Yabigarutseho yifashishije urubuga rwe rwa X, ubwo yasubizaga ku butumwa bw’Umukuru w’Igihugu, Paul Kagame wari wamwifurije ishya n’ihirwe nyuma yo kongera gutorwa.

Perezida Kagame yari yagize ati “Ndashima mushiki wanjye, Minisitiri w’Intebe Mia Amor Mottley, ku bwo kongera gutorwa abikwiriye.”

Mottley yatsindiye kuba Minisitiri w’Intebe wa Barbados ku kigero cyo hejuru aho Ishyaka rye rya Barbados Labour Party, ryegukanye imyanya yose uko ari 30 mu matora rusange y’Inteko Ishinga Amategeko.

Yahise ashimira Perezida Kagame wamwifurije ihirwe mu mirimo ye, anizeza ko ibihugu byombi bizakomeza ubufatanye bugamije iterambere ry’abaturage babyo.

Ati “Musaza wanjye Paul Kagame urakoze kunyifuriza ibyiza n’ubucuti burambye. Barbados iha agaciro umubano wayo n’u Rwanda, kandi ndifuza gukomeza imikoranire yacu, dukorera mu kurinda agaciro kacu, amahirwe n’iterambere ry’abaturage bacu.”

My brother, @PaulKagame thank you for your warm wishes and steadfast friendship.

Barbados deeply values its bond with Rwanda, and I look forward to strengthening our cooperation as we work to secure dignity, opportunity, and prosperity for our people. https://t.co/h9oaYsSO26

— Mia Amor Mottley (@miaamormottley) February 14, 2026

Barbados ni ikirwa kiri mu karere ka Caraïbes. Ifite ubuso bwa kilometero kare 439. Ni igihugu cyateye imbere mu bukerarugendo kandi kizi kureshya abashoramari b’abanyamahanga.

U Rwanda na Barbados bifite umubano uhamye. Bifitanye amasezerano y’ubufatanye mu guteza imbere ingendo zo mu kirere, arebana no kuba sosiyete ya RwandAir yakorerayo ingendo.

Mu Ugushyingo 2022, Minisitiri w’Intebe Mia Amor Mottley, yafunguye ibiro by’uhagarariye inyungu za Barbados mu Rwanda.

Icyo gihe Minisitiri Mottley yari mu Rwanda mu ruzinduko rw’akazi. Ni uruzinduko rwari rukurikiye urwo Perezida Kagame yari yagiriye muri Barbados muri Mata uwo mwaka.

Icyo gihe ibihugu byombi byashyize umukono ku masezerano y’imikoranire ari mu ngeri zitandukanye zirimo siporo ndetse n’ibijyanye n’ingendo zo mu kirere.

Mottley wongeye gutorerwa kuba Minisitiri w’Intebe wa Barbados yashimiye Paul Kagame wamwifurije ishya n'ihirwe, yizeza ubufatanye n’u Rwanda