Ni umuhango wabaye ku wa Gatanu, tariki ya 12 Ukuboza 2025, ku cyicaro cya ULK ku Gisozi.
Abasoje amasomo y’Icyiciro cya Gatatu cya Kaminuza (Masters) ni 266, abasoje ay’Icyiciro cya Kabiri (Bachelors) ni 913 mu gihe abasoje amasomo y’imyuga n’ubumenyingiro ari 376.
Abahawe impamyabumenyi bari mu mashami arimo Uburezi, Ikoranabuhanga, Ibaruramari, Amategeko, Ububanyi n’Amahanga, Software Engineering, Ubumenyi rusange, ibijyanye na Internet n’andi mashami.
Umuyobozi wa ULK Polytechnic Institute, Ishami rya ULK ryigisha ubumenyingiro, Eng. Musabyimana Jean Pierre, yashimiye abasoje amasomo, abasaba kurangwa n’indangagaciro zambika isura nziza iyi Kaminuza.
Ati "Mugende mutubere ba ambasaderi beza, murangwa n’indangagaciro mukuye muri ULK, muzazikoreshe mwiteza imbere ndetse muteza imbere n’igihugu."
Umuyobozi w’icyubahiro wanashinze Kaminuza ya ULK, Prof. Rwigamba Balinda, yavuze ko bishimira umusaruro ugaragarira mu banyeshuri barangiza buri mwaka ndetse ko ari ikimenyetso cy’uko iyi kaminuza ikora ibishoboka byose kugira ngo ireme ry’uburezi rikomeze gutera imbere.
Ati "Ndabashimira cyane ubufatanye, umurava, gukorera hamwe, urukundo n’imyitwarire mwagaragaje mu masomo yanyu. Muzabe abayobozi beza, abashoramari n’ibisubizo bizagira impinduka nziza mu baturage. Mugende mushyire mu bikorwa impamba mukuye aha.”
Intumwa ya Minisiteri y’Uburezi, Dr. Ndikubwimana Théoneste, yashimiye abarangije kaminuza n’abagize uruhare kugira ngo bigerweho, by’umwihariko kugera ku ntego z’Inama y’Igihugu y’Ubumenyi n’Ikoranabuhanga, NCST.
Ati “Uyu ni umwanya wanyu kugira ngo mugaragaze ubumenyi mukuye muri ULK kuko urugendo rwanyu rutangiriye aha. Mukomeze mugere ku nzozi zanyu na leta izakomeza kubafasha kugera ku ntego zanyu.”
Ubuyobozi bwa ULK bufatanyije n’abafatanyabikorwa barimo Banki ya Kigali (BK), bahembye abanyeshuri bahize abandi ibihembo birimo mudasobwa, amafaranga n’ibindi.
