00:00:00 IGIHE NETWORK KN KINYARWANDA EN ENGLISH FR FRANCAIS

Uburyo Radio yafasha Ikinyarwanda kurushaho kwanda

Yanditswe na Mutangana Steven
Kuya 21 Mutarama 2022 saa 08:41
Yasuwe :

Muri Gashyantare buri mwaka, Isi yose izirikana akamaro ka radio. Ni ku munsi mukuru wizihizwa ku itariki ya 13 Gashyantare.

Muri uko kwezi kandi Isi yose izirikana akamaro k’ururimi kavukire, umunsi wizihizwa ku itariki ya 21 Gashyantare. Mu gihe twegereje uko kwezi, ndifuza ko twibaza tuti “Ko iwacu dufite radio nyinshi, zaba zifasha ururimi kavukire rwacu kurindwa, guhererekanywa, kogera no gushinga imizi?”

Radio ni kimwe mu bitangazamakuru kigera ku bantu benshi. Yavutse mu buvumbuzi bw’abashakashatsi Hertz, Helmollz, Maxwell, Lord Kelvin, Olivier Lodge, Marconi n’abandi, ahagana mu mwaka wa 1867.

U Buholandi nibwo bwakoresheje isakaza rya radio bwa mbere mu 1867, bukurikirwa na Amerika n’u Bwongereza mu 1920. Mu mizo yayo, radio yifashishijwe mu gutangaza amakuru. Ni muri urwo rwego radio nka British Broadcasting Corporation (BBC) yashinzwe mu 1922.

Mbere y’intambara ya kabiri y’Isi (1939-1945), radio yari igikoresho cy’ingenzi mu ihanamakuru.

Hashize imyaka isaga 60 radio y’u Rwanda yumvikana

Mu Rwanda, inyandiko z’ubushakashatsi zigaragaza ko iminara ya radio yashinzwe muri 1960. Ibiganiro bya mbere by’igerageza byatangiye kumvikana muri Gashyantare 1961. Iyo radio yahawe izina rya Radio Rwanda.

Mbere y’icyo gihe, abaturage bumvaga Radio Usumbura na Radio Léopoldville. Igitangira, gahunda ya Radio Rwanda yabaga ari iy’amasaha abiri n’igice ku munsi. Yaheraga saa kumi n’ebyiri z’umugoroba igasubikwa saa mbili n’igice z’ijoro.

Gahunda yayo muri icyo gihe yari igizwe ahanini n’amakuru, indirimbo nyinshi n’ibiganiro bike byigisha. Bimwe mu biganiro byayo byategurirwaga muri za Minisiteri.

Ahagana 1977, u Rwanda rwari rumaze kugira uturadio 70,000 turi mu ngo z’abaturage, ni ukuvuga za nsakazamajwi dutunze imuhira. Naho muri 1978, Radio Rwanda yumvikanaga ahantu hangana na 80% by’ubutaka bw’u Rwanda, nk’uko ubushakashatsi bwa Ruboneka Thaïs (Ruboneka Thaïs, Les auditeurs rwandais face à la thématique de la culture de la paix. Cas de la radiodiffusion rwandaise, UNR, Butare, 1999.p.51) bubigaragaza.

Iyo radio ubu yumvikana aharenze aho kuko murandasi yoroheje byinshi. Radio zarenze imwe y’Igihugu ziba nyinshi. Ubu izemewe gukorera mu Rwanda zirabarirwa kuri 39, nk’uko ubushakashatsi bw’Urwego rw’Igihugu rw’Imiyoborere bubigaragaza.

Abashakashatsi batandukanye bemeza ko radio ari umuyoboro mwiza wo gutangaza amakuru, guhugura, kurera no kwigisha ndese no kwidagadura, mu mijyi no mu cyaro.

Radio ni cyo gitangazamakuru gifasha n’ufite ubumuga bwo kutabona kumenya ibyiriwe ku Isi atavuye aho ari, yewe n’iyo haba mu gace katarangwamo amashanyarazi.

Mu bitangazamakuru byose bikoreshwa mu Rwanda, radio niyo ikomeje kuba ku isonga mu kwifashishwa n’abaturage kugera ku makuru, nk’uko ubushakashatsi bwa RGB tuvuze haruguru bubigaragaza.

Ikinyarwanda ni ururimi rw’u Rwanda

Irangashingiro ry’Itegeko Nshinga rya Repubulika y’u Rwanda ryo mu 2003 ryavuguruwe mu 2015, rihamya ko Abanyarwanda bashingira ku mahirwe bafite yo kugira Igihugu kimwe, ururimi rumwe, umuco umwe n’amateka y’igihe kirekire basangiye bigomba gutuma bagira imyumvire imwe y’aho bagana.

Kuba Ikinyarwanda ari rwo rurimi rw’Igihugu (Itegeko Nshinga rya Repubulika y’u Rwanda ryo mu 2003 ryavuguruwe mu 2015, mu ngingo ya 8) rwonyine, ni amahirwe akomeye akwiye kurindwa.

Ni ururimi rumaze kugera ku rwego rw’indimi ndengamipaka zo muri Afruika, nk’uko Inteko Nyafurika y’Indimi (African Academy of Languages, ACALAN) ibyemeza. Gikoreshwa kuri radio mpuzamahanga nka British Broadcasting Corporation (BBC), Voice of America (VOA), ku mbuga za internet no mu nkoranyamagambo zo ku rwego mpuzamahanga.

No mu Rwanda, Radio ikwiriye gufasha ururimi rw’Igihugu kwanda

Ubwo twegereje kwizihiza umunsi mpuzamahanga w’ururimi kavukire, ndashaka gushimangira ko radio ikwiriye kugaragaza ko koko ifasha Ikinyarwanda kwanda.

Mu bihugu byakataje mu ikoreshwa ryizweho neza rya radio mu guteza imbere umuco wabyo, baha radio inshingano zo gufasha kogeza ururimi rwabyo. Urugero, mu Bufaransa, Radio France Internationale (RFI) ni intumwa mudatenguha mu guteza imbere umuco w’iki gihugu by’umwihariko Igifaransa mu mahanga. Igitabo cya Leteinturier Christine na Le Champion Rémy kirabisobanura.

Muri iki gihugu kandi, radio zitegetswe gukoresha nibura 40% by’indirimbo zihanzwe mu rurimi rw’Igifaransa muri gahunda zazo za buri munsi, nk’uko biteganywa mu itegeko ryo ku wa 30 Nzeri 1986 rigenga itangazamakuru ry’amajwi n’amashusho, nk’uko abashakashatsi Leteinturier Christine na Le Champion Rémy babisobanura. Mu Rwanda nta tegeko ribigenga rirajyaho.

Radio zo mu Rwanda nazo zishishikarire kurinda ururimi rw’Igihugu, zirukoreshe mu buryo bunoze, zifashe abazikurikira kurumenya neza, zinagire uruhare mu kuruteza imbere mu Rwanda no mu mahanga.

Ibyo zabigeraho ziramutse zibishyize mu ngamba n’igenamigambi bihamye. Twibutse ko zimwe muri izo radio zo mu Rwanda zitegetswe by’umwihariko “guteza imbere umuco nyarwanda”, nk’uko biteganywa mu Itegeko ryo muri 2013 rishyiraho Urwego rw’Igihugu rw’Itangazamakuru.

Umwanditsi w’ iki gitekerezo yize iby’iterambere ry’umuco n’itangazamakuru mu Rwanda no mu Misiri. Yanditse ibitabo bibiri ku muco n’itangazamakuru ari byo: Rwanda: Regard rétrospectif sur la Radio Nationale en milieu rural, Editions Universitaires Européennes, 2021 na La Communication pour la valorisation du patrimoine culturel du Rwanda, Editions Universitaires Européennes, 2014.

Radio ni igikoresho gikomeye mu kugeza amakuru ku bantu benshi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .