Hotel Akagera Game Lodge izacumbikira abazitabira CHOGM yashyizwe ku rwego rw’inyenyeri enye

Yanditswe na Ntabareshya Jean de Dieu
Kuya 15 Mata 2021 saa 08:32
Yasuwe :
0 0

Hotel Akagera Game Lodge y’Urwego rw’Ubwiteganyirize mu Rwanda (RSSB) iherereye muri Pariki y’Igihugu y’Akagera mu Karere ka Kayonza ku nkengero z’Ikiyaga cya Ihema, imaze imyaka ibiri ivugururwa yashyizwe ku rwego rw’inyenyeri enye.

Iyi hoteli yubatswe mu 1974, iza kugurwa na RSSB mu 2013 hagamijwe gushora amafaranga mu bikorwa bizagira uruhare mu iterambere ry’igihugu bikanahindura imibereho myiza y’abaturage.

Nyuma yo kuyigura RSSB yashatse kuyivugurura ikajya ku rwego rwiza rukurura ba mukerarugendo. Mu 2018 yagiranye amasezerano na Sosiyete yo muri Afurika y’Epfo ikora ibijyanye n’amahoteli, Mantis kugira ngo ivugururwe.

Ubuyobozi bwa Mantis bwavuze ko mu mirimo yo kuyivugurura hibanzwe cyane mu kwagura ibyumba no kubishyira ku rwego rwiza kuruta uko byari bimeze mbere. Hongewemo ibyumba bibiri bifite ubushobozi bwo kwakira abakuru b’ibihugu.

Uwari Umuyobozi wungirije ushinzwe Ishoramari n’Ubukungu muri RSSB, Gacandaga Jean Marie, yavuze ko uru rwego rumaze gushora amafaranga agera kuri miliyari 8 Frw kugira ngo iyi hoteli ivugururwe kuko yari ishaje.

Yagize ati “Twayiguze ishaje, ni yo mpamvu twashoyemo amafaranga kugira ngo igere ku rwego rwiza. Ubwo twayijyagamo yego abantu benshi barayisuraga amafaranga akaboneka ariko ntabwo yari ku rwego twifuza.”

“Urwego ubu iriho ni inyenyeri enye kandi ni rwiza twizeye ko ari umushinga mwiza, rero iyo urebye n’imibare usanga amafaranga yashowemo azagaruzwa.”

Gacandaga yavuze ko kugura iyi hoteli biri mu murongo bihaye wo gukora ishoramari mu mishinga igamije guteza imbere igihugu ndetse n’imibereho myiza y’abaturage.

Akagera Game Lodge iri mu mahoteli azakira abazitabira Inama ya 26 y’Abakuru b’Ibihugu bikoresha ururimi rw’Icyongereza, Commonwealth, izwi nka CHOGM, ibintu Gacandaga avuga ko ari amahirwe akomeye kuba bibaye n’imirimo yo kuyivugurura yarangiye.

CHOGM iteganyijwe kubera mu Rwanda ku wa 21 Kamena uyu mwaka. Iyi nama iba nyuma ya buri myaka ibiri, yagombaga kubera mu Rwanda ku wa 22–27 Kamena 2020 ariko iza gusubikwa ku mpamvu z’icyorezo cya COVID-19, cyahagaritse inama n’ibindi bikorwa bikomeye.

Guverineri w’Intara y’Uburasirazuba, Gasana Emmanuel, yavuze ko iyi hoteli igiye gukomeza kurushaho kubera abaturage ivomo ry’imibereho myiza n’iterambere ry’intara cyane ko ubukerarugendo buri mu nkingi za mwamba bifuza kubakiraho ubukungu.

Yakomeje ati “Turifuza ko ubukerarugendo buba mu bintu bitatu tuzashingiraho iterambere ryacu, birimo guteza imbere ubuhinzi, ubukerarugendo ndetse n’ubucuruzi. Ikindi ariko abaturiye aha ngaha imibereho izagenda ihinduka kuko babona akazi.”

Umuyobozi w’Ishami ry’Ubukerarugendo mu Rwego rw’Igihugu rw’Iterambere (RDB), Belise Kariza, yashimye intambwe imaze guterwa mu bukerarugendo, avuga ko n’ubwo Covid-19 yakomye mu nkokora uru rwego, u Rwanda rudateze gucika intege mu kubushyigikira no kubuteza imbere.

Yashimiye Ubuyobozi bukuru bwa RSSB ku gikorwa cyo gushora imari mu bukerarugendo, avuga ko adashidikanya ko kizatanga umusaruro ushimije mu gihe Covid-19 izaba yacogoye ndetse n’ingendo zigakomeza nk’uko byari bisanzwe.

Hotel Akagera Game Lodge ifite ibyumba 59 harimo igishobora kwakira Umukuru w’Igihugu (Presidential Suite) n’igishobora kwakira abandi bayobozi mu nzego nkuru (Executive Suite).

Sosiyete ya Mantis ifite inshingano zo gukurikirana iyi hoteli umunsi ku wundi isanzwe icunga izindi ebyiri arizo Kivu Marina Bay iri mu karere ka Rusizi na Epic Hotel iherereye mu Karere ka Nyagatare.

Abantu bake ni bo bitabiriye ibirori byo gutaha iyi hoteli mu rwego rwo kubahiriza amabwiriza yo kwirinda Covid-19
Gacandaga yasobanuye uko RSSB yahisemo gushora imari muri hoteli
Uwatembereje abantu muri iyi hoteli yaberekaga uko yagiye ivugururwa
Iyi hoteli ifite imitako y'ubwiza itanga isura nziza ku bayicumbikiwemo
Gacandaga Jean Marie yavuze ko amafaranga ashorwa hagamije iterambere muri rusange
Guverineri Gasana Emmanuel yashimye ko iyi hoteli igiye guhindura imibereho y'abaturage
Umuyobozi w'Ishami ry'Ubukerarugendo, Belise Kariza, yavuze ko u Rwanda rutacika intege mu bikorwa byo guteza imbere ubukerarugendo
Umuyobozi wa Mantis yavuze ko hoteli yashyizwe ku rwego rushimishije
Imiterere y'ibitanda biri muri iyi hoteli
Icyumba gishobora kwakira abayobozi bakomeye
Igitanda kiri mu cyumba gifite ubushobozi bwo kwakira Umukuru w'Igihugu
Umuryango ushobora kuhasohokera ukizihirwa kuko harisanzuye bifatika
Abari muri hoteli baba bitegeye ibyiza nyaburanga birimo amashyamba n'ibiyaga
Imbuga y'Akagera Game Lodge ibereye ijisho
Inyoni nazo ziri mu nyamaswa ziba muri Pariki y'Akagera ku bwinshi
Iyi hoteli iri mu Pariki y'Akagera yitegeye Ikiyaga cya Ihema
Iyo ugana kuri iyo hoteli ugenda ubona inyamaswa zinyuranye zibarizwa muri Pariki y'Akagera

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .