Impinduka ziri i Musanze zigaragarira by’umwihariko mu bikorwaremezo birimo imihanda, amashanyarazi, amashuri, amavuriro, inyubako z’imiturirwa, amahoteli, amabanki n’ibindi.

Musanze iri mu turere dutanu tugize Intara y’Amajyaruguru. Ifite umwihariko wo kuba ikungahaye ku bukerarugendo bushingiye ku ngagi zo muri Pariki y’Ibirunga n’ibindi bikorwa bikurura abagenda aka gace gaturiye imisozi miremire.

Akarere ka Musanze gafite ubuso bungana na 530,2 Km2 zigizwe na 60 Km2 za Pariki y’Ibirunga na 28 Km2 z’Ikiyaga cya Ruhondo. Kagizwe n’imirenge 15, utugari 68 n’imidugudu 432.

Bitandukanye no hambere, ubu imihanda yubakwa igenda yiyongera. Kuri ubu muri Musanze hari imihana ya kaburimbo ireshya n’ibilometero 28, mu gihe indi y’ibilometero 6.7 iri kubakwa. Iyi yiyongeraho imihanda y’amakoro ireshya n’ibilometero 2.6.

Musanze ni igicumbi cy’ahantu nyaburanga mu Majyaruguru no mu Rwanda hose ndetse kari ku isonga mu gusurwa cyane na ba mukerarugendo bagenderera igihugu.

Abakagana bagakundira ibirimo Pariki y’Ibirunga icumbikiye ingagi zo mu misozi miremire, Buhanga Eco– park ndetse n’Ibirunga bya Muhabura, Gahinga, Kalisimbi, Bisoke na Sabyinyo bimaze kugwiza igikundiro n’ababisura biganjemo ababitondagira [hiking].

Ibi byiyongeraho amashyamba ya cyimeza agizwe n’ibirimo agashyamba ka Nkotsi na Bikara. Aya ni yo atuma Akarere ka Musanze karangwa n’amahumbezi cyane ko ayo mashyamba yiganjemo imigano. Musanze inafite amashyamba y’amaterano agizwe ahanini n’inturusu n’ibiti birimo iby’imbuto ziribwa.

Abatemberera i Musanze banaryoherwa no gusura inyamaswa zirimo ingagi, imbogo, inyoni, inkima n’inkende, impongo n’izindi zo mu misozi miremire.

Usibye gusura ibirunga, Musanze ifite ibindi byiza nyaburanga birimo Ellen DeGeneres Campus, Ibiyaga bya Burera na Ruhondo, gusura inyoni, Isumo rya Gasumo, Ubuvumo bwa Musanze, Red Rocks Rwanda n’ibindi.

Bitewe n’ubwinshi bw’abahasura, bituma na hoteli n’amacumbi abacumbikira agenda yaguka umunsi ku wundi.

Kuri ubu mu Karere ka Musanze hari hoteli 42, zirimo eshanu z’inyenyeri eshanu, n’andi macumbi muri rusange agera kuri 112.

Mu myaka ine ishize, kubona hoteli y’inyenyeri eshanu mu Karere ka Musanze byari nk’inzozi. Ubu aka gace gacumbikiye hoteli eshanu ziri ku rwego rwo hejuru, zirimo Bisate Eco Lodge, Singita Kwitonda Lodge and Kataza House, One and Only Gorilla’s Nest, Wilderness Sabyinyo na Amakoro Songa Lodge.

Kuri ubu Umujyi wa Musanze uri kuvugururwa umunsi ku wundi aho uwugezemo ubona inyubako z’amagorofa ziri kuzamurwa ubutitsa mu kurushaho kuwagura. Izi zizimo izo guturamo, isoko ry’imbuto n’imboga riri kubakwa bundi bushya n’izindi.

Guverinoma y’u Rwanda yihaye kugeza inyungu iva mu bukerarugendo kuri miliyoni $800 mu 2024 ivuye kuri miliyoni $440 nk’intego yari yashyizweho mu 2017.

Urwego rw’Igihugu rw’Iterambere, RDB, rwatangaje ko ubukerarugendo bwinjirije u Rwanda miliyoni $247, asaga miliyari 290 Frw, mu mezi atandatu ya mbere y’umwaka wa 2023. Ni imibare yazamutse ku kigero cya 56% ugereranyije na miliyoni 158$ zari zabonetse mu gihe nk’icyo mu 2022.

Mu mwaka ushize, ubukerarugendo bushingiye ku ngagi ni bwo bwinjije amafaranga menshi kandi ko bigaragara ko no mu 2023 uru rwego ruzakomeza gukura.

Musanze ni umujyi wagutse bwangu kuva mu myaka mike ishize

Nibura umuntu uvuye i Kigali ajya i Musanze ashobora gukoresha amasaha abiri mu modoka ye bwite ariko ashobora kwiyongera mu gihe yakoresheje iya rusange

Akarere ka Musanze gafite ubuso bungana na 530,4 Km2, Umujyi wako uri kuzamurwamo inyubako zigeretse

Iyi nyubako y'umweru mu minsi ya vuba izaba ikoreramo hoteli nshya izaba yitwa 'Amikus'

Imihanda y'umukara isigaye iboneka henshi mu Mujyi wa Musanze no mu tundi duce

Iterambere rya Musanze riri kwihuta bijyanye n’igishushanyombonera cyawo

Inyubako z'Abihayimana ziri mu zihagazeho muri Musanze

Musanze iri mu mijyi itandatu yunganira uwa Kigali ndetse ni yo iwugwa mu ntege

Inyubako zitandukanye ziri kuzamurwa ku bwinshi mu Mujyi wa Musanze

Musanze iri mu turere dutanu tugize Intara y’Amajyaruguru ndetse ni yo ifatwa nk'umurwa mukuru wayo

Abikorera b'i Musanze bashyize imbaraga mu kuvugurura Umujyi wabo binyuze mu nyubako bari kuzamura

Mu mfuruka zose z'Umujyi wa Musanze hari kuzamurwa inyubako nshya cyangwa hakavugururwa izisanzwe

Akarere ka Musanze gafatwa nk’igicumbi cy’ahantu nyaburanga mu Majyaruguru no mu Rwanda hose

Ugeze muri uyu mujyi abona iterambere ryawo riri kwihuta bijyanye n’igishushanyo mbonera cyawo

Kuva mu myaka itatu ishize, Musanze yateye imbere mu bikorwaremezo birimo inyubako zitandukanye

Uri i Musanze aba yitegeye ubwiza bw'imisozi itandukanye

Musanze ni umujyi wubatse ahantu hatuma ushobora kubungabunga ibidukikije

Isoko rishaje ryarasenywe ubu hari kubakwa irishya

Umujyi wa Musanze waguka umunsi ku wundi

Isoko ry'ibiribwa rya Musanze, aho ryahoze hari kubakwa irishya rigezweho

Dore isoko rishya uko rizaba rimeze niryuzura

Inyubako zihagazeho ndetse zikoreramo ibigo bikomeye zirahari ku bwinshi

Abashaka gutumiza ibintu bitandukanye bavunwe amaguru. Ya sosiyete ibyihutisha yahateye amatako

Amikus yitegura gufungura hoteli igezweho ifite ishoramari ririmo na Boulangerie igezweho i Musanze

Ushaka guhaha biramworohera kuko hari amaguriro agezweho mu bice bitandukanye

Umujyi wa Musanze uri mu duce twihagazeho mu bukerarugendo bw'Amajyaruguru. Iyi nyubako ni yo ikoreramo Sosiyete itembereza ba mukerarugendo, Beyond The Gorillas Experience

Abanyamaguru baho uburenganzira bwabo burubahirizwa iyo banyura mu nzira yabagenewe

Inyubako ikoreramo Akarere ka Musanze iherereye mu mujyi rwagati, ni na yo irimo RC Musanze. Imbere yayo ni ho hari Ibiro by'Intara y'Amajyaruguru

Ibiro by'Intara y'Amajyaruguru bikorera muri iyi nyubako

Abasura Pariki y'Ibirunga mbere yo kuyerekezamo babanza kunyura ku biro by'Urwego rw'Igihugu rw'Iterambere, RDB mu Kinigi

Aka karere gafatwa nk'ak'ubukerarugendo bushingiye ku ngagi zo mu Birunga n'ibindi byiza nyaburanga

Ellen DeGeneres Campus iteza imbere ubushakashatsi bushingiye ku ngagi iherereye mu Kinigi aho imaze umwaka itangije ibikorwa byayo

Ubukerarugendo bw’u Rwanda bwinjije miliyari zisaga 290 Frw mu mezi atandatu ya 2023

Ubukerarugendo bushingiye ku ngagi bukomeje gutera imbere

Ishusho y’Umujyi wa Musanze mu masaha y’ijoro

Mu ijoro ni uku amarembo y'Umujyi wa Musanze aba acaniye

Imihanda yubakwa inashyirwaho amatara arara ayicaniye, abaturage bagenda batikandagira

Hoteli zimaze gushinga imizi i Musanze

Bisate Lodge ifite ibyumba bitandatu bigiye biteretse mu ishyamba hagati, bisakaje ibyatsi hejuru. Kurara muri iyi hoteli y'inyenyeri eshanu ijoro rimwe wishyura ari hagati ya 1100$–1400$

Singita Kwitonda Lodge and Kataza House igizwe n’inyubako zigezweho zubatse i Musanze hafi y’Ikirunga cya Sabyinyo, aho uba unitegeye ibya Gahinga na Muhabura

One & Only Gorilla’s Nest na yo ni hoteli y'inyenyeri eshanu iri i Musanze mu gace gakurura ba mukerarugendo. Yubatse mu buryo zihagaze ku byuma bishinze mu butaka

Wilderness Sabyinyo yahoze yitwa Sabyinyo Silverback Lodge. Ni imwe muri hotel z'inyenyeri eshanu zakira ba mukerarugendo bo ku rwego rwo hejuru by’umwihariko abasura ibirunga

Amakoro Songa Lodge ifite inyenyeri eshanu ni inyubako zakira ba mukerarugendo ziherereye mu Kinigi mu Karere ka Musanze

Susa Gardens iri muri hotel zibarizwa mu Mujyi wa Musanze aho uyirimo ahumeka akayaga keza bitewe n'aho iherereye

Isange Paradise Resort iherereye neza mu marembo ya Kaminuza ya INES Ruhengeri

Fatima Hotel iri mu zihagazeho mu Mujyi wa Musanze rwagati

Milano Motel ni imwe mu zicumbikira abasura n'abagenda i Musanze

Amafoto ya IGIHE: Yuhi Augustin