00:00:00 IGIHE NETWORK KN KINYARWANDA EN ENGLISH FR FRANCAIS

RDC yaba yarabonye ibyo yari yiteze kuri Blinken?

Yanditswe na Josephine Kalembe
Kuya 19 Kanama 2022 saa 11:31
Yasuwe :

Ubwanditsi: Ibikubiye muri iyi nyandiko ni ibitekerezo bwite by’umwanditsi, Josephine Kalembe

Mbere y’uruzinduko yagiriye mu Rwanda tariki 10 na 11 Kanama, Umunyamabanga wa Leta Zunze Ubumwe za Amerika ushinzwe ububanyi n’amahanga, Antony Blinken, yabanje gusura Repubulika Iharanira Demokarasi ya Congo (RDC).

Guverinoma ya RDC yari ifite urutonde rurerure rw’ibyo yifuzaga kuri Blinken birimo guhana u Rwanda kubera ibirego barushinja byo gufasha inyeshyamba za M23.

Ni ibirego byatijwe umurindi na raporo y’impuguke za Loni yagiye hanze mu buryo butemewe, ivuga ko bafite ibimenyetso by’ibikorwa by’ingabo z’u Rwanda muri Rutshuru mu Ntara ya Kivu y’Amajyaruguru.

Byuririweho na Minisitiri w’Ububanyi n’Amahanga wa Congo, Christophe Lutundula mu kiganiro n’abanyamakuru ubwo yari kumwe na Blinken. Leta ya Congo yashyize ingufu nyinshi mu gutangaza iyo raporo kugira ngo babone uburyo babamba u Rwanda.

Ibyo Congo yavugaga byakomojweho na Blinken yirengagije ingamba zafashwe ku rwego rw’akarere zigamije guhashya ubugizi bwa nabi mu Burasirazuba bwa Congo. Inama za Nairobi na Luanda zatanze umurongo ugaragara ukwiriye gukurikizwa kugira ngo amahoro aboneke mu Burasirazuba bwa Congo.

Muri izo ngamba harimo guhashya burundu umutwe wa FDLR n’indi iwushamikiyeho nka CNRD, FLN, RUD-Urunana, and FPPH-Abajyarugamba.

Iyi mitwe yubakiye ku ngengabitekerezo ya Jenoside ni yo nkomoko ya mbere y’umutekano muke mu Burasirazuba bwa Congo, ikanaba ishingiro y’umwuka mubi hagati y’u Rwanda na RDC.

Icyakora, ikintu RDC yananiwe kwemera ni uburyo umutwe w’iterabwoba nka FDLR ufite uruhare muri Jenoside yakorewe Abatutsi mu 1994, kugeza n’aho uri kwinjizwa mu gisirikare cya RDC ngo ugifashe guhangana na M23.

Inama za Luanda na Nairobi kandi zemeje ko hajyaho ingamba zigamije guhashya imvugo z’urwango muri RDC ziyongereye mu minsi ishize zibasira u Rwanda, Abatutsi b’Abanye-Congo bavuga Ikinyarwanda. Izi mvugo zishingiye ku ngengabitekerezo ya Jenoside ntabwo iboneka mu nzego z’umutekano no mu baturage basanzwe gusa, ahubwo zageze no mu bayobozi bakuru muri Guverinoma, kugira ngo bakomeze bigarurire imitima y’abaturage.

Hashize igihe RDC idatana no gushinja u Rwanda ibinyoma. Mu myaka ishize, hari Abanye-Congo bashinje u Rwanda gushaka kuyitwara uduce two mu Burasirazuba dukungahaye ku mabuye y’agaciro. Kugereka ibibazo ku bandi aho kubikemura, ni umukino Congo izi gukina cyane.

Buri gihe Kinshasa ishaka ko amahanga ari yo ayifasha guhangana n’ibibazo by’umutekano biyugarije, ibintu byumvikanisha ubushobozi buke bwo kwikemurira ibibazo. Ikibabaje kurushaho, ni uko Abanye-Congo bakibona Abanyamerika n’Abanyaburayi nk’abacunguzi babo.

Mu bigaragara, Kinshasa icyo yari yiteze kuri Blinken si cyo yabonye. RDC yatekerezaga ko Amerika izahana u Rwanda ishingiye ku birego by’uko u Rwanda rufasha M23. Congo kandi yumvaga ko Amerika izashyiriraho ibihano bya viza, iby’ubukungu n’ibindi ariko nta na kimwe cyabaye.

Kuri RDC, ibi bikwiriye kubaha isomo. Ibibazo bya Congo bizakemurwa n’abayobozi bayo, hatabayeho ibyo kwirirwa bikoreza amakosa yabo abandi cyangwa se kumva ko abanyamahanga nka Amerika bazaza kubatabara.

NB: Iyi nyandiko yatambutse bwa mbere mu rurimi rw’Icyongereza ku rubuga The Great Lakes Eye

RDC yifuzaga ko Blinken ava mu Rwanda arufatiye ibihano kubera M23, gusa siko byagenze

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .