Ku wa 9 Werurwe 2026, nibwo Polisi y’u Rwanda n’Ingabo z’u Rwanda (RDF) zatangije ibikorwa byo gufasha abaturage mu mibereho myiza y’iterambere, bigizwe n’imishinga itandukanye n’inkunga bizafasha abaturage mu iterambere.

Karere ka Kamonyi, Umurenge wa Rugarika, Akagari ka Masaka hatangiye kubakwa ibyumba by’amashuri 10 byitezweho kugabanya ubucucike bwari busanzwe burangwa muri iki kigo cya Kigese TSS na GS Masaka bituranye.

Muri uyu mushinga ufite agaciro ka miliyoni 498 Frw hazubakwamo ibyumba by’amashuri 10, icyumba cy’umukobwa, laboratwari, inyubako z’ubuyobozi n’ubwiherero.

Guverineri w’Intara y’Amajyepfo, Kayitesi Alice yashimye Ingabo na Polisi by’u Rwanda zashyizeho gahunda yo gufasha abaturage mu bikorwa bihindura imibereho myiza yabo.

Yagaragaje ko ibi byumba by’amashuri bigiye kubakwa bizakemura ikibazo cy’ubucucike mu mashuri muri aka gace cyane cyane ku Kigo cya Kigese TSS cyarangwagamo n’ibyumba bishaje.

Ati “Iri shuri ryari rifite ubucucike bukabije ndetse n’ibyumba byinshi bishaje ni yo mpamvu twishimira ko ibi bikorwa bije gukemura icyo kibazo. Niyo mpamvu Tubizeza uruhare rwacu mu izina ry’abaturage tuzatanga umuganda mu bikorwa byo kubaka ibi byumba by’amashuri.”

Minisitiri w’Ingabo, Juvenal Marizamunda yavuze ko ibyo bikorwa bigamije kuzamura ubufatanye n’abaturage ndetse ashimangira ko bijyana n’imikoranire n’ubwuzuzanye biranga inzego z’Ingabo na Polisi by’u Rwanda.

Ati “Ibi bikorwa bijyana n’imikoranire n’ubwuzuzanye biranga inzego z’Ingabo na Polisi by’u Rwanda mu nshingano zabo za buri munsi zo kurinda igihugu n’umutekano w’abagituye.”

Yakomeje avuga ko impamvu Ingabo z’Igihugu na Polisi y’u Rwanda bikora ibikorwa byo gufasha abaturage mu mibereho myiza n’iterambere ari ukubera ko umutekano uba ukwiriye kujyana n’iterambere.

Ati “Tuzi neza kandi twemera ko umutekano n’iterambere bijyana kubera ko nta mutekano nta terambere kandi byagora kubungabunga umutekano mu gihugu kidakemura ibibazo birebana n’imibereho myiza y’abaturage bacyo.”

Umubyeyi witwa Uwimpayidufashije yavuze ko yishimiye cyane iki gikorwa cyo kongererwa ibyumba kubera ko kizatuma abana babo biga neza.

Ati “Iki gikorwa cyo kongera ibyumba by’amashuri muri aka gace bigiye gufasha abana bacu kwiga neza ndetse banisanzuye bibafashe gutsinda neza mu ishuri.”

Mu ntangiriro za 2025, Minisiteri y’Uburezi, MINEDUC, yatangaje ko hakenewe ibyumba by’amashuri birenga ibihumbi 26 mu rwego rwo kugabanya ubucucike mu mashuri no gufasha abanyeshuri kwiga amasaha menshi.

Abapolisi bafatanya n'abaturage kubaka ibi byumba by'amashuri

Eng Emmy Ndangijimana asobanurira Minisitiri w'Ingabo, Marizamunda Juvenal uko umushinga wo kubaka ibi byumba by'amashuri uzashyirwa mu bikorwa

Ingabo z'igihugu nazo zafatanyije n'abaturage kubaka ibi byumba by'amashuri bigiye kubakwa ku ishuri rya Kigese TSS

Umuvugizi w'Ingabo z'u Rwanda, Brig Gen Ronald Rwivanga ashyira ibuye fatizo ahazubakwa ibyumba by'amashuri mu kigo cya Kigese TSS

Minisitiri w'Ingabo, Marizamunda Juvenal, Yagaragaje ko impamvu hategurwa ibikorwa byo guteza imbere abaturage ari ukubera ko umutekano n’iterambere biba bikwiriye kujyana

Guverineri w’Intara y’Amajyepfo, Kayitesi Alice yashimye Ingabo na Polisi by’u Rwanda zashyizeho gahunda yo gufasha abaturage mu bikorwa bihindura imibereho myiza yabo

Polisi yibukije abaturage ubutumwa bwa Gerayo Amahoro imaze igihe itangije

Inzego za Polisi y'Igihugu n'Ingabo z'u Rwanda zitabiriye iki gikorwa cyo gushyira ibuye ifatizo ahazubakwa ibyumba by'amashuri 10 mu Murenge wa Rugarika mu Karere ka Kamonyi

Amafoto: Habyarimana Raoul