Zikomo Africa Awards imaze kubaka izina bitewe n’agaciro ikomeje guhesha umugabane binyuze mu gushimira abitwaye neza mu ngeri zitandukanye zirimo imyidagaduro, ubuzima, imideli, imikino n’ibindi.

Ibi bihembo bitegurwa na Zikomo Charitable Trust isanzwe ifite ibikorwa byinshi mu bihugu bitandukanye bya Afurika, birimo na Zambia. Ibihembo kuri iyi nshuro byatangiwe muri Tanzania.

Muri ibi bihembo byatanzwe, Massamba Intore yahawe igihembo cya ‘Best Zikomo Overall Excellence’, mu gihe Shumbusho Djasiri yatwaye igihembo cya ‘Best Zikomo Photographer (East Africa)’, ashimirwa uruhare rudasanzwe yagize mu guteza imbere umwuga wo gufotora no kugaragaza Afurika binyuze mu mafoto ayivugira.

Clapton Kibonge yegukanye igihembo cya ‘Best Zikomo African Actor (East & Southern Africa)’, n’aho Niyonsenga Joselyne wamamaye nka Jojo muri sinema Nyarwanda ahabwa Best ‘Zikomo African Actress (East Africa)’.

Mutesi Jolly yatwaye ibihembo bibiri birimo ‘Best Zikomo Humanitarian (East & Southern Africa)’ na ‘Best Zikomo Fashionable Celebrity’, ashimirwa ibikorwa bye by’ubugiraneza n’uruhare rwe mu myidagaduro n’imideli.

Mu bindi bihembo byatanzwe harimo ‘Best Zikomo Female Entrepreneur’ igihembo cyahawe Miss Uwimana Jeannette, ‘Best Zikomo Emerging Talent’ ihabwa DJ Zebra Queen, ‘Best Zikomo Fashion Model (East Africa)’ yegukanywe na Miss Yvonne Kabarokore uzwi ku mbuga nkoranyambaga nka Ïvy ndetse na ‘Best Zikomo Tech Startup’ yahawe Scripty Labs.

Shumbusho Djasiri yavuze ko yatangiye umwuga wo gufotora mu 2017, atangira gukorana na IGIHE mu 2021. Yagaragaje ko amaze gufotora ibikorwa bikomeye birimo CHOGM, Kwita Izina, FIFA, UCI, African CEO Forum n’ibindi byashyize izina rye ku rwego mpuzamahanga.

Yavuze ko ifoto yamuhesheje igihembo yafatiwe mu irushanwa rya UCI, igaragaza Perezida Paul Kagame, Perezida wa UCI David Lappartient n’Igikomangoma wa Monaco, Albert II, nyuma y’uko Tadej Pogačar yegukanye irushanwa ku mwanya wa mbere.

Yavuze ko nyuma yo kwegukana iki gihembo “Hahindutse byinshi mu bumenyi no mu mikoranire, n’abagenzi banjye dukorana umwuga umwe muri Afurika hose, n’uburyo gufotora byakwifashishwa ku rwego rw’isi. Byamfunguriye inzira nshya.”

Ku ruhande rwa Mutesi Jolly, si ubwa mbere atwaye igihembo muri Zikomo Africa Awards, kuko no mu 2023 yegukanye ‘Best Zikomo Motivation Speaker’, ashimirwa ijwi rye rifite ingaruka nziza ku rubyiruko n’abagore muri Afurika.

Umunyarwandakazi Gloria Bugie ukorera umuziki muri Uganda yatwaye igihembo cya ‘Best Zikomo Female Artist (East&Southern Africa)’, ‘Best Zikomo Male Artist’ aba Marioo wo muri Tanzania na ho icya ‘Best Zikomo Lifetime Achievement’ cyahawe Fally Ipupa wo muri RDC.