Tariki ya 1 Nyakanga 2014 u Rwanda ruzita amazina abana b’ingagi 18 mu muhango ngarukamwaka wo Kwita Izina uzizihizwa ku nshuro ya 10.

Ibi birori byo kwita izina aba bana b’ingagi bavutse muri uyu mwaka, uzabera mu Karere ka Musanze , mu Kinigi nk’uko byatangajwe na Ambasaderi Yamina Karitanyi, Umuyobozi Mukuru ushinzwe ubukerarugendo no kubungabunga ibidukikije muri RDB (Head of Tourism and Conservation)

Ambasaderi Yamina Karitanyi mu kiganiro yagiranye n’abanyamakuru ku cyicaro cy’Ikigo cy’Igihugu cy’Iterambere mu Rwanda , RDB, yasobanuye ko kuri iyi nshuro u Rwanda rutazishimira kuba rwarungutse aba bana 18 b’ingagi gusa ahubwo ngo ni umwanya mwiza wo gushimira abantu ku giti cyabo, ibigo, imiryango n’ibihugu bigira uruhare rukomeye mu gufata neza izi nyamaswa.

Ambasaderi Yamina Karitanyi yavuze ko kwizihiza ibirori byo Kwita Izina ingagi bifasha u Rwanda kwimenyekanisha, hagaragazwa ibyiza nyaburanga rufite , runereka amahanga ko ari ntagereranywa mu kubungabunga ibidukikije.

Nubwo umunsi nyir’izina wo Kwita Izina ingagi uteganyijwe ku itariki ya 1 Nyakanga 2014, urugendo rwo kwizihiza ibi birori ruzatangira ku itariki ya 26 Kamena 2014 ubwo hazafungurwa ku mugaragaro ishuri ribanza rya Basumba riherereye muri Bigogwe mu Karere ka Nyabihu.

Iri shuri rifite ibyumba bitandatu byubatswe hakoreshejwe amwe mu madovize yasaruwe mu bukerarugendo. Rizafasha abana 380 kubona aho bigira mu buryo buboroheye.

Ku itariki ya 28 Kamena 2014, hazaba igikorwa cy’Umuganda rusange , uzitabirwa na bamukerarugendo n’abanyacyubahiro bazaba baturutse mu bihugu bitandukanye.

Ambasaderi Yamina Karitanyi, yasobanuye ko muri uyu muganda, u Rwanda ruzaboneraho umwanya wo kwereka ibindi bihugu uburyo Abanyarwanda bafatanyiriza hamwe mu gusukura igihugu no gufata neza ibidukikije ndetse nabo bakaba bazabyigiraho kugira ngo uyu muco bazawutoze ibihugu byabo.

Muri Serena Hotel i Kigali, hateguwe inama zizaba ku itariki ya 28 Kamena , ahazatangirwa urubuga kuri bamukerarugendo bo mu Rwanda kugira ngo bereke abanyamahanga umwihariko w’u Rwanda mu ubukerarugendo bityo burusheho kwamamara ku isoko mpuzamahanga.

Mu Karere ka Musanze, hateguwe imurikagurisha rizamara iminsi ibiri, ku itariki ya 29-30 Kamena 2014, ribera kuri stade Ubworoherane.

Ku itariki ya 30 Kamena 2014 hazaba igitaramo kizitabirwa n’amatorero atandukanye n’abahanzi b’indirimbo mu kwitegura neza ibirori nyir’izina byo Kwita Izina bizaba ku munsi ukurikira.

Muri uyu mwaka, harateganywa abatumirwa bo hanze y’igihugu basaga 300 bazitabira uyu muhango wo Kwita Izina.

Mu myaka 9 ishize, u Rwanda rumaze kwita izina ingagi 161, rukaba rufite 295 zose hamwe.