Muri iyi myaka, ba mukerarugendo bagana u Rwanda bishimira inyamaswa zihagaragara nk’ingagi zo mu Birunga, Intare n’Inkura ziri muri Pariki y’Akagera, gutembera muri Pariki ya Nyungwe ku kiraro kiri mu kirere, no gucumbika mu mahoteli yubakanye umwihariko w’umuco gakondo, utamenyerewe ahandi n’ibindi byiza birimo imirambi, imisozi n’ibibaya biteye ubwuzu.

Mu kugaragaza isura nyayo y’ibikururira amahanga kugana u Rwanda, ba gafotozi babiri Philippe Nyirimihigo na Gaël Ruboneka Vande weghe bakusanyije amafoto y’ingenzi ari no mu gitabo “This is Rwanda” kizasohoka muri uyu mwaka wa 2018.

The Culturetrip dukesha iyi nkuru ivuga ko n’ubwo bigoye gufata buri kintu cyose mu bigaragaza umwihariko w’ubwiza bw’u Rwanda, Nyirimihigo na Vande bagerageje.

Igitabo cyabo kigaragaza ubwiza bw’igihugu mu mafoto 145 yafatiwe mu ndege binyuze mu ngendo bakoze mu bice bitandukanye by’urwa Gasabo.

Nyirimihigo na Vande ni bo bashinze Ikigo gikora ibijyanye n’Itumanaho rishingiye ku mafoto cya Illume Creative Studio, ndetse bakaba bamaze imyaka itanu bakora kuri iki gitabo kuva mu 2013.

Mu rugendo rwabo kubera ihindagurika ry’ikirere byatumaga bahura n’imvura, hari aho bakoze ingendo zimwe na zimwe bakoresheje indege y’Ikompanyi Nyarwanda, Akagera Aviation.

Vande yagaragaje ko batagowe no gufata amafoto aho yagize ati “U Rwanda ni igihugu gito ku buryo kajugujugu ikugeza mu bice byose by’igihugu mu kanya nk’ako guhumbya. Ku rundi ruhande igihugu kigizwe n’ibibaya, ibishanga, imisozi miremire, ibirunga n’ibiyaga byinshi ku buryo kubibumbira mu gitabo kimwe bitaba bihagije.”

Igitabo “This is Rwanda” ni umushinga wa mbere muri myinshi yateguwe na Nyirimihigo na Vande igaragaza ubudasa bw’u Rwanda mu byiza nyaburanga. Amafoto menshi ari muri iki gitabo ni ubwa mbere agiye gushyirwa ahagaragara.

Amafoto bakusanyije agaragaza ukwiyuha icyuya no kwitanga byashibutsemo iterambere ritayegayezwa igihugu kimaze kugeraho nyuma y’imyaka 24 kivuye mu bihe bya Jenoside yakorewe Abatutsi byagishegeshe bikomeye.

Aha ni ku marembo ya Pariki y'Akagera unyuze mu Majyepfo yayo

Intangiriro z’umusozi wa Muhororo hafi y’igishanga kiri mu Majyaruguru y’Ikiyaga cya Rwanyakizinga muri Pariki y’Igihugu y’Akagera

Impalage zigendagenda mu kibaya cya Kirara muri Pariki y'Akagera mu gihe cy'imvura

Muri Pariki y'Igihugu ya Nyungwe hari ibiti bikuze byimejeje mu myaka yo hambere

Ubwiza bw’ibirunga ubirebeye hafi y’ishyamba rya Gishwati

Ifoto y'ibikoresho by’ubwubatsi ku nkombe z’Ikiyaga cya Kivu

Ikirwa kiri mu Kiyaga cya Kivu hafi y'Akarere ka Karongi

Amazi y'Igishanga cya Rugezi yisuka mu Kiyaga cya Burera

Muhabura iri mu birunga biri mu munani bigize uruhererekane rw’urusobe rw’ibirunga byo ku isunzu rya Congo Nili

Ku Kiyaga cya Kivumba uri mu Majyaruguru yacyo

Iterambere rizamuka mu gace kari mu Burasirazuba bw'Umujyi wa Kigali

Inyubako ya Kigali Convention Center iri mu zikomeye mu Rwanda

Ikirere cyo mu Karere ka Ruhango werekeza mu ka Huye ho mu Ntara y'Amajyepfo

Umushinga w'amashanyarazi akomoka ku mirasire y'izuba wa Agahozo Shalom uri hafi ya Rwamagana mu Ntara y'Iburasirazuba

Ubwiza bw'imisozi yo mu Burasirazuba bw'u Rwanda ahazwi nk'i Gahini

Amafoto:Philippe Nyirimihigo na Gaël R. Vande/Illume Creative Studio