Yabigarutseho ku wa 19 Ugushyingo 2025, ubwo yari mu Nteko Ishinga Amategeko, ayigezaho raporo y’ibikorwa bya RGB ya 2024/2025 n’ibikorwa biteganyijwe umwaka utaha.
Uyu muyobozi yagaragaje ko muri uwo mwaka ushize, RGB yakoze ubugenzuzi bwihariye mu miryango ishingiye ku myemerere (insengero n’imisigiti) harebwa iyubahirizwa ry’amategeko n’ibijyanye n’imiyoborere.
Ni igenzura ryagaragaje ibibazo birimo inyigisho z’ubuyobe, ubushukanyi bugamije kwambura abantu ibyabo; kudakorera mu mucyo, uburiganya n’imicungire mibi y’umutungo; amakimbirane ashingiye ku buyobozi, inyubako zitubahirije ibiteganywa n’amategeko.
Iryo sesengura ryasize imiryango 21 yambuwe ubuzimagatozi bitewe n’impamvu zitandukanye mu gihe inyubako z’insengero n’imisigiti 13.770 byagenzuwe 9.171 muri zo zirafungwa kubera kutubahiriza ibiteganywa n’amategeko.
RGB yagiranye ibiganiro n’abahagarariye amadini n’amatorero byibanze ku ishyirwa mu bikorwa ry’amategeko n’amabwiriza no kunoza imikorere y’imiryango ishingiye ku myemerere. By’umwihariko, ibiganiro byibanze ku kurwanya ibibazo bigaragara mu miyoborere no mu nyubako zikoreshwa n’iyi miryango mu bikorwa byo gusenga.
Depite Ntezimana Jean Claude yagize ati “Amatorero agera ku 9000 twabonye ko yafungiwe mu bihe bishize. nifuje kumenya niba nyuma y’uko bagaragarijwe ibikenewe, ababa barafunguriwe kuko twabonye ko bafungiwe ariko sinibwira ko bose baba baratereye iyo, nibwira ko hari abujuje ibisabwa ku buryo baba baremerewe.”
Umuyobozi Mukuru wa RGB, Dr. Doris Uwicyeza Picard, yagaragaje ko ku bufatanye n’inzego z’ubuyobozi bw’iyo miryango hashyizweho uburyo bwo kubaha ubufasha kugira ngo buzuze ibisabwa.
Yerekanye ko hari nkeya zamaze gufungurirwa nyuma yo kuzuza ibisabwa, bakaba bamaze kubona ubusabe bw’imiryango 84 by’abujuje ibisabwa basaba gufungurirwa ariko 15 yasabwe gusubira inyuma bakuzuza neza ibyo basabwa mu gihe 68 ibyangombwa byayo bikiri kwigwaho.
Ati “Duteganya kubaha igisubizo vuba.”

Imikono 1000 isabwa mu gushinga idini yagarutsweho
Muri Werurwe 2025, RGB, yasohoye amabwiriza mashya agenga imiryango ishingiye ku myemerere mu Rwanda, ategeka ko umuryango mushya ushingiye ku myemerere ugiye kwandikwa ugomba gutanga miliyoni 2 Frw adasubizwa ya serivisi yo guhabwa ubuzima gatozi, kandi ugatanga n’urutonde rw’abantu 1000 bawushyigikiye mu karere ugiye gukoreramo.
Ubwo RGB yaganiraga n’abayobozi b’amadini kuri ayo mabwiriza mashya ku wa 22 Werurwe, benshi bagaragaje ko imikono 1000 ari nk’amananiza.
Icyo gihe Umuyobozi wa National Unity Fellowship, Jolly Murenzi, yagaragaje impungenge ku bashaka gukorera ibikorwa by’imiryango ishingiye ku myemerere mu Mujyi wa Kigali bazashaka gusinyisha imikono 1000 y’abaturage kuko uturere twose duhari tudafite ubuzima gatozi.
Ati “Iyi mikono 1000 ntabwo byoroshye kubona umunyarwanda akagusinyira kuko biragaragara ko iyi mikono atari iy’abayoboke bawe bo mu rusengero. Biragaragara ko ari ukureba niba ari mu Mujyi wa Kigali, kujya muri buri karere kose ariko imikono igihumbi ntabwo ari ikintu cyoroshye. Umunyarwanda kugira ngo umusinyire ntacyo umuhaye, mutaziranye, atakuzi, muzabidufashamo cyane kuko ngira ngo bigiye guteza ibindi bibazo.”
Ku wa 19 Ugushyingo 2025, Depite Ntezimana yongeye kubigarukaho, anagaragaje ko kuzuza imikono 1000 ku buryo kuri we abona ari nk’amananiza.
Ati “Ese idini cyangwa itorero ridafite abarisengeramo bangana batyo bivuze ko batasenga? Gusenga bisaba ko mwuzuza umubare 1000? No gushinga ishyaka ntabwo nkeka ko ari ko amategeko avuga, nkaba mbona mu byukuri iyi mibare iri hejuru, ari nk’amananiza bibaye ari ko bimeze byakwigwaho bakoroherezwa kuko sinibwira ko iyi mibare yoroshye. Kandi n’iyo yaboneka yaboneka ku bashoboye gutera imbere, kandi umuntu atera imbere yahereye hasi.”
Dr. Uwicyeza Picard yavuze ko ayo mabwiriza ajya gushyirwaho hashingiwe kuri bya bibazo byari byagaragaye mu madini n’amatorero kandi yashyizweho ngo abikemure.
Yakomeje agaragaza kandi ko habayeho kungurana ibitekerezo n’abahagarariye amadini n’amatorero na mbere y’uko ashyirwaho bityo ko ntawe byatunguye.
Yakomeje ati “Ibyo tugenda tubasaba rwose na bo barabizi, bazi n’impamvu. Nko kuri iyi mikono, hari hagiye hagaragara ikibazo cy’amadini yiyomora ku yandi, insengero zikiyomora, zikaza gukorera mu baturage zigateza urujijo kuko hari ababa bakeka ko itorero ritahindutse, bakaba bayobya ababagana.”
“Iyo mikono ni ukugira ngo abaturage bamenye ibikorwa byabo, abaje kuhakorera, n’abahari bamenye uko bameze. Ntabwo ari ukubananiza ni ukugira ngo dukuremo urwo rujijo, abantu batazajya bayobywa.”
Ibi kandi biri kugira uruhare rukomeye mu gushyira ku murongo imiryango ishingiye ku myemerere nk’aho mu mwaka wa 2024/2025, RGB yakiriye ubusabe bw’imiryango isaba ubuzima gatozi 49 buhabwa itatu gusa mu gihe 23 yasabye icyangombwa cyo guhuza n’itegeko umwe gusa ari wo wagihawe.







Ibitekerezo 0