Ni amahugurwa yatangijwe n’Umuyobozi Mukuru Ushinzwe Ubumwe n’Ubudaheranwa muri MINUBUMWE, Marie Alice Kayumba Uwera, ku wa 22 Ukwakira 2025, yitabirwa n’abagororwa 223 barimo abagore 50 n’abagabo 173.
Aya mahugurwa agamije gutegurira abo bagororwa kwisanga mu muryango nyarwanda no kubana neza n’abandi, kongera kuba Abanyarwanda bakunda Igihugu, babumbatira ubumwe n’ubudaheranwa bw’Abanyarwanda no kubarinda ibyaha n’isubiracyaha.
Marie Alice Kayumba Uwera, yasabye abagororwa kuzirinda kuba intandaro y’icyahungabanya Ubumwe n’Ubudaheranwa bw’Abanyarwanda, ahubwo bagaharanira gutanga umusanzu wabo mu gukomeza kubwubaka.
Yagize ati “Impanuro muzahererwa hano zizabafashe kwirinda kuba intandaro y’icyahungabanya ubumwe n’ubudaheranwa by’Abanyarwanda bibatoze gutanga umusanzu mu gukomeza kurwubaka, muzabane amahoro n‘abo muzasanga mu miryango mwubakira ku ihame ry’ubunyarwanda, murangwa n’ukuri no kwirinda isubiracyaha.”
Yashimangiye ko zizabafasha kumva neza uruhare rwabo mu kongera kubana neza n’abandi, kwirinda ivangura, amacakubiri n’ingengabitekerezo ya Jenoside, gusobanukirwa amateka y’Igihugu n’ibindi.
Komiseri Mukuru wungirije w’Urwego rw’Igihugu rushinzwe Igorora (RCS), DCG Rose Muhisoni, yavuze ko abo bagororwa mu igororero bigishirijwemo imyuga itandukanye abasaba kuzakoresha ubumenyi bahawe mu kubaka igihugu.
Ati “Uyu mwanya ni uwagaciro mwigishijwe imyuga itandukanye izababere impamba mutahana ndabasaba ko ibyo mwize bizabafasha mu buzima busanzwe no guteza imbere imibereho myiza.”
Yakomeje agira ati “Aho muzasanga iterambere rigeze muzafatire aho mufatanye n’abandi kubaka igihugu, muzamurane kandi mwitware neza aya mahirwe ntimuzayateshe agaciro.”
Muri Werurwe 2025, ni bwo Minisiteri y’Ubumwe bw’Abanyarwanda n’Inshingano Mboneragihugu (MINUBUMWE) ku bufatanye n’Urwego rw’u Rwanda rushinzwe Igorora (RCS) yatangiye guhugura abagororwa bahamwe n’ibyaha bya Jenoside yakorewe Abatutsi bashigaje igihe gito ngo barangize ibihano byabo.
Ubushakashatsi bwakozwe mu 2010 ku ruhare rwa Gacaca mu kunga Abanyarwanda, bwagaragaje ko 83% by’abemeye uruhare rwabo muri Jenoside yakorewe Abatutsi babisabiye imbabazi baniyemeza gutandukana burundu n’ingengabitekerezo yayo, na ho 85% by’abiciwe bahaye imbabazi ababiciye kuri ubu bakaba babanye neza.
Imibare y’Urwego rw’u Rwanda rushinzwe Igorora RCS, igaragaza ko abagororwa bari bafungiye ibyaha bya Jenoside bageraga ku bihumbi 120. Mu 2018 abari bakiri mu igororero bari 27,662.
Kuva mu 2018 kugeza 2023 hari hamaze gutaha abagera ku 8,857. Biteganyijwe ko kuva mu 2023/27 hazataha abagera 8,810.
