Abakora ubukerarugendo bushingiye ku muco na siporo bagiye gukorera ku igenamigambi bahuriyeho

Yanditswe na Twarabanye Venuste
Kuya 11 Ukwakira 2019 saa 08:16
Yasuwe :
0 0

Abafatanyabikorwa ba Minisiteri y’umuco na Siporo, bahurira mu bukerarugendo bushingiye ku muco na siporo bashyizeho igenamigambi bahuriyeho hagamijwe guteza imbere urwo rwego no gukoresha neza amahirwe arurimo.

Mu nama ya mbere yahuje abahurirye mu bukerarugendo bushingiye ku muco na siporo (cultural and Sport Tourism Cluster) kuri uyu wa Kane, bamwe mu bagize iryo huriro bagaragaje ko riziye igihe kuko hari byinshi rizabafasha mu iterambere ry’ibikorwa byabo.

Eugene Bridge uyobora ihuriro rishinzwe umuco n’amateka muri sosiyete itwara ikanayobora ba mukerarugendo (RSGA) avuga ko bizatuma imikorere igenda neza kandi ibyerekeye akazi kabo bakabiganiriramo.

Ati “Niba tumaze kuhabona [ahabera ubukerarugendo] tumenye ngo hari ibikorwa remezo byo kuhagera, niba hakenewe umuhanda tubigaragaze. Hari ikindi ukajya nko ku rutare rwa Ndaba, urwa Kamegeri ntumenye niba biri mu maboko ya RDB, Akarere cyangwa undi wundi? Ibyo byose rero jye nishimye tuzajya tubihera umurongo muri iri huriro.”

Yavuze kandi ko ahabera ubukerarugendo cyane ubushingiye ku muco, hazajya hahora ibya ngombwa nkenerwa, kuburyo igihe cyose bazajya bahajyana ba mukerarugendo bazi ko bimeze neza.

Amb. Robert Masozera, Umuyobozi w’ingoro z’umurage w’u Rwanda akaba n’umuhuzabikorwa w’iryo huriro, yabwiye IGIHE umusaruro ukomeye w’iyo nama ya mbere ari ugushyiraho igenamigambi bahuriyeho.

Ati “ Haravamo ikintu kimwe gikomeye cyane. Ni ukuvuga ngo umuntu wese waje hano yaje azanye igenamigambi nibura muri uyu mwaka turimo. Turaza gufata ibikorwa bya buri muntu tugerageze kubishyira mu mbonerahamwe imwe tugire igenamigambi duhuriyeho twese. Turinoze, tuvanemo bya bindi bigongana, tuvanemo bimwe byahuraga, duhurize hamwe ariko noneho tugirane inama yo gukora nk’umuntu umwe turashaka noneho kujya dukora tudatatanye.”

Gukorera hamwe bikazatuma urwego rw’ubukerarugendo bushingiye ku muco na siporo rutera imbere, rugateza imbere abarukoramo ndetse rukazamura ubukungu bw’igihugu.

Yakomeje avuga ko ibyo bizatuma amasoko ya ngombwa yose bayabyaza umusaruro.

Ati “ Dukore nk’abantu bamwe batahiriza umugozi umwe, bajya imigambi imwe. Kuko muri iki gihugu twaje gusanga harimo amahirwe, tutajyaga dukoresha. Dutanze nk’urugero izi nama zibera hano nini cyane, hari iyi ya Youth Connect hari n’izindi, turi kwibaza ngo aba bashyitsi nibaza ko ari twebwe dufite ibicuruzwa, ni uwuhe musururo tuzabyaza izo nama kandi tukabikora tudatatanye.”

Masozera yakomeje agira ati “Twebwe mu ngoro z’umurage dufite ingoro z’umurage ariko ntabwo dufite ababashaka, hari abandi bafite amahoteri, hari abandi bafite amaresitora, hari abandi bafite ibikorwa by’ubukorikori, hari abandi bafite imbyino tukavuga tuti ni gute twakora nk’ikintu kimwe. Abantu bari hano dukoze nk’umuntu umwe twakora uruhererekane bigatuma wa mushyitsi waje azi ko amara iminsi itatu ine gusa hano y’imana, tumugumana igihe kirekire mu bukerarugendo turavuga ngo uko umuntu atinda ninako asiga amafaranga, niko ya mirimo iboneka.”

Ubukerarugendo bushingiye ku muco na siporo burimo; ingoro z’umurage, ahantu Nyaburaga, imikino n’amarushanwa atandukanye n’aho bibera, imbyino, ubugeni n’ibyerekeye Sinema na muzika.

Ishami ry’Umuryango w’Abibumbye rishinzwe guteza imbere ubukerarugendo (UNWTO) rigaragaza ko, Abakerarugendo 37% basura ahantu bashingiye ku byiza nyaburanga by’umuco bihari ndetse abagera kuri 57% bahitamo ibihugu bazajya kuruhukiramo bagendeye ku byiza nyaburanga by’umuco bihari.

Mu Rwanda nta mibare igaragaza ibyinjizwa n’ubukerarugendo bushingiye ku muco by’umwihariko. Cyakora Imibare y’ikigo cy’igihugu cy’iterambere igaragaza ko mu mwaka wa 2017 ubukerarugendo bwinjirije u Rwanda miliyoni $401, ariko intego ni ukugera kuri miliyoni $ 800 mu 2024.

Jackson Hakiza Ushinzwe isahami rishinzwe kongera ibyiza bisurwa Kigo cy'iterambere cy'u Rwanda, yavuze ko hari amahirwe atarabyazwa umusaruro bari kunoza mu gishushanyo mbonera cyemejwe mu 2016
Rurangayire Guy Didier usinzwe Siporo muri MINISPOC yavuze ko hari amahirwe menshi mu bukerugendo bushingiye kuri siporo harimo ibikorwaremezo bituma u Rwanda rwakira amarushanwa akomeye arwinjiriza
Abafatanyabikorwa ba Minisiteri y'Umuco na Siporo mu bukerarugendo bushingiye ku muco na siporo
Uwiringiyimana Callixte ushinzwe igenamigambi n'imurikabikorwa muri MINISPOC yavuze ko hari amahirwe mesnhi ku gihugu n'abakora ubukerarugendo bushingiye ku muco igihe bakorera hamwe yabyaza umusaruro
Amb. Robert Masozera, usanzwe ayobora ’ingoro z’umurage akaba n’umuhuzabikorwa w’ihuriro ry'abafatanyabikorwa mu bukerarugendo bushingiye ku muco na siporo
Eugene Bridge uyobora ihuriro rishinzwe umuco n’amateka muri sosiyete itwara ikanayobora ba mukerarugendo (RSGA) avuga ko ihuriro baryitezeho imikorere myiza

Amafoto: Ami pacifique Dushimimana


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza