Marie Grace Abayizera witwa Young Grace mu muziki yabonye izuba ku itariki 19 Nzeri 1993, avuka kuri Samson Turatsinze na Immaculee Yankurije. Uyu mukobwa w’urubavu ruto, ni imfura mu muryango w’abana batatu, akurikirwa na musaza we hagaheruka umukobwa.

Yinjiye mu muziki mu mpera za 2009. Yatangiriye ubuhanzi ku ndirimbo yitwa “Hip Hop Game” yatumye amenyekana cyane mu Mujyi wa Rubavu nyuma aza gukora n’izindi zatumye amenyekana ku rwego rw’igihugu zirimo “Uri Final;” “Mpa Umusada” ft Jay Polly; “Ikimenyane ft Lil G, Diana Teta; “Like a Boss;” “Sweet Poupou;” “Ataha he?” n’izindi za vuba.

Young Grace, umukobwa umaze kwitabira irushanwa rya Primus Guma Guma Superstar inshuro nyinshi, hari n’ibindi bihembo yagiye atwara birimo icya Best Teen Artist yahawe mu 2010 muri Salax Awards.