U Rwanda rwihaye intego yo guhanga imirimo mishya ibihumbi 250 buri mwaka kuva mu 2024 kugeza mu 2029.
Raporo yashyizwe hanze ku wa 25 Werurwe 2026 ku bashomeri n’abakora mu Rwanda igaragaza ko mu 2025 imirimo yahanzwe idashingiye ku buhinzi irenga ibihumbi 238, yiganjemo ubucuruzi buranguza no kugurisha ikintu kimwe kimwe n’amagaraje akanika ibinyabiziga byihariye imirimo 101.665, bingana n’izamuka rya 16,6% kuri uru rwego rw’umurimo.
Ibijyanye n’amacumbi na ‘restaurant’ byahanze imirimo 32.950, ubwikorezi n’ububiko bw’ibintu byahanze imirimo 31.937, izindi serivisi zinyuranye zahanze imirimo 23.172, inganda zikora ibintu bitandukanye zahanze imirimo mishya 14.270, ibikorwa by’ubuyobozi no gutanga ubufasha byahanze imirimo mishya 9.868 mu gihe ubucukuzi bw’amabuye y’agaciro na kariyeri byahanze imirimo mishya 8.632.
Muri rusange abafite imyaka yo gukora mu Rwanda, ni ukuvuga hejuru ya 16 barenga miliyoni 8,5. Abari ku isoko ry’umurimo barenga miliyoni 5,4, mu gihe ababarwa ko batari ku isoko ry’umurimo barimo abanyeshuri, abageze mu zabukuru, abakora ubuhinzi bw’amaramuko, abafite ubumuga bukabije n’abacitse intege zo gukomeza gushaka akazi barenga miliyoni eshatu.
Imibare igaragaza ko ubushomeri mu 2025 bwagabanyutse bugera kuri 12,4% buvuye kuri 14,9% mu 2024.
Iki ni cyo gipimo cy’ubushomeri gito kibayeho mu myaka itanu ishize kuko mu 2021 bwari kuri 21,1%, bugera kuri 20,5% mu 2022, naho mu 2023 ubushomeri bwageze kuri 17,2%.
Mu 2025, abarenga 91% bari bafite akazi mu rwego rw’abikorera, mu gihe 5,4% ari abakozi ba Leta na ho 3,6% bakora mu ngo.
Umuyobozi Mukuru w’Uruganda Golden 250 Grams Ltd, Havugimana Papias yabwiye IGIHE ko kuva muri Mutarama 2025 uruganda rwabo rutangira, rukora ibicuruzwa bikoze mu binyampeke bizwi nk’Umushonge, kandi bafite intego yo gutanga akazi ku bantu benshi.
Ati “Twatangiye dukoresha abakozi bake, aho twatangiye dukoresha nk’abakozi batanu bahoraho abandi bagera muri 15 ba nyakabyizi ariko uyu munsi tumaze kwaguka ku buryo tugeze mu bakozi 20 bahoraho ndetse uruganda buri munsi rutanga akazi ku bantu bagera muri 70 harimo abahoraho na ba nyakabyizi kandi tukaba dufite intego yo gutanga akazi ku bantu benshi.”
Havugimana yavuze ko mu ntego bihaye ari ukugira uruganda rutanga ibisubizo ku bibazo by’ubukungu igihugu kigenda gihura na byo binyuze mu gutanga akazi ku bantu benshi.
Mu gihe cy’umwaka umwe hari ahantu harenga 550 hacururizwa ibicuruzwa byabo ku buryo na byo ari uburyo bumwe bwo guhanga akazi.
Nyirahabiyaremye Jeanne d’Arc wigisha mu mashuri yisumbuye yabwiye IGIHE ko mu 2025 yashinze ikigo cy’ubucuruzi cyitwa ‘Brighten Business Company Ltd’ atangira akora ibijyanye no gusuka no kogosha.
Ati “Mfite abakozi batatu bahoraho njye ntibariyemo kuko njye ndigisha…ubu sinshobora kugira ikibazo cy’amafaranga.”
Mu bafite akazi mu Rwanda, 64,8% ni abakozi bakorera abandi, 2,3% ni abakoresha mu gihe 28,3% ari abakozi bigenga badashingiye ku mukoresha umwe, 0,1% bakorera muri koperative.
