00:00:00 IGIHE NETWORK KN KINYARWANDA EN ENGLISH FR FRANCAIS

Amateka n’imibereho y’ingagi ikuze kuruta izindi mu Rwanda

Yanditswe na

Thamimu Hakizimana

Kuya 23 February 2016 saa 12:44
Yasuwe :

Ingagi ni imwe mu nyamaswa z’agaciro zidakunze kuboneka henshi ku isi, ari na yo mpamvu benshi basasobanukiwe cyangwa ngo bamenyeho byinshi ku mibereho yazo.

Ubusanzwe ingagi ifite byinshi ihuriyeho n’umuntu, yaba mu miterere n’imyitwarire. Ifite zimwe mu ngingo nk’amaso ,amazuru, amaguru, amaboko, intoki n’imico bifitanye isano ya hafi n’iby’abantu.

Mu Rwanda ingagi ifatwa nka zahabu, bitewe n’amadevize atangwa na ba mukerarugendo baturuka mu mpande zitandukanye z’isi baje kwirebera ibyo byiza bitatse urwa Gasabo utapfa kubona ahandi, harimo n’ingagi.

Muri Afurika ingagi ziboneka mu Karere k’ibiyaga bigari,by’umwihariko mu gace k’ibirunga byo mu Rwanda, Repubulika Iharanira Demokarasi ya Congo (RDC) na Uganda. Icyakora hari andi makuru avuga ko hari n’izindi ziba ku mugabane w’Amerika y’Amajyepfo.

Ntisanzwe, yewe biranagoye gusobanurira umuntu imvo n’imvano ndetse n’imibereho y’ingagi bitewe n’ubwenge bwazo; nta wuzi niba koko ari yo nkomoko y’ikiremwamuntu nk’uko bamwe mu bahanga babivuga. Icyakora abemera Imana bo barabihakana.

Agaciro k’ingagi mu Rwanda ntikagereranywa. Ushobora kwibaza inyamaswa ihuruza amahanga,ikitwa izina,ikagira abaganga bayivura, igasurwa...!

Ibi byazamuye IGIHE ishaka kumenya by’impamo imibereho n’amateka y’ingagi zo mu Rwanda , cyane cyane ikuze kurusha izindi.

Ingagi ni inyamaswa y’indyabyatsi, izwiho kurya ubwoko by’ibyatsi burenze 200 kandi irya n’intozi; icyakora iyo ishaje irya ibyatsi gusa.

Ingagi itwita amezi icyenda. Mu buzima bwayo ishobora kubyara abana bane cyangwa batanu. Uburambe bwayo buba hagati y’imyaka 35 na 45.

Hano yari irimo irya umugano

Imibereho y’ingagi ishaje kuruta izindi mu Rwanda

Ingagi ishaje kurusha izindi mu Rwanda, ni ingore yitwa Poppy. Yavutse tariki ya 1 Gashyantare 1970 ,ikaba ifite ibiro 70, iba mu muryango wa Iyambere.Icyakora nubwo ipima ibi biro, ubusanzwe ingagi nini ishobora kugira ibiro 200.

Ababana n’ingagi mu birunga bemeza ko Poppy imaze kubyara abana batandatu kandi ibana neza n’izindi, kandi ni na yo iyoboye umuryango wayo mugari urimo n’izindi ngore. Uwo muryango ibamo ugizwe n’ingagi eshanu gusa.

Poppy iba mu muryango waremwe vuba aha nyuma y’aho ingabo nkuru ihararutswe mukecuru ikava mu muryango, maze ikajya kwibana.

Nyirantabwa Poppy ibonye ibibaye, yaje kwiremera uwayo muryango ugizwe n’ingabo imwe, ingore eshatu n’akana kamwe.

Mu bana Poppy yabyaye harimo ingabo eshatu zirimo KiKi, Isonga n’Inyungura ndetse n’ingore eshatu ari zo :Ururabo, Ishyaka na Ejoheza.

Ingagi Poppy , nubwo ubu iri mu muryango witwa Iyambere, yakuriye inabyarira abana bayo mu muryango witwa Susa, ukaba uzwiho cyane kugira ingagi nyinshi, ari na byo byatumye ugenda ubyara indi miryango ubu imaze kuba itatu ariyo Karisimbi, Isimbi n’Igisha, yiyongera kuri Susa y’umwimerere.

Umuyobozi wa Pariki y’Ibirunga, Prosper Uwingeri yabwiye IGIHE ko bagendeye ku myaka Poppy ifite, bemeza ko ariyo ngagi nkuru kuruta izindi.

Yagize ati «Ku myitwarire yayo, ni ingagi ituje.Ikindi tuyiziho ni uko yahoze muri Susa. Uyu muryango umaze kwigabanyamo kabiri, Poppy yagiye mu Isimbi, umuryango wari uyobowe n’ingabo nkuru yitwa Getty. »

Yakomeje avuga ko nyuma y’aho Getty ipfiriye tariki ya 22 Ukuboza 2013, Poppy yagaragaye nk’itemera ingagi yitwa Muturengere yari yungirije ingabo nkuru yahise iyobora umuryango, ku buryo Poppy yagiye iva mu muryango ikagenda yonyinye, rimwe na rimwe ikongera ikagaruka.

Iri kurya amwe mu moko y'ibyatsi

Ababana n’ingagi mu buzima bwazo bwa buri munsi bemeza ko ubwo ingagi Muturengere yarwanaga n’umuryango wa Susa maze bikayiviramo gukomereka bikomeye, Poppy yahise iba nk’iyoboye umuryango, bitewe n’uko mu gihe cy’icyumweru Muturengere yari ifite imbaraga nke. Nyuma Poppy yaje kuva mu Isimbi ijya mu muryango w’ Iyambere.

Kugeza ubu mu Rwanda hari ingagi zigera kuri 300, ababana nazo bemeza ko ari zimwe mu nyamaswa zinjiza amadovize menshi mu gihugu binyuze mu bukerarugendo.

Mu gihe usanga izindi nyamaswa zigira ahantu hamwe zirara buri munsi ,ingagi itandukanye nazo kuko ikora icyari twagereranya n’uburiri (night nest) iraramo ijoro rimwe gusa, keretse iyo yarwaye, cyangwa ifite akana kataracuka ikararana na ko.

Mu gusura ingagi, Umunyarwanda yishyura ibihumbi 30 by’amafaranga y’u Rwanda, umunyamahanga akishyura amadolari ya Amerika 750, ni ukuvuga asaga ibihumbi 500 by’amafaranga y’u Rwanda mu gihe hari n’ibiciro bigenda byiyongera ku Banyamahanga baba bashaka gufotora.

Itungwa n'ibyatsi by'ubwoko butandukanye
Itwita amezi icyenda kimwe n'umuntu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .