Aho ubujurire bwa FERWAFA muri CAF ntibwaba ari amatakirangoyi?

Yanditswe na Shaba
Kuya 20 Kanama 2014 saa 12:10
Yasuwe :
0 0

Nyuma y’aho Ishyirahamwe ry’umupira w’Amaguru muri Afurika rihaye ibihano ikipe y’Umupira w’Amaguru y’u Rwanda birimo guhagarikwa mu irushanwa rya CAN, ishyirahamwe ry’Umupira w’Amaguru mu Rwanda ryatangaje ko ryiteguye kujuririra iki cyemezo. Ese hifashishijwe isesengura ryimbitse iki kibazo kimeze gute mu rwego rw’amategeko? Aho ubu bujurire bwaba bufite ishingiro?
Muri iki kibazo hagaragaramo ibyerekeye ubwenegihugu, ni yo mpamvu turi bubanze kureba neza icyo amategeko avuga ku kubona (...)

Nyuma y’aho Ishyirahamwe ry’umupira w’Amaguru muri Afurika rihaye ibihano ikipe y’Umupira w’Amaguru y’u Rwanda birimo guhagarikwa mu irushanwa rya CAN, ishyirahamwe ry’Umupira w’Amaguru mu Rwanda ryatangaje ko ryiteguye kujuririra iki cyemezo. Ese hifashishijwe isesengura ryimbitse iki kibazo kimeze gute mu rwego rw’amategeko? Aho ubu bujurire bwaba bufite ishingiro?

Muri iki kibazo hagaragaramo ibyerekeye ubwenegihugu, ni yo mpamvu turi bubanze kureba neza icyo amategeko avuga ku kubona ubwenegihugu uri umunyamahanga; hanavuzwemo ikibazo cy’imyirondoro ibiri itandukanye kandi ari iy’umukinnyi umwe bifatwa nk’impamvu ishobora gutuma igihugu gihanwa.

Ibyerekeye ubwenegihugu na pasiporo mu mategeko y’u Rwanda

Duhereye ku byerekeye itegeko rigenga ubwenegihugu mu Rwanda, bigaragara ko umunyamahanga ashobora kubona ubwenegihugu nyarwanda bishingiye ku gukomoka ku Munyarwanda, kuvukira mu Rwanda, ku ishyingirwa, kugirwa umwana cyangwa kugirwa Umunyarwanda (naturalization).

Ikibazo umuntu yakwibaza aha ni ukumenya niba uriya mukinnyi yaba yarabonye ubwenegihugu biciye muri imwe mu nzira zavuzwe haruguru. Kugira ngo ubwenegihugu buboneke hari ibiba bigomba gukorwa kandi ntibikorwa mu ibanga. Kimwe giteganywa n’amategeko ni uko ubwenegihugu kugira ngo butangwe bugomba gusabwa. Ibi bisobanuye ko umunyamahanga uhabwa ubwenegihugu ari uwabusabye ndetse hakaba n’inzira zateganyijwe binyuzwamo.

Kuri buri cyiciro cy’ubwenegihugu butangwa hari ibiteganywa bigomba kuba bigize dosiye. Dufashe urugero, ushaka ubwenegihugu bushingiye ku kugirwa Umunyarwanda (naturalisation) agomba kuba yujuje ibi bikurikira:

1° Kuba afite nibura imyaka cumi n’umunani (18) y’amavuko kandi igihe asabiye akaba aba mu Rwanda kuva nibura mu myaka itanu (5) ishize kandi ahaba mu buryo bwemewe n’amategeko. Igihe yamaze ari mu mahanga kubera impamvu z’akazi k’igihugu cyangwa yiga afite uruhushya rutaziguye cyangwa ruziguye rw’ubutegetsi bw’u Rwanda, na cyo kirabarwa mu gihe amaze mu Rwanda;

2° Kuba afite mu Rwanda ibikorwa birambye;

3° Kugira umuco wa gipfura no kuba atarakatiwe igihano cy’igifungo kingana cyangwa kiri hejuru y’amezi atandatu (6) kitigeze gisubikwa cyangwa hatarabaye ihanagurabusembwa;

4° Kuba aha agaciro umuco Nyarwanda no kuba akunze Igihugu;

5° Kuba atarigeze afatirwa icyemezo kitigeze gisubirwaho cyo kwirukanwa mu gihugu;

6° kuba atagaragarwaho ibimenyetso by’ingengabitekerezo ya jenoside;

7° kutaba umutwaro ku gihugu no ku bantu.

Iyo ibi byavuzwe haruguru byose byuzuye ushaka ubwenegihugu yandika abisaba nk’uko biteganyijwe mu ngingo ya 12 kugeza kuya 16 y’Iteka N°21/01 ryo kuwa 27/05/2009 rya Perezida rishyiraho uburyo Ubwenegihugu Nyarwanda busabwa n’uko butangwa.

Kimwe mu bintu bikomeye ni uko ingingo ya 28 y’iri teka iteganya ko Ubwenegihugu bwatanzwe bugira agaciro bumaze gutangazwa mu Igazeti ya Leta ya Repubulika y’u Rwanda. Ese ibi byigeze bikorwa kuri uyu mukinnyi? Ese hari igazeti ya Leta yaba igaragaramo ubwene gihugu bw’uyu mukinnyi? Ibi byose ni ibibazo bikeneye ibisubizo kugira ngo hamenyekane niba ubwenegihugu afite bwaba bwarabonetse mu nzira zikurikije amategeko.

Tuvuye ku by’ubwenegihugu twareba kubyerekeye impapuro z’inzira zitangwa n’u Rwanda. Uyu mukinnyi bivugwa ko yahawe Pasiporo y’u Rwanda. Itegeko No 04/2011 ryo kuwa 21/03/2011 ryerekeye abinjira n’abasohoka mu Rwanda riteganya ko pasiporo zibamo ibyiciro bitatu bisobanuwe ku buryo bukurikira:

1. Pasiporo isanzwe ihabwa Umunyarwanda wese wujuje ibisabwa;

2. Pasiporo y’akazi ihabwa Umunyarwanda cyangwa umunyamahanga ugiye hanze y’u Rwanda mu kazi k’Igihugu

3. Pasiporo y’abanyacyubahiro ihabwa abanyacyubahiro cyangwa abahagarariye u Rwanda mu mahanga n’abandi bagenwa n’Iteka rya Minisitiri.

Nk’uko bigaragara, kugirango umuntu ahabwe pasiporo y’u Rwanda isanzwe ni ngombwa ko aba ari Umunyarwanda. Ibi bivuze ko kugira ngo uyu mukinnyi wateje ikibazo agire uburenganzira kuri pasiporo isanzwe yagombaga kubona ubwenegihugu bw’u Rwanda binyuze mu nzira twagarutseho haruguru.

Ibi bibaye bitarakozwe rero haba harimo ikibazo cyo gutanga pasiporo mu buryo bunyuranyije n’amategeko y’u Rwanda. Ku rundi ruhande kandi aramutse yarahawe pasiporo y’akazi kuko umunyamahanga ayemerewe nabwo byaba ari ikibazo kuko nk’uko turi bubibone hasi ntabwo pasiporo y’akazi yakoreshwa mu kwemerwa kuba umukinnyi w’igihugu hakurikijwe amategeko ya CAF na FIFA.

Mu gusoza iyi ngingo tukaba twavuga ko inzego zose ziba zigomba kubahiriza amategeko mu gutanga ubwenegihugu n’impapuro zijyana nabwo. Bityo mu rwego rwo kwirinda ikibazo cyose hakazajya hakurikizwa amategeko ariho mu gihugu.

Incamake y’impamvu zatumye u Rwanda rufatirwa ibihano…

Ishyirahamwe ry’umupira w’amaguru muri Congo Brazzaville ryatanze ikirego rivuga ko u Rwanda rwakinishije umukinnyi utemerewe kurukinira kuko akinira muri Congo Kinshasa ku wundi mwirondoro utandukanye n’uwo yahamagaweho mu ikipe y’igihugu y’u Rwanda.

Ishyirahamwe ry’umupira w’amaguru muri Afurika rikimara kubona iki kibazo ryatangije iperereza hakwa amakuru mu mashyirahamwe y’umupira w’amaguru mu Rwanda, Congo Kinshasa na Congo Brazaville. Muri iryo perereza hari hagamijwe kureba niba kuba uyu mukinnyi afite imyirondoro ibiri itandukanye bitafatwa nk’amanyanga cyangwa se niba atari ko biri (double identité frauduleuse ou non).

Nk’uko bigaragara mu mwanzuro mu ibaruwa yo kuwa 19 Kamena 2014, FERWAFA yagaragaje ko Dady BIRORI yatangiye gukinira u Rwanda muri 2009 afite ubwenegihugu Nyarwanda ndetse hanerekanwa pasiporo Nyarwanda igaragaza ko yavutse kuwa 12 Ukuboza 1986. Mu ibazwa rye kandi Dady BIRORI yemeje ko yasabwe gufata ubwenegihugu bw’u Rwanda ndetse no gufata izina rinyarwanda ku mpamvu z’umutekano (pour raison de sécurité).

Mu ibaruwa yo kuwa 07 Kanama 2014 isubiza ku byerekeye imyirondoro ibiri itandukanye, FERWAFA yagaragaje ko Dady afite umwirondoro umwe watanzwe nayo ko ibyerekeye undi mwirondoro yabimenye ibimenyeshejwe na CAF ubwo havukaga iki kibazo. Mu gufata umwanzuro, komisiyo yerekanye ko hagati y’umwaka wa 2011 na 2013 FERWAFA yagiye ihamagara uyu mukinnyi ku mazina ya Etekiama Agiti Tady bityo ikaba idashobora kuvuga ko itazi ko uyu mukinnyi afite undi mwirondoro.

Tudasubiyemo imyanzuro yafashwe uko yakabaye reka tuvuge gusa ko u Rwanda rwakuwe mu irushanwa rya CAN. Ikindi cyasabwe ni uko abarebwa n’ikibazo bose basabwe gutunganya ibidatunganye ku mparakubiri mu myirondoro y’umukinnyi Dady Birori cyangwa Etekiema Agiti Tady.

Isesengura ry’amategeko yashingiweho n’andi mategeko bifitanye isano…

Mbere y’uko tureba ku ngingo z’amategeko nyir’izina yifashishijwe mu mwanzuro wa komisiyo ni ngombwa ko tunareba ku byo amategeko ya CAF na FIFA avuga ku bwenegihugu bw’abakinnyi.

Ingingo ya 32 y’amategeko agenga irushanwa rya CAN ivuga ko buri shyirahamwe ry’umupira w’amaguru ritoranya ikipe irihagararira mu benegihugu kandi hanakurikijwe amategeko ya FIFA.

Abenegihugu bakaba ari abafite ubwenegihugu. Nko ku Rwanda ni ukuvuga ko umuntu ujya mu ikipe y’igihugu ari Umunyarwanda ufite ubwenegihugu bw’inkomoko cyangwa umunyamahanga wabuhawe mu buryo bukurikije amategeko y’ u Rwanda.

Ingingo ya 5 y’amabwiriza agena ishyirwa mu bikorwa ry’amategeko-ngenga ya FIFA ishyiraho ihame ry’uko umukinnyi ufite ubwenegihugu buhoraho ashobora guhamagarwa mu ikipe ihagararira icyo gihugu. Muri iyi ngingo birumvikana ko ubwenegihugu bugarukwaho. Ibi byumvikanisha ko nta wahabwa ubwenegihugu gito hagamijwe kugira ngo ahagararire igihugu mu marushanwa gusa, mbese bukaba ari ubwenegihugu bw’imikino mu yandi magambo.

Ingingo ya 41 y’amategeko agenga irushanwa rya CAN iri mu zashingiweho hafatwa umwanzuro iteganya ko ikipe yose ikoze amanyanga (fraude) ku myirondo y’umukinnyi ihanishwa gukurwa mu irushanwa. Kuba rero u Rwanda rwarahaye umukinnyi pasiporo nyuma bikaza kugaragara ko uwo mukinnyi akinira mu kindi gihugu ku wundi mwirondoro, kuba kandi FERWAFA yarahamagaye uwo mukinnyi mu ikipe y’igihugu ku myirondoro ibiri itandukanye ibyo byafashwe nka fraude. U Rwanda rwavuze ko rutari ruzi undi mwirondoro wa kabiri w’uyu mukinnyi ariko komisiyo yagaragaje ko atari byo kuko hari ibaruwa igaragaza uwo mwirondoro yanditswe na FERWAFA ubwayo.

Kujurira ni uburenganzira…

Gutanga ubujurire ni uburenganzira. Ariko biba byiza iyo hasesenguwe impamvu z’ubujurire hakanarebwa niba hari amahirwe yo gutsinda. Gutanga ubujurire ubwabyo bitwara amafaranga, gutsindwa byo bigatuma uwatanze ubujurire acibwa menshi. Niyo mpamvu ari ngombwa cyane kureba impande zombi cyane cyane hitabwa ku kureba niba u Rwanda ruzabasha kugaragaza niba koko rutarigeze rumenya iby’iyi myirondoro itandukanye kandi y’umukinnyi umwe.

Nanone kandi burya iyo hatanzwe ubujurire ibintu bishobora guhinduka cyangwa bikaguma uko byari biri. Niyo mpamvu hagomba gutegerezwa ibizava mu mwanzuro uzafatwa ku bujurire niburamuka butanzwe.

NDAYISABA Daniel
Research Coordinator
ILPD)
E-mail: [email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza