Neil Edwards akeneye umujyanama mu buryo bwihutirwa kandi nemeye kwitanga

Yanditswe na Albert Rudatsimburwa
Kuya 28 Mata 2020 saa 04:16
Yasuwe :
0 0

Wa Munyamerika wimenyereza umwuga yagarutse gushaka abamwitaho, ashobora kuba arambiwe kuguma mu rugo i Washington DC kubera COVID-19. Neil Edwards wimenyereza umwuga mu Kigo Council on Foreign Relations cyahoze cyubashywe, yanemerewe kwimenyereza umwuga kuri blog ya John Campbell wo muri icyo kigo.

Uburyo Campbell yibwiye ko nta kibazo biteye kuba umunyeshuri we yakinira kuri Jenoside agatanga ingingo za cyana ku Rwanda, birenze ubwenge.

Uyu wimenyereza umwuga yanditse ko Abanyarwanda bakeneye kurenga Jenoside kuko hashize igihe kinini ibaye. Uyu atekereza ko Perezida Kagame yifashishije “gahunda zikaze” ndetse “akazishakira impamvu” kuri jenoside, na Leta zunze Ubumwe za Amerika, kubera gushinjwa kunanirwa “kugira icyo ikora” ngo ihagarike Jenoside, "yemera iyo myumvire." Hanyuma akishyanutsa ati "icyo gihe igihe cy’ubwihanganirwe kirangira ryari?"

Uyu musore ntabwo azi uko Jenoside yahagaritswe. Byongeye, asa n’aho atekereza ko igihugu cyananiwe kugira icyo gikora ku bibi ndengakamere, cyagize ubuntu burenze bwo gutanga “igihe cy’ubwihanganirwe.” Bigomba kuba ari uko areshya. Ese abanyarwanda bazi ko muri iki gihe cyose babayeho kubera ubuntu bwa Amerika? “Igihe kirageze” munyeshuri wikuza!

Hari ibindi bigaragaza urwego rw’imitekerereze ye. Avuga ko Abanyarwanda benshi bari impinja mu gihe cya Jenoside ku buryo batagomba gukomeza kwihanganira "umurongo ukaze w’ubutegetsi bwa Kagame."

Ni iyihe myaka iboneye yo kwihanganira politiki ya Kagame? Izo politiki ni nziza ku buryo umuntu wese akwiye kuzishimira cyangwa ni mbi mbi ku buryo nta wazihanganira.

Imitekerereze yirengagiza kimwe cya gatatu cy’abaturage nta gaciro ifite kuri bibiri bya gatatu. Umunyeshuri wimenyereza umwuga ashobora kubabarirwa ko atari abizi, ariko abajyanama be bagomba gusoma ibyo yanditse mbere yo kubitangaza. Bitabaye ibyo, bakomeje gutenguha buri wese ufite aho ahurira n’ikigo cyabo.

Ariko uyu musore ntiyagarukiye aho gusa mu kwikoza isoni kimwe n’abantu bamureka agakoresha internet yabo. Ashinja abagize Inteko Ishinga Amategeko gukorera FPR “aho kuba ababatoye” ndetse n’ubucamanza bukaba butigenga.

Icya mbere, Inteko Ishinga Amategeko y’u Rwanda ntiyoborwa na Kagame. N’ikimenyimenyi, Itegeko Nshinga ribuza ko umukuru w’igihugu na perezida n’umutwe w’abadepite baturuka mu mutwe umwe wa politiki. Igikomeye, Abanyarwanda batora imitwe ya politiki aho kuba abantu, bivuze ko abadepite bahagarariye Abanyarwanda bose aho kuba igice runaka.

Mu matora y’abadepite aheruka yabaye mu 2018, FPR n’imitwe ya politiki byishyize hamwe batsindiye imyanya 40 gusa kuri 80. Indi myanya 40 yagabanywe n’andi mashyaka, abagore, urubyiruko n’abahagarariye abafite ubumuga. Umuntu w’injiji wenyine, w’Umunyamerika wimenyereza umwuga ni we watekereza ko kugabana imyanya ari gihamya ko Inteko Ishinga Amategeko ari iya FPR.

Umunyamahanga wasuye u Rwanda bwa mbere yigeze kumbwira ko amatora yo mu Rwanda yibwa. Nabajije uko bigenda. Yavuze ko umugore wiyamamarije kuba umudepite yamubwiye ko yatsinze amatora ariko uwo bari bahatanye bitangazwa ko ari we watsinze.

Namubwiye ko ibyo bidashoboka. Ni ishyaka rye bwite rishobora kuba ryaramwanze rikamusimbuza undi, kuko ishyaka ryonyine niryo rishyigikira kandidatire y’umuntu ku giti cye. Yaratunguwe yisegura avuga ko yahawe amakuru atari yo, ku buryo yari akomeje gusangiza bagenzi be ayo makuru atabizi.

Uyu wimenyereza umwuga na we nibyo arimo. Kuba ubucamanza burya ruswa, uwimenyereza umwuga yatanze urugero rw’urubanza rwa Diane Rwigara. Ukurikije uburyo abivuga, umuntu wamwihanganira aramutse atekereje ko yakatiwe gufungwa burundu. Uyu ni umuntu wagizwe umwere n’inkiko uyu musore arimo guharabika.

Na Victoire Umuhoza ntiyakatiwe urwo gupfa nubwo hari umurundo w’ibimenyetso ku byo yakoze ndetse urukiko rukamuhamya gutera inkunga FDLR yakomotse ku ngabo za Force Armée Rwandais n’Interahamwe zagize uruhare muri Jenoside yakorewe Abatutsi mu 1994 ndetse abana bazo icyo gihe avuga ko “bari impinja”, bavuga ko biyemeje "kurangiza akazi" katangijwe n’ababyeyi babo, bamwe barimo gusazana nabo mu mashyamba ya RDC aho bafite intwaro kandi biteje akaga.

Uyu muntu wimenyereza umwuga biragaragara ko atumva neza uburyo ingengabitekerezo ya Jenoside ihererekanywa mu bisekuruza.

Ku munsi uyu wimenyereza umwuga yiyemeje kwandika ku Rwanda, ikinyamakuru New York Times cyasohoye inkuru ku mpungenge z’uburiganya mu matora muri Amerika. Nk’umuntu uba muri Washington DC, Umurwa Mukuru wa politiki muri Amerika, Neil ari mu mwanya mwiza wo kwandika ku kintu bishoboka ko hari ibyo akiziho, kurusha ku Rwanda adafite icyo aruziho.

Ariko nk’uko nta muntu n’umwe usa nk’umukurikirana cyangwa ngo amugire inama aho yimenyereza umwuga, akeneye kugaruka i Kigali. Niyemeje gufata umwanya muto ku gihe cyanjye nkamufasha; ikintu akeneye cyane mu buzima bwe ariko bisa nk’aho nta muntu urimo kugikora i Washington, DC.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .