Ifungwa ry’umupaka wa Gatuna: Museveni agaragaza ukwivanga kwe nk’imvano y’ikibazo

Yanditswe na Albert Rudatsimburwa
Kuya 1 Werurwe 2020 saa 03:15
Yasuwe :
0 0

Ubwo yari avuye mu nama yabereye i Gatuna ihuje ibihugu bine mu minsi ishize, Perezida Yoweri Museveni yahagaze inshuro nyinshi muri Kabale, aganira n’abaturage. Yababwiye ko ifungwa ry’umupaka ari ingaruka z’amakimbirane ari imbere muri FPR, yatumye bamwe mu bari bayigize bahunga u Rwanda.

Ati "Imvano y’ikibazo ni uko aba abantu twafashije ubwo bari bafite ibibazo, bamaze gusubira iwabo batangiye gucikamo ibice." yemera ku nshuro ya mbere ko afite uruhande abogamiyeho mu cyo yise ibibazo by’imbere mu Rwanda.

Mu kwemera ko yivanga mu bibazo by’u Rwanda, Museveni ntabwo avuga impamvu uruhande yafashije, muri uko “gucikamo ibice” rwahisemo guhungira muri Uganda nk’ahantu hari ubwihisho busesuye: Ni we wabibye ayo macakubiri; ni we wiyegereje abo bahunze ngo bakore ibyagejeje ku “gufungwa” k’umupaka.

Rero Museveni afite ukuri ko umupaka ufunzwe kubera uburyo yiyegereje abantu bo muri FPR bagahunga igihugu, akabafasha gushinga umutwe w’iterabwoba.

Uburyo Museveni abibonamo ni uko abahunze igihugu bahindutse abakora iterabwoba, bari ku rundi ruhande rw’umupaka bashimuta abanyarwanda, mu cyitwa gushakisha abakekwaho ubutasi. Iki nacyo gisobanura ifungwa ry’umupaka.

Museveni ntabwo yifatanyije n’abahunze bakajya mu bikorwa by’iterabwoba gusa, ahubwo yiyemerera ko afasha FDLR, abicanyi batigeze bihana bafite inzozi zo gusubira ku butegetsi ngo basoze “akazi” ko gutsemba igice cy’abanyarwanda barokotse Jenoside mu 1994, yahitanye abasaga miliyoni imwe.

Mu kugaragaza uburyo ashyigikiye uwo mugambi, Museveni yashyizeho Minisiteri ihuza ibikorwa bya FDLR n’indi mitwe yayiyomoyeho nka RUD Urunana na MRCD-FLN (irimo n’abitandukanyije na RNC). Mu migambi yose bafite, Minisitiri we ushinzwe ibikorwa by’akarere ashobora no kwitwa “Minisitiri ushinzwe Ubufasha kuri FDLR”.

Muri uwo mwanya, Museveni yashyizemo Philemon Mateke w’imyaka 87, kubera umubano we wa hafi na MRND, ishyaka ryayoboye umugambi wa Jenoside yakorewe Abatutsi ari nayo FDLR ikomokaho. Mateke wavukiye mu Rwanda ni umuntu ugendera ku bitekerezo bya Parmehutu na Hutu Power.

Kuwa 14-15 Ugushyingo 2018, Philemon Mateke yahamagaje inama mpuzabikorwa hagati ya RNC na FDLR I Kampala. Iyo nama yabereye muri Serena Hotel.

Nk’uko byavuze n’abari abayobozi muri FDLR bafashwe bavuye muri iyo nama bashaka gusubira muri RDC, bakoherezwa i Kigali, Mateke yababwiye ko afite “ubutumwa budasanzwe” bwa Perezida Museveni, kuko yakoranyije inama mu izina rye.

Col Jean Pierre Nsekanabo aka Theophile Abega wari ushinzwe iperereza rya gisirikare muri FDLR na Ignace Nkaka wamenyekanye nka LaForge Fils Bazeye wari komiseri ushinzwe itangazamakuru akanaba n’umuvugizi wayo, bavuze ko Museveni yasabye imitwe yombi guhuza imbaraga kugira ngo bagabe igitero kuri FPR kirangajwe imbere n’amoko menshi.

Igikomeye ariko, Museveni yari yabemereye kongera ubufasha abaha, mu butumwa bwihutirwaga cyane bwo gusenya ibikorwa remezo by’ingenzi by’u Rwanda no gusubukura ibikorwa by’iterabwoba ku hantu hahurira abantu benshi nka za gare n’amasoko, bagamije kubiba ubwoba mu baturage.

Nta kabuza ko ibi bigira Uganda ya Museveni igihugu gitera inkunga iterabwoba hagamijwe gukomeza umugambi wa Jenoside, ushingiye ku byiyemererwa na FDLR n’imitwe yayiyomoyeho, bigamije gusoza umugambi wo gutsemba Abatutsi wari ufitwe na Ex FAR n’Interahamwe, ukarogowa n’intsinzi ya FPR mu 1994.

FDLR ifite umugambi wo gutsemba Abatutsi, yagenjeje make ku kwihuza na RNC ya Kayumba Nyamwasa.

Mateke yabijeje ko nk’umuntu wakoranye bya hafi n’abantu bateguye Jenoside, bakwiye kumwizera. Ubundi mu myaka ya za 1970, Mateke yigeze gutegura ubugizi bwa nabi bwo kwibasira abanyeshuri b’Abatutsi ahitwa Mutolere mu Bufumbira.

Nanone hagati ya 2010 na 2014, abarwanyi ba RNC bateye gerenade muri za gare n’amasoko mu Rwanda, aho abantu 14 b’inzirakarengane bahasize ubuizima naho abasaga 400 barakomereka.

RNC na FDLR basangiye iyi myumvire y’ubugizi bwa nabi. Uwo ni wo mugambi Museveni yiyemeje gushyigikira, mu byo atekereza ko ari ugushyigikira uruhande rumwe mu makimbirane “ari imbere” muri FPR.

Urwango afitiye FPR rwatumye yibeshya ko hari igice mu Rwanda gishyigikiye ubwicanyi bukorerwa inzirakarengane, mu buryo RNC na FDLR babikozemo kandi bakomeje no gushaka kubikomeza. Ni impamvu Museveni asangiye n’abakora iterabwoba bakorana kimwe n’iyo mitwe ishaka gukomeza Jenoside.

Abari abarwanyi ba RNC na FDLR bafatiwe muri RDC bakoherezwa mu Rwanda ubu bakaba bari imbere y’inkiko cyangwa mu kigo cya Mutobo kinyuzwamo abahoze ari abasirikare, bagaruka ku byo bahuye nabyo muri Uganda bigizwemo uruhare n’Urwego rwa gisirikare rushinzwe iperereza, CMI, mbere yo kujyanwa mu myitozo mu mashyamba ya Congo.

Ijambo rya Museveni i Kabale rigaragaza ukwemera ko yafashije uruhande rw’abanyabyaha mu gucikamo ibice muri FPR, bahunze ubutabera bagashinga RNC ku nkunga ye.

Mbere yo kwemera ibi, Museveni yakomeje kwinangira ko afasha Kayumba Nyamwasa. Nyamara afasha mu buryo bweruye FDLR ndetse yashyizeho Minisiteri ibishinzwe. Ku bwe bisa n’aho gufasha abajenosideri bitangiza izina rye kurusha gufasha abakora iterabwoba.

Umupaka w'u Rwanda na Uganda ntabwo ukiri nyabagendwa nka mbere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .