Umujyi wa Rubavu usanzwe ufatwa nk’igicumbi cy’imyidagaduro n’ubukerarugendo mu Rwanda. Mu mpera z’icyumweru abato n’abakuru usanga bagiye kwishimisha ku mucanga za Tam Tam, ku Mashyuza i Nyamyumba n’ahandi bitegeye umujyi wa Goma n’udusozi dukikije ikiyaga cya Kivu.

Iby’iyi mishinga migari ubuyobozi bw’akarere buherutse kubisobanurira abitabiriye umwihererewo wahuje inzego zitandukanye z’aka karere.

Ubuyobozi bw’Akarere ka Rubavu buvuga ko mu myaka itanu iri imbere ku nkengero z’ikiyaga cya Kivu hazaba hujujwe hoteli eshanu nshya ndetse n’ibindi bikorwa bizahindura isura y’ubukerarugendo mu karere.

Umuyobozi w’Akarere ka Rubavu, Mulindwa Prosper mu kiganiro na IGIHE yatangaje ko bakomeje gufasha abikorera bifuza gushora imari mu mahoteli n’ubukerarugendo.

Ati “Izi hoteli eshanu tuzazigeraho binyuze mu gushyiraho ahantu hagenewe ishoramari rinini mu bukerarugendo (Investment Zones), ku bufatanye na RDB, abikorera b’imbere mu gihugu no mu mahanga tuzakomeza kubashishikariza gushora imari muri serivisi z’amahoteli, ndetse tubahe ubufasha mu mitegurire, ibyangombwa, imihanda n’ibikorwaremezo by’ibanze, nkiy’ibanze izubakwa ku butaka bwimuweho abaturage ku mwigimbakirwa wo ku Mashyuza.”

Meya Mulindwa yakomeje avuga ko izi hotel zizaba zifite umwihariko wo gutanga serivisi ziri ku rwego mpuzamahanga, kongerera ubumenyi abakora muri serivisi z’ubukerarugendo, zikaba ahantu ho kwigira no gukorera.

Zitezweho kandi kuzamura umubare w’ibyumba bigezweho ku bantu baza mu nama mpuzamahanga n’abakerarugendo, gufasha urubyiruko kwihangira imirimo, no kuzamura ubukungu bushingiye kuri serivisi.

Nk’iyo uvuye ahubatse Serena Hotel munsi gato, hafi y’ibiro by’Akarere ka Rubavu, usanganirwa n’inyubako ndende ya hoteli y’izina ritaratangazwa ariko amakuru agera kuri IGIHE niuko yubakwa n’umuryango wa Pasteur Bizimungu wahoze ari Perezida w’u Rwanda, kandi izaba ifite inyenyeri eshanu.

Amakuru avuga ko ari hoteli izaba yihagazeho mu Mujyi wa Rubavu, kuko izaba ifite ibyumba birenga kuri 80, ikaba ari iya mbere izaba ifite ubushobozi nk’ubwo muri uwo mujyi. Izaba kandi ifite icyumba cyagutse cy’inama, ibintu bitari bisanzwe cyane muri hoteli z’i Rubavu.

Iyi hoteli kandi izaba ifite ubwogero (piscine) hejuru, ku buryo abari kogera ku gasongero bazajya baba bitegeye ikiyaga cya Kivu.

Iyo ukomeje ukajya mu Murenge wa Nyamyumba naho hazubakwa hoteli nshya y’inyenyeri eshanu, izaba ifite umwihariko wo kwifashisha amashyuza mu byumba, aho gushyushya amazi abantu bakaraba mu byumba bizaba amateka.

Uyu munsi Rubavu ibarurwamo hoteli 24 zifite ibyumba 2,059, ibigera ku 1.471 biherereye mu Murenge wa Gisenyi. Ifitemo ibyumba byinshi ni Serena Hotel ifite ibyumba 69, ikurikirwa na Stipp Hotel ifite 50.

I Rubavu hagiye kubakwa hoteli eshanu zirimo n’iy'inyenyeri eshanu

Hoteli ya Pasteur Bizimungu iri mu zitezweho guhindura isura y'ubukerarugendo bwa Rubavu