Iyi nama izaba yiga ku ishoramari ry’abikorera mu Karere k’Ibiyaga Bigari.

Ubwo yageraga ku kibuga cy’indege cya Ndjili mu murwa mukuru Kinshasa, Minisitiri Murekezi yakiriwe na mugenzi we wa Congo, Augustin Matata Ponyo, ari naho yatangarije ko iyi nama ari umwanya ukomeye mu rwego rw’ishoramari hagamijwe gushimangira amahoro muri aka Karere.

Ibiro bya Minisitiri w’Intebe byatangaje ko Minisitiri w’Intebe Murekezi azitabira iyi nama izatangira ejo ku wa 24 ikarangira ku wa 25 Gashyantare.

Iyi nama y’i Kinshasa yemeranyijweho n’ibihugu bigize Inama Mpuzamahanga y’Akarere k’Ibiyaga Bigari (CIRGL), i Addis - Abeba muri Ethiopie, kuwa 24 Gashyantare 2012.

Ifite intego zo kugaragaza bimwe mu byagezweho mu bucuruzi no kwerekana amahirwe ari mu ishoramari muri aka Karere.

Hari kandi ukureba ibibazo by’umutekano bihari n’imbogamizi zigenda zivuka no kubaka imikoranire hagati y’inzego zinyuranye hagamije gushyiraho uburyo bubereye ubucuruzi.

Biteganyijwe ko izitabirwa n’abahagarariye ibigo bimaze gutera imbere, abaterankunga b’imishinga inyuranye, abayobozi ba za guverinoma zo mu Karere n’izindi nzego zinyuranye.

Minisitiri w'Intebe Anastase Murekezi