Bimwe mu bibazo byagoye ibihugu mu rugamba rwo guhangana na Covid-19

Yanditswe na Dr. Gasana Sebastien
Kuya 5 Gicurasi 2020 saa 02:23
Yasuwe :
0 0

Kuva aho indwara ya Covid-19 igaragariye kandi igakwira mu bihugu binyuranye ku Isi, hagiye hafatwa ingamba zinyuranye mu buryo bwo kwirinda ko yafata abaturage benshi, dore ko nta muti cyangwa urukingo byemewe irabonerwa kugeza ubu. Gusa rero, muri iyo gahunda, ibihugu byagiye bihura n’ingorane zinyuranye, ahanini zinashingiye ku buryo ibyo bihugu bisanzwe bihagaze mu nzego zinyuranye z’imibereho yabyo.

N’ubwo bwose kugeza ubu ibihugu byose ku Isi bisa n’ibitarashegeshwe kimwe n’iyo ndwara yabaye icyorezo, ikiboneka ni uko muri rusange hari ingorane zinyuranye ibihugu byagiye bihura nazo mu ngamba byagiye bifata kugira ngo byirinde kandi bihangane n’iyo ndwara y’icyaduka. Muri izo ngorane kandi, mu bihugu bimwe na bimwe, hari izagiye zisa n’izitungura benshi, uhereye ku buryo babonaga cyangwa bafataga ibyo bihugu.

Ku ruhande rumwe twareba nk’ibihugu byateye imbere mu bukungu, cyane cyane iby’i Burayi cyangwa Amerika y’ Amajyaruguru, byagaragaje imyitwarire yabaye nk’iyatunguye benshi mu guhangana na Covid-19.

Nk’uko byagaragaye, ibyo bihugu byatinze gufata ingamba za ngombwa kandi indwara idasanzwe izwi yari imaze iminsi ivugwa cyane mu gihugu cy’ u Bushinwa (Chine), ndetse n’ibindi bihugu byo hafi yabwo, kandi n’igihe igereye muri ibyo bihugu byateye imbere cyane mu bukungu byagiye bifata ingamba ku buryo bwa nyamwigendaho, kandi hari inzego n’imiryango inyuranye isanzwe ibihuza mu gufata byinshi mu byemezo bigenderaho.

Ikindi umuntu atabura kuvuga ko cyatunguranye ni ukubona ukuntu ibyo bihugu byagiye bibura bimwe mu bikoresho by’ibanze (udupfukamunwa, ibyuma bifasha gutanga umwuka ku barwayi,…) nyamara ubundi ibyo bihugu bitabuze ubumenyi n’ubushobozi bwo kubigira.

Ibi bintu, kimwe n’indi myitwarire inyuranye, byagiye bitungurana muri iyi nkundura yo kurwanya icyorezo cya Covid-19, nta wabura gutekereza ko bizaba impamvu izatuma hari byinshi bishobora kuzahinduka mu mikorere n’imikoranire y’ibyo bihugu byateye imbere mu bukungu n’imibereho.

Ku rundi ruhande hari ibihugu bikiri mu nzira y’amajyambere, cyane cyane tuvuge nk’ibyo muri Afurika, byagiye bihura n’ibibazo mu gufata ingamba zo kwirinda cyangwa guhangana n’ikwirakwira rya Covid-19.

Mu gihe zimwe mu ngamba z’ibanze mu kwirinda zasabaga kugira isuku umuntu akaraba neza intoki no kwirinda kwegerana cyane n’abandi, ahenshi mu bihugu bitaratera imbere mu majyambere usanga nta mazi meza ahari (cyangwa ntaboneke buri gihe), ndetse kuri benshi mu baturage, kubona isabune n’ibindi byafasha mu kwisukura bikaba ingorabahizi.

Hari kandi n’imiturire itanoze, hamwe na hamwe mu mijyi yo mu bihugu bitaratera imbere, ku buryo usanga abantu baba ahantu hadakwiye kandi hato cyane ari benshi.

Indi ngorane, ndetse umuntu yavuga ko ari ingorabahizi ibihugu binyuranye byagiye bihura nayo ni ugusaba abantu kuguma mu ngo zabo kandi bari basanzwe batungwa ku munsi n’ibyo bakoreye uwo munsi nyine. Ibyo bivuze ko igihe batakoze bitaborohera kubona ikibatunga n’imiryango yabo, mu gihe baba ari ntacyo bashoboye kwizigamira mbere.

Muri make rero, n’ubwo bwose tutarondora ingorane zose ibihugu byagiye bihura nazo, gusa twasozereza kuri bimwe mu bikorwa by’ingenzi nka bitatu dusanga ibihugu bikiri mu nzira y’amajyambere, cyane cyane dutekereza Afurika, bikwiye guhita bishyiramo imbaraga nyinshi igihe bizaba bisohotse muri iki cyorezo cya Covid-19.

Icya mbere ni ukongera imbaraga n’ubushobozi mu buhinzi n’ubworozi kugira ngo buri gihugu kibe cyabasha kubona ibitunga abaturage bacyo bihagije kandi bagashobora no kubasha kuzigama ibyabatunga, byibuze mu gihe cy’amezi nk’atatu mu gihe nta biribwa byaba bishoboka gukurwa hanze ngo byinjire mu gihugu.

Ibi rero bivuze ko, uretse umusaruro ukomoka ku buhinzi n’ubworozi washobora gukoreshwa ako kanya, habaho n’uburyo bwo kubasha gutunganya neza no kubika ibyatunga abaturage muri icyo gihe haba habaye ibibazo nk’icyatejwe na Covid-19 cyatumye ubuhahirane hagati y’ibihugu busa n’ubuhagarara.

Icya kabiri ni ukwita ku miturire y’abaturage kugira ngo buri wese abe ahantu hatunganye kandi hafite isuku ihagije, cyane cyane bakabasha kubona buri gihe amazi meza. Ibi kandi ntibyasigana no kwegerezwa ibikorwa by’ubuvuzi bifite ibikoresho byose by’ibanze ndetse n’abavuzi bafite ubushobozi buhagije bwo kubitaho.

Icya gatatu ni ugutoza no gufasha abaturage kugira umuco wo kuzigama. Icyo buri muntu yaba yinjiza cyose, uko cyaba kingana kose ni ngombwa ko buri muntu mu batuye igihugu yumva ko agomba kubaho buri munsi, ariko kandi agahora azirikana ko hashobora kubaho n’ibibazo byatuma atabasha gusohoka mu nzu ngo abe yajya ku murimo umuha ikimutunga uwo munsi.

Iki cyorezo cya Covid-19 cyatumye buri wese abona ko byabaye ngombwa ko imirimo hafi ya yose ihagarara, ndetse abantu basabwa kudasohoka aho batuye. N’ubwo bwose mu bihugu bimwe na bimwe duhereye mu gihugu cyacu, abantu bafite ibibazo by’ibiribwa bagiye bahabwa ubufasha mu kubona ikibatunga, ariko twibuke ko ngo “ak’imuhana kaza imvura ihise’’.

Mu gusoza, twavuga ko n’ubwo bwose hari ingorane zinyuranye iki cyorezo cya Covid-19 cyateye hirya no hino mu bihugu binyuranye ku isi ariko kandi, abantu bahereye ku bibazo bahuye nabyo mu guhangana nacyo hari amasomo bagomba kuzakuramo, bityo bakaba bafata ingamba zazabafasha kuba batakongera gutungurwa, mu gihe cyose haba habaye ikindi cyorezo cyangwa ibindi byago byaza bitunguranye.

Muri uko guhora twiteguye rero, hakaba hari ingamba nyinshi kandi zinyuranye zigomba gufatwa, ariko muri izo tukaba twerekanye zimwe, muri nyinshi zikenewe tubona ko zaba mu za mbere zakwitabwaho.

Dr. Sebastien GASANA
Umwarimu wa Kaminuza n’Umushakashatsi


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .