Ibaruwa ifunguye igenewe Nyamunengabandatiretse wa Mutanyurwa

Yanditswe na Ntwari Pie
Kuya 27 Mutarama 2020 saa 09:55
Yasuwe :
0 0

Bwana / Madamu Nyamunengabandatiretse,
Ntaho nahuriye na So Mutanyurwa, ariko mperutse kugwa ku kandiko yari yarandikiye inshuti ye Kazubwenge, wagira ngo yari azi ko azapfa vuba. Sinzi icyo yatinyiye kubabwira ubutumwa bwarimo aho kubatumaho – gusa nkeka ko yagize ubwoba ko mwamubaza impamvu inama abagira we atazigiriye kandi ari So.

Simbitindeho, mbasabye kunyihanganira, sinandika ibiri muri ako kabaruwa uko byakabaye, gusa, ndandikamo n’ibyanjye kuko nkeka ko byabafasha, naho ubundi, mukomeze gutegereza uwo babatumyeho mwihanganye.

Muri make ako kandiko kasabaga Kazubwenge kuzabagira inama, akababwira ubujyakuzimu bw’inyanja mwogamo, akababwira ko ibyo kuyita ikiziba mubyibagirwa ndetse akababwira amazina muzi ya benshi biyitaga ko bazi koga magazi bayirohamyemo. Sinitaye ku mpamvu Kazubwenge atabonye ibaruwa ya so, kuko nasanze igifunze, ariko nimumubona mbere yayo muzamubwire ko nayisize ku biro bya IGIHE i Nyarugenge. Nanze kuyisiga yandagaye nk’uko nayisanze.

Mbere yo kubabwira iby’inyanja ngari mwogamo, reka mbibwirire ibyanjye:

Hari indwara itarashakiwe izina mu Kinyarwanda, mu Cyongereza yitwa “oppositional defiant disorder (ODD)” Nta ndwara iba nziza ariko iyi yo ni kabutindi. Nayo ni nk’iyi nanditseho ejo bundi yo kutanyurwa.

Icyo ODD ihuriyeho no kutanyurwa, zose zifata abantu b’ingeri zose, kuva ku bitambambuga kugera ku basheshe akanguhe. Aho ODD ibera ishyano, yo iyo itinze gukira, umuntu agera aho akiyambara impindurize, akisubiramo, ubumuntu bwe bukarangirira aho.

ODD nta muti igira, gusa ni inkomoko y’izindi ndwara zo mu mutwe zo zigira imiti, iyo nyakurwara agize amahirwe, bavura izindi, rimwe na rimwe nayo ikaboneraho.

Ikindi kibi cya ODD, iyo yica, ntiyica umuntu ngo apfe ahagaze gusa, imwica macuri, agacurama akenge, agahanuka buti, akibira nk’ibuye… kugeza abaye ifumbire y’abapfu, aho usanga abapfuye bahagaze bahorana ifemba yo kumugira imbata yabo ngo bamwigireho ubupfayongo.

Cyakora nta kitagira umumaro ku Isi, abantu barembejwe na ODD, umuntu ashobora kubifashisha atanga urugero rw’indwara mbi. Ni imfashanyigisho, nanjye ndabifashishije mu nyandiko yanjye.

Urwaye ODD iyo ari umwana, arangwa no kutumvira ababyeyi be n’undi wese umuruta, kandi akenshi nta mpamvu. Aho abera Nyamunengabandi atiretse, iyo umubyeyi amuhaye ibiryo avuga ko atabishaka, akabinenga, kugira ngo amuhinyure gusa, nyamara amaherezo akaza kwinenga we ubwe ku gitekerezo yagize, akaza kugira atya bya biryo akabirya nta wumureba. Buri mwanya mu biganiro bye, ahora mu mpaka zo kuninura iby’abandi bakoze, mbese yishimira kunyuranya kabone n’ubwo nta nama yaba atanga zindi. Ahora yumva ko ariwe uri mu kuri.

Iyo ari mukuru, arangwa no gusuzugura ibyemezo by’abamuyobora, akitandukanya n’umurongo shingiro wa benshi, akumva ko yihagije we wenyine, ko ikindi kiremwa bahuza injyana ari uhuje nawe imyumvire gusa. Ashimishwa n’imvune abamuyobora bahura nazo, haza ibiza n’amakuba akabakwena ati mwarebaga he? Mu magorane yigira ntibindeba, mu bigororotse akagorama.

Nshuti za Kazubwenge rero, ntizimbye mu magambo, inyanja Mzee Mutanyurwa yavugaga si inyanja-buzi, ni inyanja-buzima. Reka mbanze mbabwire icyamwishe, nimumuterekera muzabone indaro yo kubahesha amararo.

Icyatumye So yibira bupfapfa mu nyanja ababwira, ni uko yageze aho akiyizera kandi yarabizi neza ko n’ubwo azi koga, atarazi inyanja yogagamo. Yagize atya yiyambura karerembya, igituza agiha umuyaga, agatangamwuka afasha hasi, yoga nabi yoga magazi, yoga bufi ntiyumva ifirimbi y’abasare, umuze uza utyo mu buzima bwe, agize ngo aracubira ararohama. Ni urupfu rutunguranye ariko yikururiye, ntihazagire ubabeshya ngo yazize ikindi – kandi mwihangane.

Ntabwo So yari kurohama iyo ataba arwaye ODD. Yari yaramuzahaje, iramuzonga we abyita inganzo. Nawe ntawamurenganya kuko ni indwara yogoganye ingoga umuryango wanyu, icengera ingobyi nyinshi zahetse abanyu, ituritsa imijijishi zimwe zirihekura, ubu musigaye muri mbarwa. Mutayikize mwe, yazagenda ikavimvirira ku buvivi n’ubuvivagiza bwa kure kuko yabaye nk’akamatirizi kafashe bumata.

Nkeka ko Mutanyurwa yandikiye Kazubwenge ku mpamvu ebyiri: Ngo mubone imaragahinda ku cyamwishe kandi ngo iyi ndwara itazaba akaramata.

Nyakwigendera yari azi neza ko hari ubwato mu nyanja. Yari azi neza ko nta sesagura ryakozwe bujya gushyirwamo, yari azi neza ko nta sesagura ryabaye mu gushyiramo ibitangarumuri, ko nta sesagura ryakozwe mu gukoresha amatora yo gutora abasare bazi koga no kugashya binyuze mu baturage, ko nta sesagura ryabaye mu kugura za karerembya (life jackets), ko nta sesagura ryabaye mu gushyiraho abashinzwe irondo ku nyanja, ko nta n’iryabaye hashyirwaho amateme yo gucaho n’amasaha yo kuyanyambukiraho. Abayoboye ubwato, baduhangiye byose kuko bafite ubuhanga bwo kuturinda ibyaduhahamura, rimwe na rimwe twe tutazi.

Iyo uhisemo kutagenda mu bwato, uba wiyemeje kutazakenera inyanja. Ubwato burimo ntacyo buba bukubwiye kuko niwo muyoboro wagakoresheje uyijyamo, urabusuzugura, ibyemezo ababutwaye bafashe ukabifata nk’ibikangisho n’igitugu kuko uba uzi ko utabakeneye, nyamara bo baba bazi ko rimwe uzabakenera.

Ibya karerembya ubifata nk’ikinamico ukibaza impamvu abantu bagereka umwenda ku wundi, agatangamwuka bagafata nk’ubwishingizi bw’ubuzima bwawe, babikubwira ukumvira mu gutwi kumwe bigasohokera mu kundi bakubwira imipaka ucaho ukibonera izindi mbibi ushaka … kukugorora kose bikaba ingorane kubera kunangira biri muri wowe, atari uko utumva ahubwo ari ukubera cya cyorezo ODD.

Mu byo So yanditse mu ibaruwa mvuga, hari aho agira ati: “N’iyo byaba biguteye isoni kuba warigeze kwirahira ko utazakenera ubu bwato, aho ukenereye kugenda mu nyanja, ntibizagutere ubwoba. Abasare barakwakira mu bwato bwabo kuko ni bugari buhoramo imyanya, kabone n’iyo waba warigeze gutera ibisongo ku bwato ngo bukunde busome burohame, bazagutwara. Ni ubwato bwa bose.” Yakomeje agira ati “Ariko bana banjye nimumara kuyoboka ubwato, muzumvire abasare, kuko kutabizera niko kuzungura ubuzongwe bw’abo mukomokaho nanjye ndimo.

Barihangana ariko iyo bibangamiye inyungu z’abandi bagenzi, bagushyira mu cyumba kiri hasi iyo, ukajya kwitekerezaho. Akenshi igihe kiragera ukababarirwa ukongera ukareba umucyo, iyo ugerageje kubarwanya, kuko nta wundi wasigara agashya, aho kugira ngo ubwato burohame, barakureka ugahona – ukarohama wenyine.”

Ngiyi inyanja mwogamo mutazi, nimugira Imana Kazubwenge azayibabwira, kuko yayirohamyemo ararokoka. Inama nabagira, mukore icyatuma muguma mu bwato, nimutanabishaka, ntimuzivunire ubusa muhungabanya ababurimo.

Nshuti zanjye rero, reka nsoze iyi baruwa mbifuriza kugira umwaka mwiza wa 2020 n’icyerekezo gifite intego, mucyeza abasare banyu.

Ntwari Pie


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza