Bimwe mu byatangaje Abadage n’abandi bantu mu myiteguro ya Rwanda Day

Yanditswe na Karirima A. Ngarambe
Kuya 11 Ukwakira 2019 saa 09:12
Yasuwe :
0 0

Nk’uko bisanzwe aho Rwanda Day yabereye haba habaye i Rwanda nk’uko benshi babivuga bati “umujyi wafashwe”. Guhera tariki ya 2 Ukwakira 2019 nibwo jye ninjiye mu Mujyi wa Bonn kugira ngo nirebere n’amaso uko Abanyarwanda n’inshuti z’u Rwanda bagenda bagera i Bonn.

Nkigera muri uwo mujyi koko natangiye kubona hirya no hino benshi mu Banyarwanda baje gutegura aho bazakorera amamurika y’ibikorwa byabo, abandi baje gutegura ibiganiro bazatanga.

Ikintu cyantangaje cya mbere ni uko abaje kare bishyuye hoteli amafaranga adasanzwe, kuko uyu mujyi ibiciro byari byazamutse bitari ukubera Rwanda Day, ahubwo byatewe n’iminsi mikuru u Budage bwarimo yahuriranye na Rwanda Day noneho umujyi ugasurwa cyane. Icyo gihe iyo bigenze bityo niho amahoteli yungukira kuko bazamura ibiciro.

Abanyarwanda rero kubera gushaka kudatangwa ku munsi nyirizina ubahuza n’Umukuru w’Igihugu Paul Kagame n’abandi bayobozi bo mu nzego zitandukanye nkuru z’u Rwanda, igiciro nticyababereye inzitizi.

Iminsi yakurikiyeho ku itariki ya 3 ni ya 4 Ukwakira 2019, nagiye kubona mbona koko Bonn yinjiwe, Abanyarwanda hirya hino dore ko uyu mujyi atari munini kandi bose bakaba bari bayobowe ahaherereye amahoteli, atari kure cyane ya "World Conference Center Bonn" yakiriye Rwanda Day.

Ku mugoroba wa tariki ya 3 Ukwakira 2019 nibwo itsinda ry’abanyamakuru, abahanzi, abashoramari benshi bazanye na RwandAir bageze i Bruxelles, basanga inzego za ambasade zabashyiriyeho gahunda ihamye yo gukomeza bagana i Bonn, uwahageraga wese yabonaga umwakira.

Ubwo i Bonn amahoteli yabaye ihuriro riberamo igitaramo Nyarwanda, buri gace gataramira aho kari ku buryo washoboraga kumva mugenzi wawe aguhamagaye ati ’ngwino wacitswe’, ukamusubiza uti ’ariko aho ndi niho bimeze neza, na we ngwino’.

Tariki ya 3 Ukwakira urebye abantu benshi bari bamaze kuhagera ndetse n’abahagarariye u Rwanda mu bihugu by’u Burayi (ba ambasaderi) bari bahageze bose.

Tariki ya 4 Ukwakira nibwo ibikorwa byatangiriye ku imurika ry’ibigo bitandukanye bikorera mu Rwanda muri Hotel Hilton, abanyamakuru tujya kureba aho tuzakorera, tunasura bwa mbere iyo nyubako yakiriye Rwanda Day, dutangira no guhura na bamwe mu bayobozi bazatanga ibiganiro n’abahanzi bari mu myiteguro.

Ubwo twatashye kare tuyirara ku ibaba ngo umunsi nyirizina tuzabe turi mu byicaro nk’uko bigomba. Umunsi warageze koko ibi simbitindaho, twabibagejejeho uko bishoboka kose.

Abadage baratangaye biratinda!

Ibi byose navuze haruguru ntibishobora kubera mu gihugu kitarimo umutekano, abantu barenga ibihumbi bine ntibashobora kwinjira mu gihugu bitazwi cyangwa bitateguwe n’inzego zishinzwe umutekano w’igihugu bajemo nk’u Budage.

Abashinzwe umutekano mu Budage icya mbere navuga ni uko batigaragazaga cyane, bakoraga mu buryo butuje bucece ariko bahari.

Umwe mu Banyarwanda batuye mu Budage bumva ururimi rwaho neza, abapolisi bari iruhande rwe ahabera Rwanda Day baganira ariko bumva ko ari bonyine bavuga Ikidage, baravuze bati "Ariko aba Banyafurika, bakeye, batuje, bagendera kuri gahunda, bicungira umutekano ntibisanzwe."

