Inkuru ndende: Uburyo ifoto yabahuje kugeza ubwo urukundo rwabo rumenywe n’Isi

Yanditswe na

IGIHE

Kuya 18 Werurwe 2015 saa 08:06
Yasuwe :
0 0

Urukundo ni nk’umwana muto, rukenera byinshi byo kururera no kururyoshya ngo rukure maze ruhame! Muri byo hari ibyihariye kuri buri umwe hakaba n’ibihuriweho na benshi. Iyo bititondewe, ibyari ubuki bihinduka umuravumba! Muri iyi nkuru "Ifoto" murasangamo uburyo ifoto yangije urukundo rwa babiri kugeza ubwo umwe akatiwe n’Inkiko; ariko muranasangamo uburyo iyo foto yahuje ababiri kugeza ubwo urukundo rwabo rumenywe n’isi ndetse n’isanzure!

IGICE CYA MBERE

…Yarabyutse ajya mu ruganiriro, acana itara, yurira ameza yo kuriraho yari ari aho, amanura ifoto yari imanitse ku gikuta, ayifata hafi y’umutima we ubundi akingura umuryango w’inzu yerekeza ku muryango w’urupangu.

Ahageze yasanze urugi rufunze, gusa hirya gato hari ahantu hari harasenyutse bitari cyane ariko ku buryo umuntu yaseseramo.Niho yasohokeye agera mu muhanda, agenda yerekeza kuri Kiliziya y’abagaturika yari mu kadugudu hafi aho ahitwa I Kageyo (Gicumbi).

Kalisa umukozi wa Banki y’abaturage yo muri uwo murenge wari wakerejwe gutaha n’inama yari yatumiwemo nyuma y’amasaha y’akazi asanzwe, yarimo ahata inzira ibirenge ngo adasanga murumuna we wari wamusuye wasigaye mu rugo atagize irungu.

Yaje gutungurwa no kubona umwari utagira uko asa, mu gakanzu kagufi k’ijoro kamurikiwe n’icyezezi gike cy’imboneko z’ukwezi, ariho yerekeza mu nzira arimo.

Yibajije uwo mwari ugenda mu ijoro rinini (Doreko hari hamaze kuba hafi saa sita z’ijoro). Yahise yiyumvamo akoba kuko Ise ngo cyera yigeze kumubwira ko muri ako gace higeze kuba imyuka mibi (amashitani).

Mu kwihagararaho yavuze mu ijwi riremereye cyane ati: “Toka dayimoni mu izina rya Yezu”. Uko wa mukobwa yakomezaga mu nzira Kalisa arimo, niko yakanzwe n’icyo kijwi. Yashidukiye hejuru, kubera ubwoba no kudasobanukirwa ahita asa n’utaye ubwenge ajya kwikubita hasi aramirwa n’amaboko ya Kalisa wari umaze kumusatira, bityo ntiyagera hasi.

Muri uko kumufata mu maboko Kalisa yabonye ko adahumeka neza, ahita amuryamisha ku rundi ruhande rw’umuhanda, agerageza ku mwongerera umwuka (yari yarabihuguriwe mu mahugurwa y’u butabazi bw’ibanze), ariko biba iby’ubusa umukobwa agumya kugaragaza ibimenyetso by’uburembe. Kalisa yahise yitabaza kuri telefoni igendanwa umuganga wo ku bitaro bikuru bya Byumba bari baziranye ngo bohereze imbangukiragutabara ibafashe. Umuganga yamusezeranije kubikora bwangu, nabo bakora iyo bwabaga ngo batebuke.

Kubera undi murwayi abaganga bari bafite babanje kugeza ku bitaro bikuru, bahageze nyuma y’iminota mirongo itanu. Mu kuhagera basanze Kalisa yabuze icyo afata n’icyo areka kuko basanze uwo mwari ya… (Biracyaza).

Ntuzacikwe n’IGICE CYA KABIRI cy’iyi nkuru ngo umenye uko abaganga basanze uwo mwari amerewe n’ibyakurikiyeho.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza