Minisitiri w'Ingengo y’Imari mu Bufaransa, David Amiel, yasobanuye ko iyi ntambwe igamije kwisubiza ububasha ku hazaza h’igihugu mu by'ikoranabuhanga no kwizera neza ko leta ifite ububasha bwuzuye ku makuru yayo bwite n'ibikorwaremezo by'ikoranabuhanga byayo.

Guhinduranya izi mbonezamikorere za mudasobwa bizatangirira mu kigo cy'u Bufaransa gishinzwe ikoranabuhanga kizwi nka DINUM. Iki cyemezo ni ikigize umushinga mugari w'u Burayi wo kwigenga mu by'ikoranabuhanga.

Imikorere itagaragaza umurongo uhamye ya leta ya Leta Zunze Ubumwe za Amerika by'umwihariko kuva ubuyobozi bushya bwajya ku butegetsi muri Mutarama 2025, biri mu byatumye u Bufaransa bufata iki cyemezo.

Abayobozi mu Burayi bahangayikishijwe n'uko Amerika ikoresha ubushobozi bwayo ku ikoranabuhanga n'ibihano nk'intwaro zayo.

Iyi si inshuro ya mbere u Bufaransa buretse gukoresha porogaramu za mudasobwa z'Abanyamerika.

Mu mezi make ashize, iki gihugu cyaretse gukoresha Microsoft Teams mu biganiro byo kuri video, gihitamo gukoresha ikoranabuhanga ryakorewe mu Bufaransa.

U Bufaransa bunateganya kwimura amakuru yabwo yo mu rwego rw’ubuzima bukayashyira ku rubuga rushya bitarenze impera z'uyu mwaka.

Linux yakozwe na Linus Torvalds wo muri Finland mu 1991.