IFOTO (Igice cya 4): Uburyo ifoto yabahuje kugeza ubwo urukundo rwabo rumenywe n’Isi

Yanditswe na

IGIHE

Kuya 30 Werurwe 2015 saa 07:59
Yasuwe :
0 0

Mu gice cya mbere cy’inkuru ndende “IFOTO” twabagejejeho uburyo Kalisa yahuye n’umwari utagira uko asa, uburyo yagize ikibazo akamuramiza ibiganza akamujyana kwa muganga. mu gice cya kabiri twabagejejeho uko abaganga basanze uwo mwari amerewe, mu gice cya gatatu murasangamo ibyakurikiyeho, mu gice cya kane murasangamo ibyakurikiyeho.

IGICE CYA KANE

Kalisa yahise ajyana n’umushoferi berekeza ku modoka. Bakigenda, hirya haturuka umusore wirukanka cyane yahagiye. Kubera ubwira uwo musore yari afite yahutaje Kalisa agwa nk’iriya, maze mu kwiramira ya kadere (cadre) irimo ifoto yari agifite mu ntoki irabarara igwa ku rundi ruhande, cyakora ku bw’amahirwe ntiyameneka.

Kalisa yahise abyuka n’umujinya mwinshi ajya gukurikira wa musore, na we aba yagarutse yisegura kuri Kalisa ko atabikoze abishaka ahubwo ari ibibazo bimwirukansa. Mu kumusaba imbabazi wa musore yanagiye kumutoragurira ya “cadre” hirya, Kalisa na we asigara yihanagura udutaka twamugiye mu ntoki.

Wa musore mu kuzana ya “cadre” yagarukanye isura yahindurije. N’ubukana bwinshi cyane yabajije Kalisa aho yakuye iyo foto. Kalisa ntacyo yamusubije, ahubwo yahise amushikuza ya foto, undi na we arayigundira amusaba kumusobanurira aho yakuye iyo foto. Uko kutumvikana kwarangiye bafatanye mu mashati bakizwa na wa mushoferi wahise atabara.

Kalisa n’umushoferi kuko batari bazi uwo musore aho aturutse n’icyo ashaka bamwatse ya foto, bahita binjira mu modoka baragenda, wa musore na we asigara agira ati “Sha n’ubwo uyijyanye bwose uzansobanurira aho wakuye iyo foto mu gihe nyirayo ndi kumuhiga nabuze n’aho ari.”

Kubera ko ibyo yabivugaga yisararanga cyane, abazamu barabyumvise baza kureba ibyo ari byo cyakora basanga imodoka imaze kugenda hasigaye wa musore gusa.

Bamubajije ibyangombwa n’icyo ashaka mu ivuriro mu masaha akuze gutyo, aho kubasubiza atangira kubuka inabi abasaba kumwereka aho umukobwa bamubwiye ko yazanywe n’imbangukiragutabara ari.

Abazamu bamusubije ko ari mu maboko y’abaganga, wa musore ashaka guhita akomeza mu ivuriro hagati, ariko abazamu bamubera ibamba bamubwira ko atemerewe kuvogera ibitaro ayo masaha, ndetse banamusaba kubereka ibyangombwa.

Yababwiye ko aje kureba umukunzi we uri mu bitaro ngo abanyerondo bamubwiyeko babonye imbangukiragutabara mu gace k’iwabo kandi yaje kuri ibyo bitaro.

Bamubwiye ko ayo atari amasaha yo gusura, nyamara we aranangira. Yanze kubyumva bamushyikiriza inkeragutabara zari hafi aho zirinze umutekano, ziramugumana kugeza mu gitondo ubwo zamujyanaga ku murenge aba acumbikiwe muri kasho mu gihe bari mu iperereza.

Kalisa yageze mu rugo yananiwe cyane ahita agwa agacuho wa murumuna we na we aramureka ngo aruhuke. Yicuye saa yine z’amanywa aho kuboneza ajya ku kazi ahita atega ipikipiki yerekeza iy’ibitaro. Yageze ku marembo y’ivuriro ahasanga abakobwa babiri atazi bari kumwe na wa mushoferi wamucyuye.

Wa mushoferi yamubwiye ko bari baje kumureba mu rugo byihutirwa ko […] (Biracyaza).

Ntuzacikwe n’igice cya gatanu cy’iyi nkuru umenye abo bakobwa ari bande n’icyo nari baje gushakira Kalisa.

Tubibutse ko buri gice cy’iyi nkuru ndende mukigezwaho buri wa mbere, buri wa gatatu na buri wa gatanu.

Nshimyimana Leonidas


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza