Ababyeyi barabe maso ’Isenene zaguye’

Yanditswe na Shaba
Kuya 26 Nyakanga 2014 saa 06:07
Yasuwe :
0 0

Kenshi na kenshi iyo ibiruhuko bitangiye bamwe mu banyeshuri biga mu mashuri yisumbuye barataha, ari ho hatangira kuvugwa imvugo nka "Isenene zaguye". Iyi mvugo itamenyerewe na benshi cyane cyane abakuze dore ko ikoreshwa n’abasore, aho baba bigamba uburyo bagiye kubona abakobwa bo gutereta kandi batagoye na busa, bakishimira ko bazabasambanya.
Mu gihe rero abana bageze mu rugo, iyi ni weekend ya mbere aho ibiruhuko bitangiriye dore ko abenshi batashye kuwa Gatanu tariki ya 25 Nyakanga, (...)

Kenshi na kenshi iyo ibiruhuko bitangiye bamwe mu banyeshuri biga mu mashuri yisumbuye barataha, ari ho hatangira kuvugwa imvugo nka "Isenene zaguye". Iyi mvugo itamenyerewe na benshi cyane cyane abakuze dore ko ikoreshwa n’abasore, aho baba bigamba uburyo bagiye kubona abakobwa bo gutereta kandi batagoye na busa, bakishimira ko bazabasambanya.

Mu gihe rero abana bageze mu rugo, iyi ni weekend ya mbere aho ibiruhuko bitangiriye dore ko abenshi batashye kuwa Gatanu tariki ya 25 Nyakanga, hakwiriye kubaho ingamba zihariye zo kubungabunga abana ngo haboneke imirimo cyangwa ibikorwa bituma babona ibibahuza. Bitabaye ibyo, ingaruka zo ntizizabura kubaho, kuko aho umwana ashobora gutwara inda y’indaro, cyangwa akandura indwara zandurira mu mibonanona mpuzabitsina.

Mu bihe bishize hakunze kuboneka bamwe mu banyeshuri basubiye ku mashuri batewe inda ndetse bamwe muri bo bakahandurira imico y’uburara nko kunywa ibiyobyabwenge n’itabi n’izindi ndwara zandurira mu busambanyi nk’imitezi, SIDA n’ibindi.

Abanyeshuri b’abakobwa bakunda gushukwa n’abahungu bitwara nk’abakunzi babo cyangwa abafite amafaranga baba bashaka kubashukisha iby’isi bitewe n’impamvu zitandukanye, zirimo ko abana baba babikeneye kandi nta bushobozi bafite bwo kubyiha. Abafite amafaranga n’ingeso mbi rero babigenderaho bakararura abo bakobwa; baba bakiri bato mu bitekerezo banafite amaraso ashyushye.

Mu gushuka abo bana b’abakobwa niho haviramo no kubahimbira ibinyoma babwira ababyeyi babo bimwe birimo no kubabeshya umunsi wo gutahiraho; aho kugira ngo batahe ngo bajye iwabo bakajya kurara kuri abo babashuka.

Ibyo abahungu n’abagabo bashukisha abanyeshuri b’abakobwa

Abasore n’abagabo kenshi na kenshi iyo bari gushuka abanyeshuri b’abakobwa biga baba ku ishuri, bakunda kubashukisha amafaranga ndetse n’ibindi bintu bazi ko iwabo batajya bapfa kubona cyangwa badakora ku buryo bababwira ko igihe batashye bajya mu biruhuko ari wo mwanya mwiza baba babonye wo gukora ibintu byinshi byiza.

Kenshi na kenshi bababwira ko ibyo byose batabasha gukorera iwabo cyangwa kubona bitewe n’ababyeyi babo, abo bahungu bo babafasha kubibona no kubikora. Ibyo bo bita kurya ubuzima birimo nko kunywa inzoga kuko benshi iwabo baba batazi ko bazinywa no gusohoka mu ijoro bajya mu tubyiniro (Boite de nuit) no kubasohokana ahantu hatandukanye.

Ibindi bintu babashukisha birimo ibihenze nka telefoni na iPad, kuko ababyeyi benshi baba badashobora kwemerera abana babo kubitunga batarakura kuko bikunze kubarangaza. Ibi biza byiyongera ku bindi bikoresho bihenze cyangwa bikurura abana bato ndetse n’ibindi bikoresho by’ishuli ku badashobora kubona ibihagije cyangwa se iby’inyongera.

Ikindi ni uko kuba ibi biruhuko bihuriranye n’imurikagurisha rya 2014 hari bamwe mu banyeshuri bashobora kubeshya ababyeyi babo ko bazataha ku cyumweru kugira ngo babone uburyo bayijyamo n’abakunzi babo mbere y’uwo munsi.

Gusa n’ubwo usanga havugwa ko abana b’abakobwa ari bo bashukwa cyane, umuntu akaba atakwibagirwa n’uko hari abagore bakuru bazwiho gukundana n’abasore bakiri bato nabo baba bari kubasaba y’uko babasura mbere y’uko bataha babasura bakabamara urukumbuzi.

Abakobwa bafite ibinyoma babwira ababyeyi ngo babone uko barara mu gasozi

Aba bana b’abakobwa biga baba ku mashuri akenshi bakunze kubeshya ababyeyi babo batababwira iminsi nyayo bazatahiraho kugira ngo iwabo batamenya gahunda zabo cyangwa badakomeza kubakurikirana.

Urugero: Aba bagerageza kubabeshya ko wenda bazataha kuwa Gatandatu cyangwa ku Cyumweru kandi baba batashye kuwa Gatanu kugira ngo babonereho umwanya wo kuzabanza kunyura andi mayira no kurara mu tubyiniro binywera inzoga cyangwa se kwa za ngirwabakunzi ziboshya.

Ibisabwa ababyeyi kugira ngo abana babo b’abakobwa badakomeza gushukwa n’abasore

Birakwiriye ko ababyeyi bafite abana biga baba ku ishuri bakwiye kujya bamenya umunsi nyawo ibigo abana babo bigaho bizabarekurira kugira ngo bahamye ko abana baziye igihe koko; aha bashobora kubaza kuri telefone abayobozi b’ikigo byabo.
Ikindi n’uko bakwiye kumenya inshuti z’abana babo kugira ngo nihavuka ikibazo bamenye uwo banyuraho babakurikirana; kuganira n’abana babo ku buzima busanzwe, uburebana n’imibonano mpuzabitsina n’urukundo; kuganiriza abana babo ibirebana n’ibikoresho cyangwa ibindi birenze ku bikoresho by’ishuli n’iby’ubuzima busanzwe abo banyeshuri bashobora gukenera.

Aha nkaba nshaka kuvuga ko gukurikirana iby’ abo bana batunze kugira ngo nihagira ibyo babasangana batarabibaguriye bakurikirane aho babikuye.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza