Ukwibyara gutera ababyeyi ineza

Yanditswe na

Mugobokanshuro Ephrem

Kuya 29 Mutarama 2015 saa 02:21
Yasuwe :
0 0

Niba hari ikintu gishimisha umuntu kuri iyi si ya Rurema, ni ukugira imbuto imukomokaho. Birababaza cyane iyo abashakanye babanye igihe kitari gito, ariko mu mihihibikano yabo ya buri munsi, bakaza kwisanga nta kana bibarutse.
Tuzi twese ko Umunyarwanda yise umwana we Itangishaka, Niyigena… Ibi bikaba byumvikanisha ko icyo Imana itaguhaye, ntakuyibihatira kugitanga ku ngufu. Ibi birimo amaronko atandukanye, ubukungu, ubwenge, by’umwihariko urubyaro.
Ibi byose bituma umwana agira uruhare (...)

Niba hari ikintu gishimisha umuntu kuri iyi si ya Rurema, ni ukugira imbuto imukomokaho. Birababaza cyane iyo abashakanye babanye igihe kitari gito, ariko mu mihihibikano yabo ya buri munsi, bakaza kwisanga nta kana bibarutse.

Tuzi twese ko Umunyarwanda yise umwana we Itangishaka, Niyigena… Ibi bikaba byumvikanisha ko icyo Imana itaguhaye, ntakuyibihatira kugitanga ku ngufu. Ibi birimo amaronko atandukanye, ubukungu, ubwenge, by’umwihariko urubyaro.

Ibi byose bituma umwana agira uruhare rukomeye mu gususurutsa Imiryango.Arushaho gusabanisha abantu n’abandi, kuko ariyo mpano ihebuje Imana yahaye inyokomuntu, mu gihe yagiraga iti: “Muzabyare, mwororoke, mungane n’umusenyi wo ku nyanja, kandi noneho munagenge isi mbahayeho umugabane. Nimumbera abana, nzababera umubyeyi nyakuri.”

Mugobokanshuro Ephrem wanditse iki gitekerezo

Umwana iyo avutse impundu ziravuga. Amakuru agacicikana hose; bahanahana iyo nkuru nziza y’ibyishimo. Ayo makuru ashobora guhererekanywa imbona nkubone, cyangwa hoherezwa intumwa. Ashobora gutangwa kandi kuri telefoni mu kuvugana, hashobora gukoreshwa kandi ubutumwa bugufi(SMS). Ubu noneho isi yabaye nk’umudugudu, kuko abantu bitabaza inkoranyambuga za Interineti.

Iyo abantu bamaze kumenya iyo nkuru nziza, bamwe bagira bati: Musubireyo nta mahwa, abandi bati: Babyaye amuhungu cyangwa umukobwa? Babyaye Impanga se? Hari n’ababaza bati: Arasa na se, cyangwa se nyina? Ibibazo abantu baba bafite biba ari byinshi, byo gushaka kumenya inkuru y’imvaho y’uwo muziranenge.

Ubwo gahunda ikurikiraho niyo gusura umuryango wibarutse, ari nako iminsi mikuru irimo impano n’amazimano irushaho guhuza abantu baturutse imihanda yose cyane cyane banitegura kwita izina aribyo kurya ubunnyano.

Mu minsi itarambiranye, umwana agahabwa Batisimu imbere y’Imana, ari nayo imwunga nayo.Burya ngo So ntakwanga akwita nabi. Mu kwita amazina hari ababyeyi bihutiraga kugenura ibibondo byabo, babita amazina adashobotse: Ba Bicikabaraguza, Tubanyembazi,Mbanabo, Nzikobanyanga.

Ayo mazina rero yaturiwe ku bana, kandi mu by’ukuri atari meza, ashobora kubokama, usibye ko mu Rwanda rw’ubu abashinzwe irangamimerere bashishikariza abantu kwita amazina asobanutse, atarimo incyuro no gutegana iminsi…

Umwana rero uvutse ahabwa ibyangombwa birimo ibimutunga, byaba iby’umubiri cyangwa se Roho ye.Ibyo bikaba bisobanuye ko akurikiranwa umunsi ku munsi ku burere bwe bwiza aho guterera iyo rigoramiye, kuko igiti kigororwa kikiri gito.

Akomeza gukurikiranirwa hafi ngo azavemo umuntu muzima, akazahesha umuryango we agaciro ndetse n’igihugu cye cyamuboneye izuba.

Nubwo imiryango myinshi hari iyazimye kubera Jenoside yakorewe Abatutsi, noneho abana bacitse ku icumu hakabamo bamwe birera cyangwa bakarera barumuna babo, muri gahunda za Leta y’Ubumwe bw’Abanyarwanda, harimo ukubonera abo bana birera Imiryango ibarera kandi neza. Ibyo bituma Umwana ukuriye mu muryango yigirira icyizere cyo kubaho, noneho akagira n’icyanga cy’ubuzima bwe bw’ejo hazaza.

Ibyo kandi bizanamurinda kwiheba no kwishora mu mico itari myiza, ikanamwangiriza imibereho ye kandi arirwo rubyiruko Igihugu gitezeho amizero.

Iyo umwana akivuka nkuko twabivuze haruguru, iyo ageze imusozi abanza kurira, aribyo bisobanuye ko ari muzima. Iyo atarize biba ari ikibazo gikomeye. Hari n’abajya babitangamo urwenya bagira bati; ukurira k’umwana ni ikimenyetso simusiga cy’uko aba aje mu isi yuzuyemo ibibazo n’amagorwa.

