Ni amasezerano agamije kwamamaza u Rwanda binyuze muri gahunda ya ‘Visit Rwanda’, rukagaragazwa nk’ahantu heza h’ubukerarugendo n’ishoramari.

Muri Gicurasi 2018 nibwo u Rwanda rwasinyanye na Arsenal amasezerano y’imyaka itatu, agamije kumenyekanisa u Rwanda nk’icyerekezo cy’ishoramari n’ubukerarugendo.

Mu 2019 hafashwe icyemezo cyo kuyongera, binatangazwa ku wa 14 Gicurasi 2021 ubwo Arsenal F.C yamurikaga umwambaro mushya.

Kuwa 4 Ukuboza 2019 u Rwanda rwasinyanye amasezerano y’imyaka itatu y’ubufatanye na Paris Saint Germain (PSG) yo mu Bufaransa, aho ijambo Visit Rwanda rigaragara ku mwambaro w’iyi kipe mu myitozo n’uwo yambara mbere y’imikino no ku kibuga Parc des Princes.

Mu gitekerezo yanyujije mu kinyamakuru The East African, Akamanzi yavuze ko izo mbaraga u Rwanda rwashyize mu kwamamaza ubukerarugendo bwarwo binyuze muri siporo, zitapfuye ubusa.

Habazwe agaciro k’inyungu u Rwanda rwagize binyuze mu kurwamamaza muri ayo makipe yombi umwaka ushize, kabarirwa muri miliyoni miliyoni $160. Ibi bibarwa harebwa ayo u Rwanda rwari gushora iyo rubinyuza mu kwamamaza mu itangazamakuru mu buryo busanzwe.

Uku kumenyekana k’ubukerarugendo bw’u Rwanda, Akamanzi avuga ko aribyo byahindukiye bikarwinjiriza miliyoni $445, aturutse mu bakerarugendo basaga miliyoni basuye u Rwanda mu 2022.

Ni inyungu ifatika ku bukerarugendo bw’u Rwanda bwari bumaze imyaka ibiri bwarashegeshwe na Covid-19. Akamanzi avuga ko ayo mafaranga yinjijwe, angana na 90 % by’ayo u Rwanda rwavanaga mu bukerarugendo mbere ya Covid-19.

Ati "Aba bashyitsi ntabwo ari ukwishimira ibyiza by’u Rwanda gusa ahubwo banagira uruhare mu iterambere ry’imibereho myiza y’abaturage. Ubukerarugendo bwahaye akazi ibihumbi by’abanyarwanda kandi amafaranga avamo atuma u Rwanda rubasha kubaka ibitaro mu bice by’icyaro, kwishyurira abana amafunguro ku mashuri, kugeza umuriro w’amashanyarazi ku baturage..."

Akamanzi kandi yagarutse ku ruhare rw’amafaranga ava mu bukerarugendo, aho amwe asubizwa mu baturage baturiye ahari ibikorwa by’ubukerarugendo bakubakirwa ibikorwa remezo, kugira ngo bafashe igihugu kubungabunga ubwo bukerarugendo.

Nubwo Guverinoma igaragaza ko kwamamaza mu makipe y’i Burayi byatanze umusaruro, hari abakunze kubinenga bavuga ko igihugu gikennye kitakabaye gitera inkunga amakipe akomeye.

Akamanzi yavuze ko ibyo ari ukwigiza nkana kuko umusaruro uvamo ugaragarira buri wese.

Ati “Ni uburenganzira kutemeranya n’imiyoborere y’u Rwanda ariko ubukangurambaga bugamije kubangamira ishoramari mu gihugu kiri mu nzira y’amajyambere kandi rigira ingaruka nziza ku mibereho myiza y’abaturage, ntacyo bimaze, ni ukwikunda.”

Akamanzi yavuze ko kugaragazwa nabi ari ibintu bimenyerewe kenshi ku bihugu bya Afurika, ariko ko u Rwanda rwiteguye kwereka abarutega iminsi ko barwibeshyaho.

Ati “Abashaka kubibangamira bafite uburenganzira bwo guhitamo niba amatangazo yamamaza Visit Rwanda aca kuri za televiziyo zabo ariko ntibakwirengagiza ko ubwo buryo bwo kwamamaza u Rwanda bufitiye akamaro abaturage.”

Perezida Kagame aherutse kugaragaza ko ubufatanye n’amakipe arimo Arsenal na PSG bwabyaye umusaruro, hakaba hari n’ibiganiro n’indi kipe ikomeye ngo nayo yamamaza Visit Rwanda.

Ati “Tugiye no kugira indi kipe izwi cyane mu mupira w’amaguru, rero nimubona dukorana n’ikipe imwe, hakaza indi, mujye mumenya ko tuzi icyo dukurikiye. Ntabwo ari uguta amafaranga”.

Ntabwo Perezida Kagame yatangaje ikipe iri kuganira n’u Rwanda ku buryo impande zombi zagirana imikoranire. Gusa kuva u Rwanda rwasinyana amasezerano na PSG hamwe na Arsenal, bivugwa ko amakipe atandukanye y’i Burayi yatangiye kurwegera arusaba ko bakorana.

Amakuru agera kuri IGIHE ahamya ko ikipe nshya u Rwanda rwaba rugiye gukorana nayo ishobora kuba ari iyo mu Budage ndetse ko amahirwe menshi yaba ari FC Bayern Munich.

Paris Saint Germain ni imwe mu makipe yamamaza Visit Rwanda

Ku kibuga cya Arsenal, ubutumwa bwamamaza Visit Rwanda butambuka ku byapa bihari

Mu 2018 nibwo Arsenal yatangiye kwamamaza Visit Rwanda