’Ububanyi n’Amahanga ya Nigeria wari unahagariye Guverinoma ya Nigeria, uyu muhango wo kwibuka witabiriwe n’abantu benshi barimo abahagarariye ibihugu byabo n’imiryango mpuzamahanga muri Nigeria, abanyamakuru bandika, aba za televiziyo n’ab’amaradiyo akorera muri Nigeria, inshuti z’u Rwanda, abakozi ba Ambasade y’u Rwanda ndetse n’Abanyarwanda baba muri Nigeria.
TANGA IGITEKEREZO