Ku mugoroba wa tariki 5 Ukwakira nyuma gato tuvuye muri Rwanda Day, twataramiye ahantu muri Restaurant Bar iri i Bonn, noneho kubera ubwinshi bw’Abanyarwanda bari bahaje, uwatangaga icyo kunywa n’amafunguro, aza gusanga hari uwagiye yibagiwe kwishyura, niko yabyise.

Abari aho bose bati hari utishyuye? Undi ati ’cyane’, umugabo umwe asaba abari aho bose guceceka, afata ijambo ati ’watubwira icyo atishyuye’ arabara, aramubwira. Ati ’ni ibyo gusa?’ undi ati ’nibyo.’

Ati "mbere ya byose nagira ngo umbwire niba uzi aho duturuka" undi ati "ndahazi ni mu Rwanda." Ati "iryo zina uvuze nta cyasha rigira, turakwishyura byose nta Munyarwanda uzasiga ideni mu Budage."

Mu by’ukuri abantu bafite amaresitora bari bumiwe kuko ubusanzwe ni ahantu hinjira abantu babiri babiri bakabayobora aho bicara, niko bigenda muri bene izo resitora.

Bajyaga kubona bakabona resitora iruzuye noneho bagacanganyikirwa. Rwanda Day yarangiye babaza bati "ese Rwanda Day itaha ni ryari", kubera kwishimira icyashara n’amafaranga binjije.

Mu gusoza, navuga ko Rwanda Day ihuza Abanyarwanda n’inshuti z’u Rwanda ariko inateza imbere umujyi wayakiriye ku buryo buhebuje haba mu kuwamamaza, no mu bukungu.

Bamwe mu Banyarwanda batangiye gusaba niba Rwanda Day itagirwa iminsi ibiri aho kuba umwe.

Mu bateguraga Rwanda Day mu Budage twaganiriye n’abayobozi ba Ambasade y’u Rwanda mu Budage, barambwiye bati "twanejejwe cyane no kubona ukuntu Abanyarwanda igikorwa bakigize icyabo."

Bampa urugero bati "Turi mu nama hari abantu baje batunguranye, bageze ku Kibuga cy’indege i Cologne, ubwo twari mu nama twibaza uko twajya kubafata kuko ntibyari byiteguwe, bari na benshi. Ako kanya habonetse byihuse abajya kubafata barimo n’umugore wagombaga gukora ibilometero byinshi asubira aho atuye. Ariko aravuga ati ngomba kujya gufasha abandi kuzana bagenzi bacu bavuye mu Rwanda."

Kubivuga biroroshye ariko iyo urebye ubwo bwitange uko bukozwe mu gihe gito, biratangaje cyane.

Abagore bo mu Budage biyemeje kandi guha buri mugore wese uzaza muri Rwanda Day impano y’umwambaro nakwita urugoli, naho inshuti z’u Rwanda zo zahawe ingagi batwara ku mfunguzo nk’urwibutso rwa ’Visit Rwanda’.

Reka nsoze mvuga ko kugira ngo Abanyarwanda batandukane iyo bahuye byabaga ari ukwitabaza abashinzwe umutekano, kugira ngo aho bateraniye hafungwe, ari ibinyobwa cyangwa ibiribwa ntibyongere gutangwa.

Inyubako ya World Conference Center ni yo yabereyemo Rwanda Day yabaga ku nshuro ya 10
Abanyarwanda n'inshuti zabo basaga 3500 bateraniye mu Mujyi wa Bonn mu Budage muri Rwanda Day idasanzwe
Abitabiriye Rwanda Day i Bonn bari bafite akanyamuneza
Umunyamabanga wa Leta Uhoraho muri Minisiteri y’Ububanyi n’Amahanga, Urujeni Bakuramutsa, yabwiye Abanyarwanda baba hanze kugana ishami ribashinzwe mu gihe bafite ikibazo
Urubyiruko rwarazirikanwe muri Rwanda Day yabereye mu Budage
Perezida Kagame hamwe na Ambasaderi w’u Rwanda mu Budage, Igor Cesar na Visi Perezida w’Umuryango w’Abanyarwanda baba mu gace ka Bonn mu Budage, Omelie Impundu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza