Umwuga w’Ingabo z’u Rwanda utuma zemerwa mu Rwanda no mu mahanga

Yanditswe na Shaba
Kuya 18 Kanama 2014 saa 09:33
Yasuwe :
0 0

U Rwanda ni igihugu kimaze kumenyekana cyane mu bikorwa byo kubungabunga amahoro hirya no hino ku isi aho rutanga ingabo cyangwa abapolisi bajya mu butumwa bw’amahoro butandukanye buba bwateguwe n’Umuryango w’ Abibumbye cyangwa Umuryango w’Afurika yunze Ubumwe (AU) yewe no mu minsi iri mbere ingabo zarwo zizajya zijya gusohoza ubutumwa zahawe n’akarere.
Mu minsi ishize Ambasaderi wa Leta Zunze Ubumwe z’Amerika muri Loni, Samantha Power yatangaje ko Ingabo z’u Rwanda (RDF) zikunzwe cyane n’abo (...)

U Rwanda ni igihugu kimaze kumenyekana cyane mu bikorwa byo kubungabunga amahoro hirya no hino ku isi aho rutanga ingabo cyangwa abapolisi bajya mu butumwa bw’amahoro butandukanye buba bwateguwe n’Umuryango w’ Abibumbye cyangwa Umuryango w’Afurika yunze Ubumwe (AU) yewe no mu minsi iri mbere ingabo zarwo zizajya zijya gusohoza ubutumwa zahawe n’akarere.

Mu minsi ishize Ambasaderi wa Leta Zunze Ubumwe z’Amerika muri Loni, Samantha Power yatangaje ko Ingabo z’u Rwanda (RDF) zikunzwe cyane n’abo zibungabungira amahoro ugereranije n’iz’ibindi bihugu ziba ziri kumwe nazo.

Nyuma y’inama yahuje Perezida Obama wa Leta Zunze Ubumwe z’Amerika n’abakuru b’ibihugu by’Afurika bagera kuri 50 barimo na Perezida Paul Kagame w’u Rwanda, hatangajwe ko Amerika yashyizeho inkunga izagenerwa igisirikare cyo muri Afurika gihangana n’abarwanyi ba Kisilamu ndetse n’ibihugu bifite igisirikare gifite ubunararibonye mu kubungabunga amahoro n’umutekano.

Muri ibyo bihugu Amerika ifitiye icyizere harimo u Rwanda, Uganda, Tanzania, Ethiopia, Ghana na Senegal ndetse ku ikubitiro ibi bihugu bikaba byarahise byiyemeza gutanga ku buryo bwihuse ingabo zigomba kujya mu mutwe w’Afurika uhora witeguye gufatanya na Loni n’Afurika Yunze Ubumwe mu gutabara aho rukomeye no kubungabunga amahoro n’umutekano.

Ingabo z'u Rwanda mu butumwa i Darfur

Perezida Obama yagize ati “Tuzafatanya n’ibi bihugu bitandatu byagaragaje ubunararibonye mu kubungabunga amahoro.”

Ku ruhande rw’u Rwanda Perezida Kagame asanga iyi gahunda ari uburyo bwiyongera ku busanzwe hagamijwe guha ubushobozi Abanyafurika kuba aba mbere mu kwikemurira ibibazo.

Perezida Kagame yagize ati “Turi igihugu cyahinduwe kandi cyigiye ku mateka yacyo, aho amahoro yigeze kubura bigatuma habaho ibyabaye mu myaka 20 ishize. Uku ni ugushoboza Abanyafurika kumenya kwikemurira ibibazo no guhangana n’ibibazo by’iterambere n’ubukungu. Twishimiye gukorana na bagenzi bacu ku mugabane w’Afurika no guhangana n’ibibazo bitandukanye birimo gushaka amahoro ku mugabane wacu.”

Usibye kuba u Rwanda rugiye gutanga ingabo muri uwo mutwe Obama yiyemeje gushyigikira, mu minsi ishize ubwo hasozwaga inama y’Afurika Yunze Ubumwe yabereye muri Guinea Equatorial, Perezida Paul Kagame yemeye gutanga batayo y’ingabo 850, abakora ibikorwa by’ubuvuzi 35 n’imodoka 10 bagomba kujya mu mutwe wo gutabara aho rukomeye mu karere uzwi ku izina rya "Eastern African Standby Force".

Ingabo z'u Rwanda zurira indege zijya muri Centrafrique

U Rwanda kandi mu minsi ishize ubwo muri Centrafrique hadukaga amakimbirane yaguyemo abatari bake rwahise rwemerera Afurika Yunze Ubumwe abasirikare bagera kuri 800 bajya gutanga ubufasha mu kugarura amahoro muri icyo gihugu cyaberagamo ibisa na Jenoside ndetse mu minsi mike ishize Perezida wa Centrafrique Catherine Samba Panza, ubwo u Rwanda rwizihizaga isabukuru yo kwibohora akaba yarashimiye uruhare rw’ingabo z’u Rwanda mu gucungira umutekano abaturage ba Centrafrique.

Si Centrafique gusa u Rwanda rutangamo ubufasha mu kugarura amahoro kuko hari n’ahandi nka Darfur, Mali n’ahandi ariko kandi by’umwihariko ubunararibonye bw’ingabo z’u Rwanda bujyana n’uko bamwe mu basirikare bakuru b’igihugu bagenda bagirirwa icyizere n’Umuryango w’Abibumbye bigatuma ubaha n’inshingano zo kuyobora ubutumwa bwawo buba bubera hirya no hino muri Afurika.

Aha twatanga urugero rwa Gen Jean Bosco Kazura uyobora Ingabo z’Umuryango w’Abibumbye zishinzwe kugarura amahoro muri Mali zizwi ku izina rya MINUSMA uyu mwanya akaba yarawubonye mu gihe nyama wifuzwaga cyane n’igihugu cya Tchad.

Gen Kazura yatoranyijwe na LONI kubera ubushobozi yagaragaje ubwo yari umuyobozi wungirije mu ngabo z’umuryango w’Afurika Yunze Ubumwe muri Darfur, mbere y’uko hoherezwayo ingabo z’Umuryango w’Abibumbye.

Ibi byose umuntu akaba yabishingiraho yemeza ko umwuga ingabo z’u Rwanda (RDF) zikora, ubunararibonye na disipuline mu gucunga no kubungabunga amahoro bituma zigirirwa icyizere uhereye mu rugo (Rwanda) ukagera n’imahanga.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza