Ubuhinzi bukorwa n’Abanyarwanda 69%, bukavamo byinshi mu bitunga abo mu gihugu hose. Ku isoko rya Nyabugogo, GOICO i Musanze, i Rusizi na Huye n’ahandi hose bacuruza umusaruro wiganjemo ibyera mu Rwanda.
Raporo ya NISR yashyizwe hanze ku wa 31 Ukuboza 2025, yerekana uko umusaruro w’ubuhinzi wari wifashe mu 2025, igaragaza ko umusaruro w’ibishyimbo wageze kuri toni ibihumbi 230,4 mu gihembwe cy’ihinga cya A bigaragaza igabanyuka rya 1,2% ugereranyije n’igihembwe nk’iki cy’umwaka wari wabanje, naho mu cya B heze ibishyimbo bingana na toni ibihumbi 240,7, bigaragza igabanyuka rya 0,6% ugereranyije n’igihembwe nk’icyo mu 2024.
Mu gihembwe cy’ihinga 2025 C, ubuhinzi bukorwa mu mpeshyi, ibishyimbo byezemo ni toni 3.178, bigaragaza izamuka rya 4% ugereranyije n’igihembwe nk’icyo mu mwaka wari wabanje.
Nubwo umusaruro w’ibishyimbo utiyongereye, abahinze ibirayi mu bihembwe by’ihinga byose bya 2025 barahiriwe. Mu gihembwe cya A Umusaruro wageze kuri toni ibihumbi 475,7, naho muri B ugera kuri toni ibihimbi 314 mu gihe mu gihembwe cy’ihinga C habonetse umusaruro ungana na toni ibihumbi 94,8.
Imibare igaragaza ko umusaruro w’ibirayi wiyongereyeho 17% mu bihembwe byose bya 2025, ugereranyije na 2024.
Umusaruro w’ibijumba na wo uri mu byagabanyutse mu 2025. Mu gihembwe cya A wari toni ibihumbi 656, mu gihembwe cy’ihinga B ugera kuri toni ibihumbi 652, mu gihe muri C heze ibijumba bingana na toni ibihumbi 41,2.
Umusaruro w’ibigori na wo waragabanyutse, kuko wageze kuri toni ibihumbi 481,2 mu gihembwe cya A bigaragaza igabanyuka rya 5,3% ugereranyije n’igihembwe nk’icyo mu 2024, na ho mu cya B uba toni ibihumbi 117, na bwo ugabanyukaho 1,2% ugereranyije n’igihembwe nk’icyo mu mwaka wari wabanje.
Umusaruro w’urutoki mu 2025 wazamutseho 1,3%, kuko mu gihembwe cy’ihinga cya A hasaruwe toni 1,2, mu gihembwe cya B haboneka toni miliyoni 1,1.
Umuceri wo wageze kuri toni ibihumbi 69,6 mu gihembwe cy’ihinga cya A, mu cya B hera toni ibihumbi 72,9, bingana n’izamuka rya 0,8% na 0,2% mu bihembwe byombi.
Kuri ubu ibishyimbo i Nyabugogo bigura hagati ya 800 Frw na 1500 Frw bitewe n’ubwoko bwabyo, ikilo cy’igitoki ni 600 Frw, ikilo cy’ibirayi bizwi nka kinigi ni 700 Frw.
Bugesera iri mu turere twabonye umusaruro mwiza
Mu bice byanditse izina ku byerekeye amapfa mu bihe byashize, Akarere ka Bugesera kari imbere ariko ubu byarahindutse.
Raporo igaragaza uko ubuhinzi bwifashe mu 2025 igaragaza ko mu turere twejeje kurusha utundi ibishyimbo, umuceri n’imyumbati harimo uturere twa Bugesera, Gisagara na Rusizi.
Umuyobozi w’Akarere ka Bugesera, Mutabazi Richard, mu mpera za 2024 yabwiye IGIHE ko hashyizwe imbaraga mu gutera ibiti bituma imvura yongera kuboneka.
Ati “Izo mbaraga zakoreshejwe mu kongera gutera ibiti zatumye n’ubundi ibihe bimera neza, imvura yongera kuboneka.”
Umuyobozi wa Exodus farm Ltd ikorera ubuhinzi mu Karere ka Bugesera, Niyodushima Dieudonnée, yabwiye IGIHE ko haramutse habyajwe umusaruro ibiyaga icyenda biri muri aka karere, gashobora no kuba ikigega kigaburira u Rwanda.
Ati “Muri rusange ubutaka bwa Bugesera burera, ariko ntibwera ibihembwe byose. Iyo imvura yabonetse Bugesera irera, gusa iboneka ibihembwe bike ugereranije n’igihe Izuba rimara. Aka karere gafite ibiyaga icyenda ubwabyo bibashije kubyazwa umusaruro mu bikorwa byo kuhira bigafatirwa kuri ibyo biyaga n’igihugu cyose twagihaza ku myaka nk’ibishyimbo n’ibigoli.”
Magingo aya ibikorwa byo kuhira mu Rwanda bikorwa ku buso bwa hagitari zirenga ibihumbi 75 z’ubutaka, intego ikaba kugeza kuri hegitari ibihumbi 130 mu 2029.
Raporo igaragaza uko ibiciro byifashe ku isoko ry’u Rwanda yasohotse mu Ukuboza 2025, igaragaza ko ibiciro ku masoko mu Ugushyingo 2025 byiyongereyeho 7,2% ugereranyije n’Ugushyingo 2024.
Iri zamuka ryatewe ahanini n’ibiciro by’ibiribwa n’ibinyobwa bidasembuye byiyongereyeho 1,4%, ibiciro by’ibinyobwa bisembuye n’itabi byiyongereyeho 16,2%, ibiciro by’inzu, amazi, amashanyarazi, gazi n’ibindi bicanwa byiyongereyeho 7,7%.
Ibiciro by’ibijyanye n’ubuvuzi byiyongereyeho 70,9%, ibiciro by’ibijyanye n’ubwikorezi byiyongereyeho 9,3% n’ibiciro by’amafunguro n’icumbi byiyongereyeho 19,4%.