Kuvuga ku bibazo biba mu buzima si ukubirema, sino kubiteza imbere, kuko biriho kandi ubuzima n’ibibazo ni ntunsige turajyana. Umuntu atangirana nabyo ku isogonda ya mbere akivuka ubwo arira.

Ariko kandi ngo nubwo ibibazo ari ingorane, guhangana nabyo ngo nibyo biha agaciro ubuzima, ari nabyo bigira umuntu kuba umuntu nyamuntu.

Abantu b’isi yose bucya bahanganye n’ibibazo bakabyirirwamo, bukabiriraho, ejo n’uko. Ku butaka ni ibibazo, abagenda mu kirere bagurukana nabyo, abanyerera mu mazi cyangwa gari ya moshi ruba rugeretse. Ugenda n’amaguru agira ibye, uri mu modoka ibye, umukene ibye, mukire ibye, umuzungu ibye, umwirabura ibye, ngubwo ubuzima. Ngayo nguko…

Tugarutse ku cyanga cy’Umwana mu Muryango, nubwo hazamo ibyo bibazo bituma yenda uwo Mwana atabasha kubonera igihe ibya ngombwa by’ibanze, bituma agimbuka uko bikwiye, Umunyarwanda yarongeye agira ati: Izaba Impfizi iritereka. Uzaba Umugabo nyamugabo agaragara kare.

Umufaransa nawe yongeramo ati: Icyo uzaba, ntikigomba gufata imyaka n’imyaniko. (Aux âmes bien nées, la valeur n’attend pas le nombre d’années). Icyo azaba gitangira Umwana agitaguza, aho bavuga bati : Umwana asa na Se, Ise yaribyaye pe !! (Tel Père, tel Fils). Ibi babivuga iyo babona uwo Mwana afite amatwara meza cyangwa mabi, bashingiye kubamuhaye uburere bwiza cyangwa bubi.

Nta Mubyeyi n’umwe ku isi wishimira kubona umwana we yabaye ikirumbo. Abarundi bo bita bene bariya bana ibirobezo byo mu ibarabara.
Nkubu ujya kugira gutya ukumva ngo hariya mu ishyamba hakambitse Intaragahanga, zafoye imiheto n’imyambi kugirango zambure cyangwa zice Abagenzi. Nta Mubyeyi wakwibaruka yifuza ko Umwana we yaba Intaragahanga cyangwa abandi bose bameze nkazo.

Ntabwo bukikera utumvise ngo hariya ibunaka hari imitwe y’intagondwa nkaza Boko Haram, Al Shabaab n’indi mitwe umuntu atarondora z’inkozi z’ibibi, aho zitikiza imbaga y’abantu n’ibyabo, cyangwa igafata ku ngufu abari n’abategarugori, ikoresheje intwaro za kirimbuzi.

Muri iyi minsi tugezwaho amakuru atandukanye y’ubugizi bwa nabi, aho urubyiruko rutegera ahahurira abantu benshi, rukibasira nk’abaje mu marushanwa ya Siporo cyangwa indi myidagaduro, rukajugunyamo ibisasu. Hari ibyabereye za Boston muri Leta Zunze Ubumwe z’Amerika, ahapfiriye imbaga y’abantu.

Aho umwana ugiye kurangiza kaminuza aza agatema agatongora Ababyeyi be bamwibarutse ngo nta munani yagenewe n’ibindi bidafashe. Uwo ntaba akiri umwana!!

Rimwe na rimwe ukumva ibunaka ngo Abasore bashimanye, barabengukana, none basezeranyijwe imbere y’amategeko, isi yose ihanze amaso, aho kubyamagana bivuye inyuma.

Aba bose twavuze, Ababyeyi babo barabatwise, bumva ibise byabo, bavuka nk’abandi Bana bizihiye Umuryango, ariko impera n’imperuka bakaba barimo guteza imiborogo abatuye isi.

Bamwe bati turi mu minsi ya nyuma, aho ngo byahanuwe ko abantu bazagera n’ubwo badatandukanya ikibi n’icyiza, cyane cyane Urubyiruko rukijandika mu bidahesha Imana icyubahiro, ndetse bigasubiza inyuma indangagaciro za kirazira Ibihugu byinshi biba cyangwa byifuza kubakiraho.
Mu kwanzura ino nyandiko, twifuzaga gushishikariza ababyeyi n’abandi bose bafite aho bahurira n’uburere bw’ibanze abana cyangwa Urubyiruko baba bakeneye, kwimijiramo agafu, bakabungabunga uburere bwabo bwatitutse amazi atararenga inkombe, kuko ubu busigaye bugerwa ku mashyi.

Icyo Umubyeyi yifuza kandi aba ashyize imbere, ni uko umwana yibarutse yakwigirira akamaro, akiteza imbere, ndetse agateza imbere Igihugu cyamwibarutse. Ntawifuza kubyara Umwana uzaba umuzigo ku muryango we n’igihugu cye, aho usanga kugirango abana babe ibisubizo, ahubwo bahinduka ibibazo.

Umubyeyi wese yifuza ko umwana we yagera ku ntera ishimishije, akaba icyitegererezo cy’abandi, akagishwa inama, agatanga ibitekerezo byubaka, aho kwitwikira ijoro ajya mu myuga itamuhesha agaciro.

Iyi mihigo yose umubyeyi azayihigura ari uko uwo yibarutse atamutabye mu nama. Aho niho azagira ati: Koko burya ukwibyara gutera ababyeyi ineza.

Mugobokanshuro Ephrem
Akagari ka Cyasemakamba
Umurenge wa Kibungo
Akarere ka Ngoma
Intara y’Iburasirazuba


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza