I Rutsiro mu 2025 igiciro cya kawa y’ibitumbwe cyarazamutse kigera ku 900 Frw, mu gihe byari bigoye kurenga 600 Frw ku kilo.

Umuyobozi w'Ishami ry'Ubuhinzi n'Umutungo Kamere mu Karere ka Rutsiro, Ndayisenga Jean Baptiste mu kiganiro na IGIHE yavuze ko ayo abahinzi ba kawa binjije muri 2025 yazamutse cyane ugereranyije na 2024.

Ati “Mu 2025 kawa yinjirije abahinzi bayo b’i Rutsiro 7.601.768,100 Frw avuye kuri kawa y’ibitumbwe yakiriwe n’inganda ingana n’ibilo 8.446.409 aho impuzandengo y’igiciro ku kilo yari amafaranga 900 Frw.”

Yakomeje ati “Imibare yarazamutse kuko mu 2024 abahinzi bari bakiriye 5.120.000.000 Frw akomotse kuri kawa y’ibitumbwe yaguzwe n'inganda ingana n’ibilo 6.400.000. Impuzandengo y’igiciro ku kilo yari amafarnga 700 Frw.”

Akomeza avuga ko umusaruro wiyongereye biturutse ku mbaraga zagiye zishyirwa mu gufata neza no gukorera kawa, imibare ikazamuka mu bwinshi no mu bwiza.

Akarere ka Rutsiro kabarurwamo inganda zitunganya kawa 20. Biteganyijwe ko mu mwaka w’imihigo wa 2025/26 hazaterwa ibiti bya kawa bishya ibihumbi 195.

Bizaterwa mu mirenge ya Gihango, Mushubati na Mukura, mu kongera umusaruro w’iyoherezwa mu mahanga.