Iki gikorwa cyabaye ku wa Gatandatu muri Stade ya Arsenal izwi nka Emirates iri mu Mujyi wa Londres mu Bwongereza.

Cyitabiriwe na Ambasaderi w’u Rwanda, Yamina Karitanyi n’Umuyobozi ushinzwe ubucuruzi muri Arsenal, Peter Silverstone.

Ikigo cy’Igihugu cy’Iterambere, RDB kivuga ko icyari kigamijwe ari ugusobanurira abafana ba Arsenal gahunda ya ‘Visit Rwanda’ mu buryo bwimbitse no kurushaho gushimangira umubano wari usanzweho.

Iki gikorwa cyahuriranye n’umukino wahuje Arsenal na Chelsea cyanaranzwe n’ibikorwa by’imyidagaduro bitandukanye birimo ingoma Nyarwanda, abari bahagarariye ‘Visit Rwanda’ bakaba bahaga abafana inyandiko ziriho amakuru atandukanye y’ibyiza nyaburanga bashobora gusura mu Rwanda.

Hanatagijwe amarushanwa agamije gutuma abafana batsindira imipira ya Arsenal n’amatike yo kureba imikino izabera kuri stade y’iyi kipe.

Muri aya marushanwa abafana basabwaga kwifotoreza kuri stand ya ‘Visit Rwanda’, bagakurikira urubuga rwayo rwa twitter na Facebook, ubundi bagashyira hanze ifoto iherekejwe n’ijambo #visitrwanda. Abatsinze bazatangazwa ku itariki 21 Mutarama.

Muri Gicurasi 2018 nibwo u Rwanda rwinjiye mu bufatanye bw’imyaka itatu n’ikipe ya Arsenal, bugamije kurumenyekanisha nk’icyerekezo gikomeye cy’ubukerarugendo, binyuze mu gushyira ikirango cy’u Rwanda ku maboko y’imyenda yayo.

Abafana ba Arsenal basobanuriwe byinshi ku bufatanye bw'ikipe yabo n'u Rwanda

Abafana bifotorezaga ahamurikirwaga ibikorwa bya 'Visit Rwanda'

Bamwe mu bagize itsinda ry'abafana ba Arsenal mu Rwanda nabo bari kuri Stade ya Emirates

Iki gikorwa cyanitabiriwe na Ambasaderi w’u Rwanda mu Bwongereza, Yamina Karitanyi n’Umuyobozi ushinzwe ubucuruzi muri Arsenal, Peter Silverstone

[email protected]