Guha agaciro FDU-Inkingi ni ugukabya kubeshya no kwibeshya

Yanditswe na Tom Ndahiro
Kuya 13 Nzeri 2019 saa 08:55
Yasuwe :
0 0

Ku itariki ya 3 n’iya 4 Kanama 2019 nahamagawe n’abanyamakuru babiri, bakorera amaradiyo abiri atandukanye, bambaza ku bintu bibiri byerekerenye na Ingabire Victoire Umuhoza (IVUmuhoza).

-  Ingabire na Bemeriki ni iri n’iri

Icya mbere cyari ku by’ikirego Maitre Gatera Gashabana yagejeje ku Rwego rw’Igihugu rw’Ubugenzacyaha (RIB) mu izina rya IVUmuhoza. Icya kabiri cyari ku nyandiko nari nanditse ngaragaza ko ingengabitekerezo ikwizwa n’abarimo IVUmuhoza ari mbi kurusha indwara ya Ebola.

Umunyamakuru wabanje ni uwa Radio BBC-Gahuzamiryango ntibuka izina rye, cyakora akaba yarampamagaye ari i Nairobi muri Kenya. Uyu yakurikiwe na Jean Claude Mulindahabi, uba mu Bubiligi agakorera radiyo yo kuri murandasi. Bombi bambazaga wumva baburanira IVUmuhoza urwa ndanze.

Mu kirego cyatanzwe ku itariki 21 Nyakanga, nkabibona ku mbuga nkoranyambaga gusa, abo banyamakuru nababwiye ko mu byo navuze kuri IVUmuhoza ntacyo mbeshya cyangwa mubeshyera kuko ntanga ibimenyetso.

Ku bijyanye no kugereranya ibitekerezo bye na Ebola, nababwiye ko ntigeze mvuga ko ari bimwe, ko ahubwo ingengabitekerezo ya FDU-Inkingi ari mbi kurusha indwara ya Ebola.

Iyo hari icyo mba mbeshya IVUmuhoza yari gukoresha uburenganzira bwo gusubiza, akavuga ibyo asanga abeshyerwa ariko ntabyo yakoze. Nanababwiye icyo ntekereza kuri kiriya kirego. Gushyira uwamamaza ingengabitekezo ya Jenoside n’uyirwanya ku rwego rumwe byakozwe mu rwego rwo kwishyira aheza adakwiye.

Abo banyamakuru bombi, byageze aho mu gihe cyo kumbaza nanjye nkababaza byinshi ku buryo Jean Claude Mulindahabi yarakaye akambwira ko ari we ufite kumbaza wenyine ntakwiye kumubaza.

Ibyo nababajije ni ibintu numva umunyamakuru wese aba akwiye kubaza umuntu nka IVUmuhoza. Kuko kutamubaza ibyo bibazo biba ari ukuba icyitso cyangwa umufatanyacyaha mu gukwiza ingengabitekerezo yoretse u Rwanda.

Ikindi ni uko ibyo nababazaga ari n’ibintu bagombye kuba bazi. Ndanahamya ko bagomba kuba babizi ahubwo bakabyirengangiza nkana kubera guhuza n’uwo baburanira.

Narababajije nti: “ese kuvuga ko IVUmuhoza adakwiye kwemererwa gukora politiki, byitwa bite “kumusebya no kumutesha agaciro muri rubanda rwose”? Ni rubanda ruhe baba bavuga rumubonamo agaciro?” Narababajije nti: “ese agaciro afite karenze ako kuba yarakoze ibyaha by’urwango, atanicuza n’ubwo yababariwe ni akahe?” Nta gisubizo bigeze bampa, nta n’ubwo batumye bitambuka ngo bizasubizwe n’abandi.

Nasabye abo banyamakuru, kimwe n’abandi bazasoma iyi nyandiko kujya mu mateka ya IVUmuhoza, bakareba ibyo yakoze, abo bakoranye n’abo bagikorana kugira ngo bamenye aho abarizwa.

Nabasabye kandi gusoma ibyo yanditse bakumva n’ibyo yanditse ari umuyobozi w’ihuriro ryitwa RDR na FDU-Inkingi. Mbere y’uko uha agaciro uwo ari we wese uteye nka IVUmuhoza, ni ngombwa kumumenya. Waba utabizi ukabaza. Ibyo nababwiye bibereka uwo IVUmuhoza ari we, ntabyo batangaje.

Uko ari babiri, bashatse kunyemeza ko ari nta cyaha akibarwaho kuko yahawe imbabazi na Perezida Paul Kagame. Icyo nabasubije ni uko imbabazi yahawe ari izo kumugabanyiriza uburebure bw’igihe yagombaga kumara muri gereza atari uguhanagurwaho icyaha yahamijwe n’inkiko.

Gukabya mu kwibeshya no kubeshya

Dr. Claudine Kuradusenge-McLeod ni umunyarwandakazi uba muri Leta Zunze ubumwe za Amerika (USA). Dr. Claudine Kuradusenge ari mu kigero cy’imyaka 30. Afite impamyabumenyi y’ikirenga yakuye muri George Mason Univeristy.

Dr. Claudine Kuradusenge ni umwe mu banyarwandakazi bize bafite igwingira ry’imitekerereze n’imyumvire byamuteye guhakana no gupfobya Jenoside ku buryo butihishira.

Ibyo nkabishingira ku nyandiko ze ebyiri zifitanye isano “Denied Victimhood and Contested Narratives: The Case of Hutu Diaspora”yo mu mwaka w’2016 n’indi yise “Belgian Hutu Diaspora Narratives of Victimhood and Trauma” yo mu mwaka w’2018.

Kuri we, buri munyarwanda ni nyiramukubitwa wa Jenoside, kandi ko kuvuga ko hari Jenoside yakorewe Abatutsi ari amakabyankuru cyangwa ikinyoma cyakwijwe na Leta y’u Rwanda. Ibyo guhakana no gupfobya Jenoside biri muri izo nyandiko zombi bikeneye inyandiko yihariye.

Dr. Kuradusenge aburanira amashyirahamwe nka Jambo Asbl y’urubyiruko rwiyemeje guhakana Jenoside no kuburanira abayikoze harimo n’ababyeyi ba nyiri iryo shyirahamwe. Nabyo ntibitangaje.

Muri iyo nyandiko ye yo mu 2018, hari abo yita ko bajora cyangwa bakosora Leta y’u Rwanda (critics). By’umwihariko avuga IVUmuhoza, Kizito Mihigo na Diane Rwigara. Akavuga ko abakosora cyangwa bakosora Leta batotezwa bagafungirwa ubusa.

Uko asobanura ibya IVUmuhoza, bikwereka ko Dr. Kuradusenge avuga ibyo atazi cyangwa akabyica abizi. Niba ashobora gutinyuka akemeza ko IVUmuhoza yagiye mu Buholandi ahunze Jenoside, ni ibyerekana ko gahunda ari ukubeshya abamwizera kubera urwego yagezeho mu mashuri.

Ako gaciro Dr. Kuradusenge aha IVUmuhoza si umwihariko we kuko hari abanyamakuru benshi bamubonamo umuntu uri mu rwego rwo gukosora Leta y’u Rwanda aho kuba umukangurambaga w’ingengabitekerezo ya Jenoside. Muri abo banyamakuru natangaho urugero aba televiziyo zo kuri murandasi nk’UMUBAVU, abanyamakuru ba BBC-Gahuzamiryango, n’ab’Ijwi rya Amerika (VOA) barimo Eric Bagiruwubusa.

Guha agaciro abakwije ingengabitekerezo ya Jenoside

Kugira ngo umenye IVUmuhoza, ni ngombwa guhera ku cyo ayobora cyitwa FDU-Inkingi. Icyo kintu cyitwa FDU-Inkingi si ishyaka ahubwo ni ihuriro ry’amashyaka ya Union des Forces Démocratiques Rwandaises (UFDR), Congrès Démocratique Africain (CDA) na Alliance Démocratique Rwandaise (ADR-ISANGANO).

Iryo huriro ry’amashyaka rikaba ryarabayeho guhera mu kwezi kwa Mata 2006. Iyo UFDR ariko, naryo ni ihuriro rigizwe na Forces de la résistance pour la Démocratie (FRD) yari iyobowe na Eugène Ndahayo na Rassemblement Républicain pour la Démocratie au Rwanda (RDR) yari iyobowe na INGABIRE Umuhoza Victoire.

Ibyo gushyiraho amahuriro y’amashyaka kwa IVUmuhoza ntibyabaye mu 2006 gusa. Ku itariki ya 12 Ukwakira 2002 bashinze icyo umuntu yakwita urugaga ruhoraho ruhuza abarwanya Leta y’u Rwanda.

Barwise La Concertation Permanente de l’Opposition Démocratique Rwandaise (CPODR) rugizwe na l’Union des Forces Démocratiques Rwandaises (UFDR) na l’Alliance pour la Démocratie et la Réconciliation Nationale (ADRN–IGIHANGO).

Nkuko byavuzwe, UFDR yari igizwe na FRD na RDR mu gihe Alliance “IGIHANGO” yari igizwe na Forces Démocratiques de Libération du Rwanda (FDLR), l’Alliance pour la Renaissance de la Nation (ARENA) n’icyitwa Nation-Imbaga y’Inyabutatu Nyarwanda.

Utwo dushyaka nka ADRN-Igihango karetse kubaho mu 2004 mu gihe ARENA n’Imbaga y’Inyabutatu tubaho mubyo gusumira inda. Icya ngombwa aha ni ukumenya ko hari igihe IVUmuhoza yakoranaga na FDLR ndetse ko FDU-Inkingi atari ishyaka ahubwo ari impuzamashyaka. Ariko muri iyo mpuzamashyaka IVUmuhoza akaba arimo nk’umuyobozi wa RDR mu rwego rw’Isi.

Mu kiganiro IVUmuhoza yahawe na Radiyo Inkingi agifungurwa umwaka ushize, yagikoranye na Gaspard Musabyimana. Uyu mugabo Musabyimana ukoresha radiyo yo kuri murandasi ni muntu ki? Gaspard Musabyimana ni umuntu ufite mateka n’uruhare rutaziguye mu mugambi wa Jenoside yakorewe Abatutsi; ari mu gihe cyo kuyitegura, kuyikora no kuyihakana.

Ku rutonde rw’abanyamigabane b’ibanze ba radiyo rutwitsi ya RTLM, Gaspard ni No 583. Kuba umwe mu bayitangije, si byo byonyine. Si ubwa mbere mvuze ibijyanye n’ubuJenosideri bwa Gaspard Musabyimana kuko nabyanditseho muw’2013 Nyakanga, n’ibindi bihe. Soma: “Umunyamakuru Venuste Nshimiyimana wa BBC mu mugambi wa Jenoside” unasome Abanyamakuru bari muri “Dream Team” y’Interahamwe n’Impuzamugambi.

Amazina agaragara muri izo nyandiko zombi, bari abanyamigabane b’ibanze ba RTLM uretse umwe gusa wari uzi ingaruka zabyo. Ahandi mvuga iby’umukozi wa IVUmuhoza witwa Gaspard Musabyimana, ni mu nyandiko yitwaAbambari n’Impirimbanyi za Politiki gica (Igice cya 3) yo mu ntangiriro z’umwaka w’2011.

Gaspard Musabyimana uyobora radiyo Inkingi ya FDU-Inkingi, ayirimo kuko afite uburambe ku kazi mu maradiyo ategura Jenoside. Uyu Musabyimana utagoheka akwiza ingengabitekerezo ya Jenoside yari muri Comité d’Initiative ya RTLM. Iyo Komite ikaba yari iyobowe na Felicien Kabuga ubaho yihisha ubutabera mu gihe abo bakoranaga bagishishikariye gukomeza umugambi wabo mubisha.

Abari muri iyo Komite bose, nta n’umwe wavuga ko atari umujenosideri. Kubyirengagiza ugaha ikuzo umuyobozi wabyo witwa IVUmuhoza, ni ukuba umufatanyacyaha ku bushake.

Abayobozi benshi ba FDU-Inkingi bagize uruhare ruziguye n’urutaziguye mu gutegura Jenoside. Iyo ubona hari ujya kubaza umuyobozi wabo ngo uratekereza iki ku buyobozi bw’u Rwanda nta na rimwe arasaba imbabazi z’ibitekerezo kirimbuzi, ni ukugambanira urubyiruko rw’u Rwanda.

Umunyamakuru wese uha agaciro IVUmuhoza nk’umunyapolitiki, ako gaciro azagahe na Valerie Bemeriki. Itandukaniro ry’abo bagore bombi, ni uko umwe afunze undi akaba yishyira akizana.

Kuri jye abanyamakuru baha IVUmuhoza agaciro, babiterwa n’igwingira rikabije ry’imyumvire n’imitekerereze, cyangwa se ni ukumva ibintu kimwe na we.

Biracyaza...

Twitter: @TomNdahiro


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza