Ko u Rwanda rufite umutoza mwiza, kuki atakomeza akarwinjiza muri 2020?

Yanditswe na Shaba
Kuya 17 Nyakanga 2014 saa 06:04
Yasuwe :
0 0

Abanyarwanda bishimira byinshi bagezeho mu myaka 20 ishize igihugu kibohowe, kurangwa n’ubushishozi bwo gukomeza muri uyu murongo ukomeza kubinjiza mu cyerekezo 2020 ndetse na nyuma y’aho mu rwego rwo gukomera ku byagezweho ni kimwe mu byagombye kubaranga, umutoza mwiza agakomeza akazi.
Mu mwaka wa 1994, miliyoni y’ Abatutsi yishwe na bamwe mu bahutu bari mu buyobozi bakagira uruhare mu kuyitegura ndetse n’abandi bigishijwe ingengabitekerezo, bakaza kuyishyira mu bikorwa.
Uretse miliyoni (...)

Abanyarwanda bishimira byinshi bagezeho mu myaka 20 ishize igihugu kibohowe, kurangwa n’ubushishozi bwo gukomeza muri uyu murongo ukomeza kubinjiza mu cyerekezo 2020 ndetse na nyuma y’aho mu rwego rwo gukomera ku byagezweho ni kimwe mu byagombye kubaranga, umutoza mwiza agakomeza akazi.

Mu mwaka wa 1994, miliyoni y’ Abatutsi yishwe na bamwe mu bahutu bari mu buyobozi bakagira uruhare mu kuyitegura ndetse n’abandi bigishijwe ingengabitekerezo, bakaza kuyishyira mu bikorwa.

Uretse miliyoni y’inzirakarengane zapfuye zizira uko zavutse, Jenoside yakorewe Abatutsi kandi yangije ibikorwa remezo, amafaranga asahurwa n’abategetsi, igihugu giera ku busa.

Guhera icyo gihe, Umuryango wa FPR Inkotanyi watangiye urugamba rwo gusubiza isura nziza u Rwanda; urugamba rutari rwososhye na busa nyuma y’urw’amasasu rwasigayemo amaraso ya benshi muri izo ntwari zarubohpye.

Ibikorwa remezo byari byarazambye ariko ku bw’ubushishozi bw’uyu muryango, igihugu cyatangiye kubakwa. Imihanda yari yarangiritse irasanwa hahangwa imishya ndetse n’iyari yarabaye ibigunda iratunganywa, amazi n’amashanyarazi bigera ku Banyarwanda benshi.

Umutekano w’u Rwanda warakajijwe, nyuma haba ibitero by’abacengezi ariko uru rugamba Ingabo z’Igihugu ziza kurutsinda zifatanyije n’Abanyarwanda bakunda igihugu cyabo.

Igihugu cyihaye intego, amashuri arubakwa, amavuriro ni uko, abanyeshuri basubira ku ishuri, abaturage baratunga baratunganirwa.

Mituweli yaje yunganira ibikorwa by’ubuzima byari byaragezweho hirya no hino, maze umubare w’Abanyarwanda bahitanwaga n’indwara uragabanuka ku buryo amahanga yayobewe ibanga rikoreshwa, ubuzima bw’umwana n’umubyeyi burasugira.

Amashuri yarubatswe, abanyeshuri bigira ubuntu, byose bivuye mu cyerecyezo nyacyo cy’umutoza mwiza uyoboye iyi kipe, ayiganisha mu cyerekezo 2020; abenshi bumva uyu mutoza yakomeza akazi ke, akabayobora bakinjira muri icyo cyerecyezo akibatoza nabo bamwizihiye nk’umubyeyi wujukuruje.

Kimwe mu byo baheraho, bareba u Rwanda aho rwari ruri mbere ya 1994, aho rwari mu icuraburindi.

Kugera I Kigali ku bavuye mu cyaro byari igitangaza. Ibiciro byari bihanitse n’imodoka ari mbarwa n’uzitwawemo yibeshywaho nk’utwawe nk’ibirayi cyangwa imyumbati.

Amavunja yavuzaga ubuhuha hirya no hino, umunyeshuri ujyanye inkweto kwiga bakamwita umwirasi rimwe na rimwe mwalimu akamusaba kutazigarura ngo adakomeza kwirata ku banyeshuri bagenzi be.

Kigali, Umurwa Mukuru w’u Rwanda warangwagamo inyubako zidahwanye n’izubatswe ubu haba mu burebure, ubwiza n’ubunini, byose birangajwe imbere n’umutoza w’ikirenga.

Ubwoko bwari indwara yasabitse Abanyarwanda kuko ari yo ndirimbo ubutegetsi bubu bwari bwarabatoje.

Abatutsi baza kuba ibitambo by’inabi n’ubugome byacengejwe n’abakoloni maze bamwe mu bayobozi b’u Rwanda rw’icyo gihe bakomeza kubicengeza mu bahutu bica Abatutsi bari basanzwe basangira akabisi n’agahiye.

Iterambere ryari ingume muri icyo gihe, ibaruwa niyo yifashishwaga mu gutumika, aho wasangaga ishobora kuva I Kigali ikagera I Kamembe hashize ukwezi, icyo yari igamije cyarabaye amateka.

Televiziyo yabarizwaga mu bakire, abenshi mu Banyarwanda batazi n’uko isa, telefoni yari iy’abategetsi bo hejuru.

Amategeko yari yararibaswe, aho uwakoserezaga undi cyangwa akabikekwaho yicwaga ntibigire gikurikirana, kubera ubutegetsi butari bushishikajwe n’Abavukarwanda.

Urugendo rwinjira mu cyerekezo 2020

U Rwanda rwanditse amateka mabi. Kuyakosora byasabaga ubwitange budasanzwe. Guhera mu 1994 Ingabo z’u Rwanda zatangiye uru rugamba ku bufatanye n’abaturage ari ho bya bikorwaremezo byahanzwe ibindi birasanwa.

Mu kubaka icyizere mu Banyarwanda zifashijwe n’umutoza wazo, izi ngabo zegereye abaturage zibubakamo icyizere zibereka ko zitandukanye n’izabayeho ku ngoma zabanje, aho umusirikare yashobora kuza akakurasa akigendera, kandi atinywa nk’ Imana.

Abanyarwanda basobanuriwe ko imbunda ari iyo kubarinda no kurwanirira igihugu, mu gihe mbere ya 1994 bazitinyaga, abenshi bibwaga hakoreshejwe avoka babeshywa ko ari gerenade n’amabuye yitwa “gatarina” yari yarabiciye.

Bivuye mu ngabo zubatse icyizere, nibwo demokarasi itangiye mu Rwanda, aho gutora amabara kandi uhagazwe hejuru n’igitugu n’igitutu, Abanyarwanda bagatora abo babona banabwiye imigabo n’imigambi yabo kandi bagatora mu bwisanzure.

Itonesha n’iringaniza byavuye mu mashuri, ahubwo umuhanga kurusha abandi akaba ari we wiga nta kureba akarere n’ibindi nk’uko byakorwaga mbere.

Iterambere mu ikoranabuhanga ribereye bose ryasesekaye mu Rwanda, telefoni igera kuri bose n’utuye ikantarange. Televiziyo ibonwa na buri wese ku buryo buri Munyarwanda yemerewe kureba iby’iwabo n’iby’ahandi akunguka ubumenyi.

Abanyarwanda bahawe agaciro bitigeze kubaho

Habyarimana yavugaga ko u Rwanda ari ikirahure cyuzuye, bituma Abatutsi bameneshwa mu gihugu cyabo, ababyeyi bashorera abana babajyana mu buhungiro.

Ibi byagaragaje ko cyari ikinyoma kuko FPR Inkotanyi imaze kubohora igihugu ingoma y’abicanyi, impunzi z’ Abanyarwanda zari mu bihugu bitandukanye by’isi bagarutse mu gihugu cyabo baratura, none dore bagikwiriyemo, ndetse n’abataraza barahamagarwa.

Iturufu y’ubwoko yagiye nka nyomberi. Ibi byerekanwa n’uko aho Umunyarwanda agiriye ikibazo atabarwa ku bw’agaciro afite nk’umwenegihugu.

Twese twibuka ubwo abagize Korali Ambassadors of Christ bakoreraga impanuka muri Tanzaniya, u Rwanda rwaboherereje indege yo kubatabara.

Iyo bimenyekanye ko ubuzima bw’Abanyarwanda buri mu kaga mu bihugu biberamo intambara, igihugu kibatabara kitabanje kwiganyira.

Ni nde wageza Abanyarwanda mu cyerekezo 2020?

Ikipe itsinda nta we uyihindura. Umutoza mwiza, kapiteni mwiza n’abakinnyi beza hiyongereyeho abafana ni byo bituma ikipe itsinda.

Mu gihe icyerekezo 2020 cyatangiraga kuvugwa abantu bumvaga ari inzozi, kuko malariya yari akarande mu Banyarwanda. Imiturirwa muri Kigali n’ahandi mu Rwanda yari inzozi.

Hari uwatangije iki cyerekezo, ufatwa nk’umutoza mwiza kandi urebye umuvuduko ikipe ifite n’ibitego itsinda urasanga umutoza akwiye kongezwa indi myaka ngo ikipe yiharire ibikombe.

Bivuze ko mu mwaka wa 2020, umutoza watangiranye ikipe yagaragaraga nk’iyatsindwa imbere y’amahanga akayigeza ku ntsinzi ikwiye, yatunguye benshi akwiye kuzaba akiri umutoza waganisha ikipe mu myaka ya za 2040 na 2050.

U Rwanda rwamaze kwiyubakamo ubushobozi mu nzego zose, umutekano ni wose ndetse rusagurira amahanga.

Imitekerereze ihambaye yavuye ku gutekereza ku Rwanda gusa iganisha mu gushaka icyatuma Afurika itazongera kuba akarima k’ibihugu byiyita ibihangange.

Amahanga yishingikiriza icyo yita amategeko, nyamara hari igihe iyo bibaye ngombwa ahinduka mu nyungu z’icyiza.

Urugero ni umugore wari warakatiwe kwicwa muri Sudani ariko amahanga yatabaza akarekurwa ubu akaba atekanye.

Amahanga usanga akomera ku gihano cy’urupfu mu bihugu byayo, ariko u Rwanda, rwarebye kure rukivanaho, rurabishimirwa, kuki rukoze ikindi gikorwa mu nyungu z’Abanyarwanda amahanga yahaguruka agahagarara?

Itegeko riruta ayandi mu Rwanda ni Itegeko Nshinga ryatowe n’Abanyarwanda ntawe ubibahase. Mu gihe runaka bashobora no gusaba ko ryahinduka mu nyungu z’ibyiza bibabereye, kuko n’ubundi amahanga ahora yivanga muri byose yasize Abanyarwanda bapfa yifatira indege ajya kunezererwa iwayo.

Itegeko Nshinga ryatowe n’abaturage mu mwaka wa 2003, ku nyungu zabo mu gihugu cyarimo ubusa, kirazamuka, ese igihe kimwe bibaye ngombwa ntiryahinduka ku nyungu z’Abanyarwanda, maze iterambere ry’igihugu n’umutekano usesuye bigakomeza kwimakazwa?

Ese uhereye kuri ibi byose byagezweho ndetse n’ibindi bigamije imibereho myiza y’ Abanyarwanda ntiwakwishimira uyu mutoza ukamwambarira impumbya akazageza u Rwanda no mu gice cy’ikinyejana cya 21?


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza