Imyaka 20 irashize “Operation Turquoise” yatabaye abajenosideri irangiye

Yanditswe na

Tom Ndahiro

Kuya 22 Kanama 2014 saa 03:44
Yasuwe :
0 0

Uyu mwaka u Rwanda rwibutse ku nshuro ya 20 jenoside yakorewe Abatutsi muri Mata 1994; hizihijwe kandi imyaka 20 ishize u Rwanda rubohowe. Birumvikana ko hibutswe byinshi bibi cyane byabaye ku nzirakarengane zishwe ndetse n’imibereho y’abacitse ku icumu rya jenoside. N’ihumure ry’uko kongera kubaho bishoboka, abajenosideri bamaze gutsindwa nabyo twarabyibutse kandi bizahora byibukwa.
Tariki ya 4 Nyakanga, Abanyarwanda bizihije gufatwa kw’imijyi ya Butare na Kigali, byibutsa kurunduka ku (...)

Uyu mwaka u Rwanda rwibutse ku nshuro ya 20 jenoside yakorewe Abatutsi muri Mata 1994; hizihijwe kandi imyaka 20 ishize u Rwanda rubohowe. Birumvikana ko hibutswe byinshi bibi cyane byabaye ku nzirakarengane zishwe ndetse n’imibereho y’abacitse ku icumu rya jenoside. N’ihumure ry’uko kongera kubaho bishoboka, abajenosideri bamaze gutsindwa nabyo twarabyibutse kandi bizahora byibukwa.

Tariki ya 4 Nyakanga, Abanyarwanda bizihije gufatwa kw’imijyi ya Butare na Kigali, byibutsa kurunduka ku mugaragaro kw’ingoma y’abicanyi, naho tariki ya 19 Nyakanga hizihizwa imyaka 20 leta imaze igiyeho kuko ku munsi nk’uwo mu 1994 ari bwo guverinoma yarahiye.

N’ubwo nta birori byabayeho ariko yari intambwe ikomeye yatewe kuko abajenosideri n’ababashyigikiye bateganyaga ko bazaba bari mu butegetsi hagati y’amezi 6 n’umwaka.

Kwibeshya bibaho kandi byababayeho. Icyo cyizere kiraza amasinde bagiterwaga na leta y’u Bufaransa yari yaragabye igitero bise “Operation Turquoise” cyo kugoboka iza Sindikubwabo na Kambanda.

Kurangira kwa Operation Turquoise

N’ubwo kuwa 19 Nyakanga 1994 Guverinoma y’u Rwanda nshya yarahiye, hari igice cy’igihugu itategekaga; aho ni ahari za Perefegitura za Cyangugu, Gikongoro na Kibuye zari mu butegetsi bw’Abafaransa n’abajenosideri, Operation Turquoise.

Nk’uko Leta y’u Bufaransa yabyitaga, “Operation Turquoise” ni igikorwa cy’ingabo z’u Bufaransa cyateguwe mu rwego rwo gushyiraho agace abantu bagizweho ingaruka n’intambara yo kubohora u Rwanda bafashirizwamo, ariko mu by’ukuri hari ikindi cyari kibyihishe inyuma.

Abasirikare b' Abafaransa mu Rwanda muri 1994

Ubwo butegetsi bukaba bwaratangiye kuva kuwa 22 Kamena kugeza kuwa 22 Kanama 1994.

Umunsi nk’uwa none mu 1994 nibwo Operation Turquoise, yarangiye abasirikare ba nyuma b’Abafaransa n’ab’ibihugu bimwe bya Afurika babashyigikiye bavuye mu Rwanda, basimburwa n’aba MINUAR II bari bagizwe ahanini n’abo muri Afurika.

Kuva ubwo nibwo umuntu yavuga ko Leta y’u Rwanda yabashaga kugera mu bice hafi ya byose.

Iyi Operation Turquoise yateje ibibazo byinshi bitewe no guha umwanya Interahamwe, kwisuganya no gukomeza guteza umutekano muke mu gihugu.

Kuwa 22 Nyakanga 1994, uwari Minisitiri w’Intebe, Faustin Twagiramungu yakiriye intumwa za Leta y’u Bufaransa zari zaje mu Rwanda.

Twagiramungu yabwiye abo Bafaransa ko inama ya guverinoma yari yafashe icyemezo ko abayobozi bazajya muri “Zone Turquoise” gushishikariza abaturage gusubira mu byabo, bamubwiye ko ngo abo bayobozi bagomba kujya basaba uruhushya abagize Operation Turquoise.

Gusuzugura u Rwanda

Twagiramungu yababwiye ko ngo ako gasuzuguro gakwiye kurangira vuba kuko bitabaye ibyo bizaba ngombwa ko imbaraga zikoreshwa ngo u Rwanda rusubirane uburenganzira n’ububasha ku gihugu cyose.

Faustin Twagiramungu yabwiye izo ntumwa z’Abafaransa ko bitumvikana uburyo leta yemewe mu gihugu kigenga yajya gusaba leta y’ahandi uburenganzira bwo gusura abaturage babo mu gihugu cyabo.

Twagiramungu yarababajije ngo “kuki mwumva ko Abanyarwanda bagomba kwizera abanyamahanga kurusha abayobozi babo?”

Abafaransa bari bamaze kubona ko ibyo guhanyanyaza bitazashoboka batangira kubwira abo batabaye guhunga. Kuwa 18 Nyakanga 1994, ikindi cyiciro cy’impunzi cyatangiye kwisuka muri Kivu y’amajyepfo, mu cyahoze ari Zaire. Icyo gihe abatuye ahahoze ari Cyangugu batangiye kwisenyera bakisamburira amazu ngo bavuye mu Rwanda ubutazagaruka.

Kuri uwo munsi ariko, uwari Umuvugizi wa Operation Turquoise, Lt. Col. Didier Bolelli yatangarije radiyo y’Abafaransa RFI ko hari abantu benshi bagana mu gice cy’Inkotanyi.

Col. Bolelli yavuze ko hari abantu barenga ibihumbi 45 bari bamaze kujya mu gice kiyoborwa na guverinoma banyuze ku rutare rwa Ndaba. Yerekanye kandi ko abantu biyongeraga ku buryo abagera ku 2000 banyuraga aho buri saha imwe.

Kugirango abo bantu bagende ni uko hari amakuru yabageragaho ko gukomeza kwizirika kubyarangiye nta kamaro cyane ko Umujyi wa Gisenyi wari wagiye mu maboko y’ingabo z’Inkotanyi.

Kuhava kw’Abafaransa na Operation Turquoise yabo byatumye u Rwanda rusa n’aho rusubiranye n’ubwo umutekano muke byateguye wabyaye ibirimo FDLR ibuza abatari bake gutaha kugeza ubu.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza