Iri rushanwa ryabaye mu cyumweru cya mbere cya Ukuboza 2025, hashize igihe gito ishami rya Remera rifunguwe ku mugaragaro kuko ryafunguwe mu Ugushyingo 2025.
PAEO ni irushanwa mpuzamahanga rihuza abanyeshuri bo mu mashuri makuru baturutse mu bihugu bitandukanye bya Afurika, rigamije kubongerera ubumenyi mu by’ubukungu.
Ni irushanwa ryabereye mu nyubako nshya zigezweho z’iri shami rishya rya UoK riherereye i Remera mu Karere ka Gasabo.
Zirimo ibyumba by’amashuri bigezweho, laboratwari z’ikoranabuhanga n’ahagenewe kwigira mu matsinda, ibintu byafashije abari bahatanye kwitwara neza mu irushanwa.
Abanyeshuri bahatanye mu masomo y’Ubukungu (Economic), ubumenyi mu by’imari (Financial Literacy) ndetse na ‘Business Case Challenge’.
U Rwanda rwitwaye neza mu byiciro by’ubukungu n’ubumenyi mu by’imari, mu gihe Alliance High School yo muri Kenya yegukanye Business Case Challenge, igaragaza ubuhanga n’ubushishozi mu guhanga ibisubizo mu bucuruzi.
Umuyobozi Mukuru wa Kaminuza ya Kigali, Prof. George Kimathi, yagize ati “Ibi bikorwa bigaragaza icyerekezo cyacu cyo kubaka kaminuza ihangana ku rwego mpuzamahanga. Ibyumba byo kwigiramo, laboratwari za mudasobwa n’iz’ubushakashatsi, amacumbi y’abanyeshuri ndetse n’ahahariwe imyidagaduro byose byateguwe mu buryo bwo gutanga ubumenyi bwuzuye, bushishikaje kandi bufite ireme ku rwego rw’Isi.”
Umuyobozi Mukuru Wungirije wa UoK, Prof. Ogechi Adeola, yavuze ko iri rushanwa ari intambwe ikomeye mu gutegura urubyiruko rw’Afurika rufite ubushobozi bwo gutekereza ku bukungu no guhanga ibisubizo by’ahazaza.
Ati “Imishinga nka Pan-African Economics Olympiad irenze kuba amarushanwa; iteza imbere uburyo bw’imitekerereze, ishimangira ubufatanye burenga imipaka, kandi igategura abahanga mu bukungu, abashoramari n’abayobozi bajyanye na gahunda igihugu gifite.”
Umuyobozi Wungirije muri Ambasade ya Kenya mu Rwanda, Nasser Okoth, yashimye uburyo Kaminuza ya Kigali yateguye iri rushanwa, avuga ko byerekana ubumwe, ubuhanga n’ubudasa bwa Afurika.
Kaminuza ya Kigali yatangiye gukora mu 2013, ubu ifite ishami riherereye mu Mujyi wa Musanze, Kacyiru na Remera ari na ryo iherutse gufungura vuba. Itanga amasomo y’icyiciro cya kabiri cya kaminuza n’icya gatatu.
Ubuyobozi bw’iyi Kaminuza bushimangira ko iri shami rya Remera rizaba igicumbi mu gutegura impano z’urubyiruko rwa Afurika no kongera ubushobozi bwo gutegura abanyeshuri bahatana ku rwego mpuzamahanga.
