Huye: Amayobera ku nkende yapfuye imanitse mu mugozi

Yanditswe na Tuyishimire Raymond
Kuya 10 Werurwe 2021 saa 04:21
Yasuwe :
0 0

Mu gitondo cyo kuri uyu wa Gatatu tariki ya 10 Werurwe 2021, muri Kaminuza y’u Rwanda hagaragaye inkende yapfuye imanitse hejuru y’amabati yo kuri Stade ya Kaminuza iziritse umugozi mu ijosi, bamwe babiteramo urwenya ko ngo yiyahuye.

Umunyeshuri wo muri Kaminuza y’u Rwanda, Rwamucyo Nsengimana Jean de Dieu, yabwiye IGIHE ko iyi nkende bayibonye mu masaha ya mu gitondo imanitse, bihutira kubimenyesha ubuyobozi.

Ati “Byatubereye urujijo kuko twabibonye mu gitondo nka saa mbili, bivugwa ko yari imaze iminsi ifite umugozi mu ijosi, birashoboka ko yagiye hejuru kwa kundi ziba zikina akagozi kagafatwa mu ibati kagahita kayizirika.”

Yakomeje agira ati “Ubuyobozi bwahise buhagera ariko nta cyo bwayikoraho kuko hari izindi nkende zarakaye, urumva ni hejuru cyane kandi bisaba n’abantu kuba bakurira kandi n’izindi nkende zihari byari bigoye kuba wazihakura.”

Hari amakuru ko urupfu rwayo rwatewe n’abantu bayiteze umugozi ku bushake, bakayambika agasinga mu ijosi bitewe n’uko hari abakunze kuvuga ko zibonera imyaka zikanabasagarira.

Umukozi wa RDB ushinzwe kubungabunga urusobe rw’ibinyabuzima, Ngoga Télesphore, yabwiye IGIHE ko bagiye gushaka amakuru y’icyaba cyayishe.

Ati “Turi kubikurikirana kugira ngo turebe uko bimeze maze hashakishwe ikintu cyakorwa byihutirwa. Ubu turi kuvugana n’abayobozi ba Kaminuza ngo tumenye uko bimeze.”

Amakuru agera kuri IGIHE ni uko nyuma iyi nkende yamanuwe aho yari imanitse ikajyanwa ahakusanyirizwa inyamaswa muri Kaminuza Nkuru y’u Rwanda mu Ishami rya Huye, kugira ngo iterwe imiti itazangirika maze ijye yifashishwa mu bushakashatsi n’abanyeshuri biga ibijyanye n’imibereho y’inyamaswa.

Gusa kugeza ubu hategerejwe ko ibanza gukorerwa ibizamini hakarebwe niba nta ndwara ifite, mu gihe yasanganwa uburwayi igahita ishyingurwa.

Birakekwa ko urusinga yari ifite mu ijosi yarwambitswe n'abantu
Iyi nkende yamanuwe aho yapfiriye, igiye gukorerwa isuzuma mu gihe byagaragara ko nta burwayi bwihariye ifite izajya ikoreshwa mu bushakashatsi
Mu ishyamba riri muri Kaminuza y'u Rwanda hakunze kugaragara inkende nyinshi

Kwamamaza

Kwamamaza

Inkuru ziheruka - Inyamaswa

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .