00:00:00 IGIHE NETWORK KN KINYARWANDA EN ENGLISH FR FRANCAIS

Ni akumiro kuvuza induru mu gihe cy’ibihano kandi wararyumyeho ibyaha bikorwa

Yanditswe na IGIHE
Kuya 1 Mutarama 2022 saa 09:37
Yasuwe :

Urukiko mu Karere ka Ngororero ruherutse gukatira imyaka itanu abanyeshuri bahamijwe ibyaha byo gusenya ishuri no gutwika ibitabo byaryo.

Birababaje kandi birashimishije kubona abantu benshi bahagurutse bahagaze bari kuvugira bariya banyeshuri ngo bagabanyirizwe ibihano cyangwa se banababarirwe.

Uyu munsi hari ibyaha bikorwa ndetse ubona ko bishobora no gukumirwa ariko ugategereza ko abantu babyamagana nkuko bari kuvugira bariya bana ku mbuga nkoranyambaga ugaheba. Ndetse n’ushatse kubyamagana bamwifatira mu gahanga ugatangira kwibaza uwakoze amakosa uwo ari we. Byose kandi bigakorwa ngo mu bwisanzure bwo gukora icyo umuntu ashaka.

Abarimu basigaye bagerageza guhana umwana birimo no kuba yamucishaho akanyafu se, kumusaba kogosha umusatsi kuko wenda abona yananiwe kuwugirira isuku n’ibindi bihano ariko ahita ahabwa induru ku mbuga nkoranyambaga rimwe na rimwe akanirukanwa ku kazi.

Umunyeshuri yifatira mu gahanga mwarimu rwose akamutuma umubyeyi ukeka ko hari n’igihinduka umubyeyi na we akaza kunga mu ry’umwana we ndetse rimwe na rimwe akabanza no kunyura kuri polisi.

Birababaje kuba utakumva amajwi y’abantu benshi nk’aya turi kumva ngo tuyumve umuntu ari gusaba kunoza uburere bw’abana, guhana abakoze amakosa n’ibindi ahubwo tukayumva bavugira abanyamakosa.

Naribajije nti ‘Ese aya majwi yose yari he n’ibibazo by’uburere buke bisigaye bivugwa hanze aha?”

Nanjye ndi umubyeyi mfite abana ! Impuhwe birumvikana nta mubyeyi utazigira ariko mubanze murebe amakosa yakozwe n’uburemere bwayo kuko burya ibintu byinshi bipfa iyo bitangiye guhabwa inyito itari yo.

Imbabazi dusaba tuzisabe tugendeye ku cyaha nyakuri kurusha uko dushaka kwerekana ko abana bataciye inka amabere.

Ku mbugankoranyambaga cyane cyane Twitter abantu benshi nabonye bari kunenga ibihano byahawe bariya bana ndetse bakabavugira cyane bavuga ko bakajyanwe kuganirizwa kuko ngo “guca amakaye n’imyenda si icyaha gihanwa kuriya”. Ndangira ngo dusase inzobe kandi tuvugishe ukuri kuko kutica umutumirano.

Bariya bana iyo biba guca impuzangano (uniformes) zabo gusa ntabwo rwose bahabwa imyaka itanu kuko inzego zacu z’ubutabera nazo ziratekereza ntizabikora.

Icyaha bariya bana bakoze tukivuge neza abantu bave mu rujijo: “Batwitse ibitabo by’ikigo, batwika ibitanda, bamenagura ibirahure by’amadirishya n’inzugi, basenya n’inyubako.”

Ababasabira imbabazi bose bazisabe bagendeye kuri ibyo byaha bareke kubyita andi mazina.

Kiriya ni igikorwa cy’ubugome ndetse cyakozwe n’abantu bujuje imyaka y’ubukure ku buryo bidakumiriwe kare cyazakurikirwa n’ibindi byaha ndengakamere. Ndetse badahanwe mu buryo bwihanukiriye byatanga isomo ribi kuri bagenzi babo ahandi.

Buri munyarwanda wese aha aranyumva cyane sinirirwa mbitindaho rwose. Abantu bari ku mbuga nkoranyambaga banenga imyanzuro y’inkiko ni byiza ko tunababona banenga imico mibi benshi mu rubyiruko bafite uyu munsi.

Iyi ariko burya ntibayiyigisha ahubwo byose bituruka ku babyeyi n’abavandimwe ndetse n’abaturanyi banga kurera abana babo bagahora, bavuga ko bahuze bagiye gushaka amafaranga cyangwa se abandi bagahitamo kurera bajeyi. Umurezi yashaka no gushyiramo ake ababyeyi bakazira mu kirere babanje no kwitabaza polisi.

Ndisabira inzego zitandukanye by’umwihariko iz’ubutabera kwirinda igitutu cy’imbugankoranyambaga bagakora akazi kabo.

Nk’umubyeyi kumara imyaka itanu utari kumwe n’umwana wawe biragatsindwa ndetse ndi mu basaba ko iriya myaka yagabanywa bakajyanwa nk’i Iwawa n’ahandi ndetse bagahanwa bihanukiriye ariko nanone nidukomeza gushyigikira umuco wo kudahana no kuvugiriza induru igihe cyo guhana gusa tukanga kuyivuza igihe cy’amakosa tuzaba turi gutaba u Rwanda mu nama.

Aba ni abana bahamijwe ibyaha byo gutwika no kwangiza ibikoresho by'ishuri i Ngororero

Umwaka mushya Muhire!


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .