Minisitiri Biruta asanga Uganda ifite ubushake, ibibazo byayo n’u Rwanda byakemuka mu cyumweru kimwe

Yanditswe na Twarabanye Venuste
Kuya 26 Gashyantare 2020 saa 09:57
Yasuwe :
0 0

Minisitiri w’Ububanyi n’Amahanga w’u Rwanda, Dr. Vincent Biruta, yavuze ko iyo habaho ubushake bwa Politiki, ibibazo u Rwanda rufitanye na Uganda biba byarakemutse kuko ngo ibyo u Rwanda rusaba byumvikana ku buryo byanakemuka mu cyumweru kimwe.

Kuwa Gatanu tariki 21 Gashyantare 2020 nibwo Inama yabereye i Gatuna ihuje abayobozi b’u Rwanda, Uganda, Angola na Repubulika Iharanira Demokarasi ya Congo, yahaye Uganda ukwezi kumwe ko kugenzura ibirego bya Repubulika y’u Rwanda ku bikorwa bibera ku butaka bwayo by’imitwe ibangamiye guverinoma y’u Rwanda, byaba ari ukuri, Uganda igafata ingamba zose zo kubihagarika no kwirinda ko byakongera kubaho nyuma hakabaho ibiganiro byo gufungura imipaka.

Mu kiganiro Majuscule Propos cya Televiziyo y’u Rwanda, cyavugaga ku bibazo by’u Rwanda na Uganda cyatambutse kuri iki Cyumweru, Minisitiri w’Ububanyi n’Amahanga, Dr. Vincent Biruta, yabajijwe ku cyizere cy’uko Uganda yaba izubahiriza ibyo yasabwe mu kwezi kumwe yahawe, asubiza ko ikibazo atari igihe cyo kubikemura ahubwo ikibazo ari ubushake bwa Politiki.

Yavuze ko ibyo u Rwanda rusaba byumvikana kandi ko ari ibintu bitatwara icyumweru kimwe kugira ngo bikemuke Uganda iramutse ifite ubushake bwo kubikemura.

Ati “Njye ntekereza ko iyo haba ubushake bwa Politiki bitajyaga gusaba iminsi 30 kubera ko ibyo u Rwanda rusaba birumvikana: Dufite abanyarwanda bafashwe bari muri gereza dusaba ko barekurwa. Turasaba ko gufata abanyarwanda no kubatoteza mu buryo bunyuranyije n’amategeko bihagarara. Turasaba ko ibikorwa byo gushyigikira imitwe irwanya u Rwanda bihagarara. Ndatekereza ko itari inakenewe, ibyo ni ibintu abantu bakora mu cyumweru kimwe.”

Uganda iri mu bibazo by’ubukungu ndetse na Banki nkuru y’icyo gihugu iherutse kwerurira abagize Inteko Ishinga Amategeko ko yaguye mu gihombo cya miliyoni 545 z’amadorali ya Amerika mu myaka 15 ishize.

Abasesenguzi basanga Uganda ikeneye cyane ko umupaka ufungurwa nubwo n’abanyarwanda bawukeneye. Ku ruhande rumwe bisa nk’aho Museveni yari yizeye ko inama iheruka isiga iwufunguye nkuko n’ubutumwa yanditse kuri Twitter bibugaragaza.

Nyuma gato y’iyo nama yanditse ati “Mfitiye impuhwe abaturage ba Uganda n’ab’u Rwanda bagizweho ingaruka n’ifungwa ry’umupaka wa Gatuna. Ndabasaza kwihangana mu gihe turi gushaka igisubizo kirambye. Nizeye ko ukuri kuzagaragara kubera Guverinoma ya NRM [Ishyaka riri ku butegetsi] ihagaze ku kuri.”

Dr. Vincent Biruta wari mu nama yabereye i Gatuna, yavuze ko abahuza bari bateguye gahunda irimo n’ikimenyetso cyo kwambuka umupaka, ariko abakuru b’ibihugu baza kuyihindura nyuma ari nabwo ikiganiro n’itangazamakuru cyakuwemo, hagasomwa itangazo. Birashoboka ko ariho icyizere Museveni yari afite cyari gishingiye.

Ati “Ndakeka iyo nyandiko ya Twitter yaranditswe inama irimo cyangwa itararangira, wenda bikozwe n’ushinzwe konti ye ya Twitter.”

Umujyanama wa Perezida Kagame, Dr Jean Paul Kimonyo, yavuze ko Museveni ashobora kuzubahiriza ibyo yasabwe kubera igitutu ariho cyerekeye ubukungu bwa Uganda buri kuzahara.

Ati “Turebye uko ibintu bihagaze ubu Perezida Museveni ari ku gitutu gikomeye. Bisa nk’aho Museveni yatekerezaga ko inama yabaye ku wa Gatanu izafungura umupaka ariko si ko byagenze. Kuri we hari igitutu ku ruhande rw’ubukungu nubwo n’abanyarwanda bawukeneye [Umupaka].”

Dr. Kimonyo asanga Uganda yaratunguwe n’uburyo u Rwanda rwitwaye ku bijyanye n’ifungwa ry’umupaka, itangira gufata ibyemezo bitandukanye.

Ati “Ikibazo gitangira Uganda yaravuze ngo u Rwanda ruze rupfukame ariko ibyo ntibyashobotse. Ntabwo Museveni yakuyeho pasiporo ya Charlotte Mukankusi, [ushinzwe dipolomasi mu mutwe w’iterabwoba wa RNC, washinzwe na Kayumba Nyamwasa], ntabwo ari ku busa batangiye kurekura bamwe mu bo bafunze. Ndatekereza ko azakora ibyo asabwa niba bikenewe ko umupaka ufungurwa nkuko yabivuze.”

Hashize imyaka itatu hari ubwumvikane buke hagati y’ibihugu byombi, u Rwanda rushinja Uganda gukorana no gukingira ikibaba ibikorwa by’imitwe igamije kuruhungabanyiriza umutekano, birimo iby’imitwe ya RNC, FDLR, RUD Urunana n’indi. Hari gufata no gufunga abanyarwanda mu buryo bunyuranyije n’amategeko bagakorerwa iyicarubozo ndetse no kubangamira ubucuruzi bwarwo.

Intambwe imaze guterwa mu kuzahura umubano hagati y’ibihugu byombi, irimo kurekura abaturage bari bafunzwe kuri buri ruhande, no gusinya amasezerano yo guhererekanya abanyabyaha.

Ibyo u Rwanda rusaba Uganda

Kimwe mu byo u Rwanda rwari rwasabye mbere y’inama ya Kane y’i Gatuma cyo gutesha agaciro pasiporo yahawe Charlotte Mukankusi wo muri RNC ari nayo yakoreshaga mu ngendo ze, cyarubahirijwe.

U Rwanda kandi rwari rwasabye Uganda kohereza abantu bagize uruhare mu bitero byo mu Kinigi mu mwaka ushize, byahitanye abantu 14 abandi bagakomereka. Ku wa Gatatu hari babiri boherejwe, nubwo hari abandi bataroherezwa.

U Rwanda rukomeje gusaba Uganda gukurikirana ibikorwa n’ikusanywa ry’inkunga ihabwa imitwe yo guhungabanya u Rwanda, bikorwa n’abarimo Prossy Bonabaana, Sula Nuwamanya, Dr Rukundo Rugali, Emerithe Gahongayire na Emmanuel Mutarambirwa, byose bigashyigikirwa na RNC, binyuze mu muryango utari uwa leta Self-Worth Initiative.

Mu bandi rusaba kohererezwa bari muri RUD Urunana yagabye igitero mu Kinigi, uretse Sous Lieutenant Selemani Kabayija na Private Fidèle Nzabonimpa bagejejwe mu Rwanda, hari Mugwaneza Eric na Capt. Nshimiye uzwi nka Governor ari na we wayoboye igitero cyo mu Kinigi.

U Rwanda kandi rusaba Uganda gukurikirana abayobozi bakorana na RNC na RUD Urunana barimo Umunyamabanga wa Leta Philemon Mateke, Brig Gen Abel Kandiho uyobora CMI, Brig Gen Fred Karara, Col Sike Asiimwe, Major Fred Mushambo, Col Kaka Bagyenda n’abandi bayobozi bagira uruhare muri ibyo bikorwa.

Minisitiri Dr Biruta yavuze ko hari ubushake bwa politiki, ibibazo by'u Rwanda na Uganda byakemuka no mu Cyumweru kimwe
Umujyana wa Perezida Kagame, Dr Jean Paul Kimonyo yavuze ko Museveni ashobora kuzubahiriza ibyo yasabwe kubera igitutu ariho cyerekeye ubukungu bwa Uganda buri kuzahara

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .