Iyi ntego ikubiye muri raporo ya mbere ya SPIRO ijyanye n’iterambere rirambye yamuritswe ku wa 21 Nyakanga 2026.
Ni yo raporo ya mbere isuzuma mu buryo bwuzuye ingaruka ibikorwa by’iki kigo bigira ku bidukikije, imibereho y’abaturage no ku bukungu.
Raporo ishyiraho amakuru-fatizo azafasha SPIRO gukurikirana no gupima intambwe izatera mu kugabanya imyuka ihumanya ikirere, uko ikomeza kwagura ibikorwa remezo by’ubwikorezi butangiza ibidukikije muri Afurika.
Bwa mbere SPIRO yakoze ibarura ryuzuye ry’imyuka ihumanya ituruka ku bikorwa byayo no mu ruhererekane rwose rw’ubucuruzi. Iryo barura rikubiyemo imyuka yo mu byiciro bya Scope 1, Scope 2 na Scope 3.
Scope 1 ni imyuka ituruka ku bikorwa n’ibikoresho bigenzurwa n’iki kigo mu buryo butaziguye. Scope 2 ijyanye n’imyuka ituruka ku ikorwa ry’amashanyarazi iki kigo kigura kikanayakoresha, na ho Scope 3 ikaba ikubiyemo indi myuka ituruka mu ruhererekane rw’ubucuruzi, nko ku batanga ibikoresho, ubwikorezi no ku ikoreshwa ry’ibicuruzwa.
SPIRO iteganya ko uko ikoreshwa ry’ibinyabiziga byayo rikomeza kwaguka, rizafasha kwirinda kohereza mu kirere toni zigera ku 700.000 z’imyuka yanduye (dioxyde de carbone) buri mwaka bitarenze 2030. Ibi bishingiye ku ruhare moto z’amashanyarazi zigira mu gusimbura izikoresha ibikomoka kuri peteroli.
Gagan Gupta washinze SPIRO akaba na Perezida wa Equitane, yavuze ko icyerekezo cy’iki kigo kitagarukira ku kwagura ikoranabuhanga gusa, ahubwo gikubiyemo no kubaka ibikorwa bizagira uruhare mu iterambere rirambye.
Yagize ati “Muri SPIRO, inshingano zacu si ukwagura ibishya gusa, ahubwo ni no gukora ku buryo gahunda twubaka zizakomeza kubungabunga ubukungu, imibereho y’abaturage n’ibidukikije mu gihe kizaza.”
Umuyobozi Mukuru wa SPIRO, Anant Badjatya, yavuze ko guharanira iterambere rirambye byashyizwe mu nkingi iki kigo gishyize imbere.
Yagize ati “Iyi raporo igaragaza intambwe SPIRO imaze gutera, atari mu bijyanye no kwaguka gusa, ahubwo no mu bushobozi bwo gupima no kunoza ingaruka z’ibikorwa byacu. Uko dukomeza kwagura ibikorwa muri Afurika, iterambere rirambye rizakomeza kuba mu nkingi y’ubucuruzi bwacu.”
Raporo igaragaza ko ingamba zo kunoza imikoreshereze y’ingufu zashyizwe mu bikorwa mu nganda za SPIRO ziteranyirizwamo ibinyabiziga zagabanyije ingufu zakoreshwaga ku kigero kiri hagati ya 15% na 25% mu mwaka ushize.
Iyi gahunda kandi yashinzwe na Imtinen Hamlaoui, ushinzwe kubahiriza amahame agamije kubungabuhanga ibidukikije, kubahiriza uburenganzira bw’abakozi n’abaturage no kugira imiyoborere myiza (Environmental, Social and Governance:ESG) n’iterambere rirambye muri SPIRO.
Yavuze ko gushyiraho aya makuru-fatizo bizafasha iki kigo gukurikirana iterambere ryacyo, gushyiraho intego zishobora gusuzumwa no kurushaho gukorera mu mucyo.
SPIRO ivuga ko ifite moto z’amashanyarazi zirenga 100.000 mu muhanda, sitasiyo zirenga 2.500 zihindurirwaho batiri kandi imaze guhindura bateri inshuro zirenga miliyoni 30.
Iki kigo kigamije gukomeza kwagura ubwikorezi buhendutse kandi bugira uruhare mu kugabanya imyuka ihumanya ikirere muri Afurika.
