00:00:00 IGIHE NETWORK KN KINYARWANDA EN ENGLISH FR FRANCAIS

Igisobanuro cya ‘Tweet’ ya Lt Gen Muhoozi kuri Perezida Kagame mu mboni z’abasesenguzi

Yanditswe na Musangwa Arthur
Kuya 21 January 2022 saa 12:12
Yasuwe :

Hashize iminsi mike umuhungu wa Perezida wa Uganda akaba n’Umugaba w’Ingabo z’iki gihugu zirwanira ku butaka, Lt Gen Muhoozi Kainerugaba, yanditse kuri Twitter ubutumwa bwagarutsweho na benshi, bamwe batangira kwibaza niba hari icyo byaba bivuze ku mubano iki gihugu gifitanye n’u Rwanda.

Muri ubu butumwa Lt Gen Muhoozi yanditse ku wa 16 Mutarama 2022, yagaragaje ko afata Perezida w’u Rwanda, Paul Kagame, nk’umwe mu bagize umuryango we, ko abamurwanya bakwiye kwitonda.

Yagize ati “Uyu ni marume/data wacu. Abamurwanya baba barwanya umuryango wanjye. Bakwiye kwitonda.”

Nyuma y’iminota mike ubu butumwa bugeze kuri Twitter, bwatangiye gukurura impaka, bamwe bashimira uyu muhungu wa Perezida ko ateye intambwe yo kwerekana ko ibihugu byombi bigifitanye igihango gikomeye nubwo umubano umaze igihe kinini utameze neza.

Uretse aba, hari abandi bagaragaje ko ubu butumwa bwa Muhoozi bwaba ari amarenga ko ibintu hagati y’ibihugu byombi bigiye gusubira mu buryo, mu gihe hari n’abagaragazaga ko ibyo yanditse ari uburyarya gusa nta kindi bihatse.

Uku kujya impaka kwaturukaga ahanini ku kuba u Rwanda na Uganda bimaze igihe kinini bidacana uwaka, bitewe n’uko ubuyobozi bw’u Rwanda bushinja ubw’iki gihugu cy’igituranyi guhohotera Abanyarwanda ndetse no gushyigikira abagamije guhungabanya umutekano w’igihugu.

Bukeye bwaho, Perezida Kagame yakiriye mu biro bye intumwa yihariye ya Perezida Museveni, Adonia Ayebare, benshi bati ’burya Lt Gen Muhoozi yacaga amarenga’. Hari n’amakuru yahise atangira gucicikana ku mbuga nkoranyambaga avuga ko imipaka ihuza ibihugu byombi yaba igiye kongera gufungurwa.

Buhatse iki?

Mu gihe benshi bakomeje kwibaza icyo ubu butumwa bwa Lt Gen Muhoozi bwaba buhatse, IGIHE yifashishije bamwe mu basesenguzi ba politiki, mu kumenya niba ari ubutumwa Abanyarwanda bakwiye kubakiraho icyizere cyabo koko.

Ignatius Kabagambe ukunze gukora ubusesenguzi kuri politiki y’akarere, yavuze ko nta cyizere abona gikomeye mu butumwa bwa Muhoozi ariko na none yemeza ko atari ubwo guteshwa agaciro.

Ati “Ntabwo wabitesha agaciro ariko nta n’agaciro gahambaye wabiha bitari uko Lt Gen Muhoozi ari ntacyo ari cyo, ni Umugaba w’Ingabo zirwanira ku butaka, ni umwana wa Perezida. Wavuga ko ari mu mwanya ukomeye muri Leta ya Uganda ndetse no mu gisirikare.”

Yakomeje avuga ko impamvu ubutumwa bwa Muhoozi butahabwa agaciro gakomeye ari uko asanga ibyo yanditse yarabikoze nk’umuntu ku giti cye.

Ati “Gusa nta kindi kintu kinini bivuze cyane kubera ko icya mbere ntabwo ari Umuvugizi wa Guverinoma, ntabwo akora muri Perezidansi, ntabwo akora muri Minisiteri y’Ububanyi n’Amahanga, we yabivuze nk’umuntu.”

Nubwo bimeze gutyo, Kabagambe asanga “ibyo Muhoozi yavuze bidakwiye guteshwa agaciro kuko ngo hari ibyo yavuga ugasanga bifite ireme ariko kuko bitanyuze mu nzira zisanzwe zizwi za politiki ntibigire byinshi bihindura.”

Ku bijyanye n’urugendo Adonia Ayebare aherutse kugirira mu Rwanda nk’intumwa ya Museveni, Kabagambe yavuze ko bitahuzwa cyane n’ibyo Muhoozi yanditse, cyane ko n’ibyavuye muri ibi biganiro bitaratangazwa.

Ibyo Kabagambe yavuze asa n’aho abihuriyeho n’Umwarimu wa Politike muri Kaminuza y’u Rwanda, Dr. Ismael Buchanan.

Dr. Ismael Buchanan yavuze ko ubutumwa Muhoozi yanditse atari bwo Abanyarwanda baheraho bagira icyizere ko ibintu bigiye kujya mu buryo.

Ati “Ntabwo ari ubutumwa bwa Muhoozi bugiye guhindura ibintu biri kubera mu Rwanda kandi ikindi cya kabiri njye uko mbibona kubivuga no kubyandika ntaho bihuriye no kubikora.”

“Niba bandika ibyiza, ariko Abanyarwanda bakaba bakomeje gutotezwa byaba ari ikibazo gikomeye. Icya mbere ni uko amagambo yagendana n’ibikorwa kuko igihe kimaze kuba kinini. Mbona uruzinduko rwa Adonia Ayebare ntaho ruhuriye n’ubutumwa bw’uriya mugabo. Afite uko abona ibintu na se umubyara afite uko abona ibintu, ibindi ni ibyo abantu bitekerereza.”

Yakomeje agira ati “Ubutumwa yanditse buravuga ibintu byiza ariko ntabwo buzagira byinshi buhindura, uri ku buyobozi ni we ukwiye guhindura ibintu.”

Abakoresha ururimi rw’Igifaransa bazi neza ijambo ‘le fou du roi’ ryakoreshwaga iyo bashakaga kuvuga umuntu wakoraga ibwami wabaga ufite akazi ko kumususurutsa no kumugusha neza. Ibi akabikora no ku bashyitsi bagendereye Umwami kugira ngo barusheho kwisanga.

Iri jambo kandi rinakoreshwa igihe umuntu ashaka kugaragaza wa muntu w’ibwami cyangwa uturuka mu muryango w’abantu bakomeye ariko ufite imyitwarire ihabanye n’umwanya arimo.

Uyu akenshi usanga ari wa muntu, udatinya Umwami ndetse utanagira rutangira igihe hari akamuri ku mutima. Mu 1340 ubwo Abongereza n’Abafaransa bari bahanganye mu ntambara yiswe ‘Battle of Sluys’, aba ba nyuma barashe ubwato bw’Abafaransa maze bishengura Umwami Phillippe VI, ku buryo yirirwanye isura ibishe ku maso, ab’ibwami bose batinya kumwegera.

Nyuma yo kubona ko bose bashobewe, ‘Umusazi w’ibwami’ yarombotse aramwegera, ati “Nyagasani ariko buriya uzi ko abasirikare b’u Bwongereza ari ibigwari ku rwego ruhanitse, ntibashobora no gutinyuka ngo basimbuke mu mazi nk’uko abacu babikora.”

Phillippe VI yumvise amagambo uyu mugabo amubwiye atekereje n’uburyo u Bwongereza bumugeze habi araturika araseka.

Uretse gutebya no kurangwa n’urwenya, aba bantu baba bazwiho kugira amabanga menshi y’ibwami ndetse rimwe na rimwe kuyabika bikabagora.

Nubwo ari umwana wa Perezida ndetse akaba n’Umugaba w’Ingabo za Uganda zirwanira ku butaka, Muhoozi ni wa muntu utazatinya kubyuka yandika kuri Twitter ko abona ‘umugore we ahebuje abandi uburanga ku Isi ya Rurema’, ko UPDF ari kimwe mu bisirikare bikomeye ku Isi, ko se ari mu ba Jenerali b’ibihe byose ko ndetse Perezida Kenyatta na nyakwigendera Mowzey Radio ari abavandimwe be akunda cyane.

Muhoozi kandi ni wa mugabo ushobora kukubwira ko uretse Rwigema na Che Guevara nta wundi uyingayinga ubutwari se.

Bamwe bashingira kuri iyi mwitwarire ye bakagaragaza ko n’ibyo yanditse kuri Perezida Kagame bishobora kuba biri mu murongo w’ibyo asanzwe yandika ndetse benshi bakabifata nk’urwenya.

Bamwe mu bakurikiranira hafi Lt Gen Muhoozi, bagaragaza ko iyi myitwarire ashobora kuba ayiterwa na ka manyinya cyane ko abakunze gusohokera mu kabari gaherereye i Lugogo kazwi nka Route 256 bazi ko akabasha.

Hari n’abajya batebya bakavuga ko igihe umuhamagaye ukamubura kuri telefone nta handi ukwiye kumubariza uretse muri aka kabari.

Ubutumwa Lt Gen Muhoozi Kainerugaba yanditse kuri Perezida Kagame bukomeje kwibazwaho na benshi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .