Uburyo bushya bwo gutwara abakerarugendo na Kajugujugu muri Pariki z’igihugu

Yanditswe na Evariste Nsengimana
Kuya 10 Gicurasi 2019 saa 12:59
Yasuwe :
0 0

Kimwe n’uko utega imodoka ikakujyana mu cyerekezo runaka cy’igihugu ku isaha yagenwe, ubu ni nako umuntu ushaka gusura ibice nyaburanga by’u Rwanda azajya abigenza yifashishije Kajugujugu.

Abasanzwe basura ibice nyaburanga bafite amikoro n’ubundi bakoresha indege bashaka nko gusura Pariki runaka, ariko umuntu agasabwa kwishyura imyanya yayo yose nubwo yabaga ari buyigendemo wenyine.

Gahunda yo gutembereza abanyarwanda mu bice nyaburanga by’igihugu hifashishijwe indege imaze imyaka 15, yatumaga udafite ubushobozi bwo kugura imyanya yose ahitamo gukoresha ubundi buryo bwo kugerayo, agatega imodoka bikaba byamutwara umwanya munini.

Urugero nko kujya muri Pariki ya Nyungwe uturutse i Kigali mu modoka bitwara amasaha atari munsi y’atandatu ariko muri Kajugujugu ni iminota itarenze 40.

Ikigo gikora ibijyanye n’ingendo z’indege zo mu bwoko bwa Kajugujugu mu Rwanda, Akagera Aviation, cyamuritse gahunda nshya yo gutwara abanyarwanda n’abanyamahanga basura ibice by’ubukerarugendo mu buryo buhoraho bidasabye kugura imyanya yose.

Iyi gahunda yamuritswe ku wa 9 Gicurasi, izatangira gushyirwa mu bikorwa ku wa 1 Nyakanga 2019.

Nimara gutangira buri wese azajya aba azi neza ngo Kajugujugu ivuye i Kigali yerekeza muri Pariki ya Nyungwe, iy’Akagera n’iy’Ibirunga cyangwa ivuye muri izo pariki igaruka i Kigali kuri iyi saha, n’amafaranga y’itike ni aya.

Akagera Aviation igaragaza ko Kajugujugu iva i Kigali yerekeza muri Pariki ya Nyungwe, izajya ihaguruka saa 10:00 za buri wa Mbere na buri wa Gatatu, naho Pariki ya Nyungwe-Kigali bibe saa 11:00 kuri iyo minsi, itike hose ikagura $475 (asaga ibihumbi 420 Frw).

Mu cyerekezo Kigali-Pariki y’Akagera, kajugujugu izajya ihaguruka saa 13:30 za buri munsi naho mu cya Pariki y’Akagera-Kigali ihaguruke buri munsi 14:45 itike igure $280 (asaga ibihumbi 250 Frw).

Kajugujugu izajya ihaguruka i Kigali yerekeza i Musanze, ahaherereye Pariki y’Ibirunga saa 15:15 za buri munsi naho Musanze-Kigali ihaguruke saa 16:30 buri munsi, itike hose igure $280 (asaga ibihumbi 250 Frw).

Umuyobozi wa Akagera Aviation, Nkulikiyimfura Patrick, yavuze ko bamaze imyaka 15 bafasha ba mukerarugendo baza mu Rwanda kugera mu bice bitandukanye babatwara muri kajugujugu ariko byasabaga kugura imyanya yayo yose.

Ati “Dutangiye kugira gahunda izajya ijyana umukerarugendo wese n’abanyarwanda muri rusange mu bice twabonye ko abifuza kubijyamo ari benshi.”

Yavuze ko iyi gahunda yo kugurisha umwanya umwe muri kajugujugu izorohereza abantu kuko hari abatabyitabiraga kubera ko byari bihenze.

Urugero nk’umuntu wifuza kujya i Musanze muri Kajugujugu yasabwaga kugura imyanya yayo yose nibura $1600 ari ubu ashobora kugura umwe gusa wa $280.

Akagera Aviation ifite Kajugujugu zigera ku icyenda zizifashishwa muri iyi gahunda.

Umuyobozi ushinzwe Ubukerarugendo mu Kigo cy’Igihugu cy’Iterambere, RDB, Belise Kariza, yavuze ko iyi gahunda Akagera Aviation yashyizeho izongera umubare wa ba mukerarugendo basura u Rwanda n’amadovize batanga.

Guverinoma yihaye intego ko mu 2024 inyungu u Rwanda ruvana mu bukerarugendo igomba kwikuba kabiri ikagera kuri miliyoni 800$ zivuye kuri miliyoni 404$ yinjiye mu mwaka ushize. Muri uwo mwaka ba mukerarugendo basura u Rwanda barenze miliyoni 1,4.

Umuntu ushaka gusura Pariki y'Akagera avuye i Kigali muri Kajugujugu bizajya bimusaba kwishyura asaga ibihumbi 250 Frw

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza